Улаанбаатар хотын агаар, орчны бохирдлыг бууруулах зорилгоор Сэлбэ, Баянхошуу болон Ханын материал гэсэн байршлуудад 20 мянган айлын орон сууц барихаар болсон. 

Тэгвэл Сүхбаатар дүүргийн 14-р хороо, Чингэлтэй дүүргийн 14, 18-р хороонуудад жишиг Сэлбэ төсөл хэрэгжүүлэхээр дэд бүтцийн ажил гүйцэтгэж дууссан ба 158 га, 2000 нэгж талбар чөлөөлөхөөс 1700 гаруй айлын газар чөлөөлжээ. 

Сонгинохайрхан дүүргийн есдүгээр хорооны нутаг дэвсгэрийн 45 га талбайг хамарч буй Баянхошуу дэд төсөлд 5000 айлын орон сууц барихаар төлөвлөж буй бөгөөд инженер дэд бүтцийн ажил гүйцэтгэж дууссан ба 440 айлын ногоон орон сууц барьж эхэлсэн байна. 

Ханын материал орчимд 9.7 га талбайд 3000 айлын орон сууц барихаар төлөвлөн энэ оны дөрөвдүгээр сард зураг төслийн ажил гүйцэтгэж дуусах юм. 

Төрийн болон нийгмийн бүх үйлчилгээг нэг дор авах боломж бүрдүүлэх зорилготой "20 минутын хот" төслийн нэгээхэн хэсэг болсон тус төслүүдийн газар чөлөөлөх явц 60 хувьтай буюу нийт 135 нэгж талбар чөлөөлсөн байна.