Омск хотын хөгжмийн театрын барилга

Байршил: ОХУ, Омск хот

Барьж дууссан огноо: 1981 он

Архитекторууд: Дмитрий Лурье, Николай Стружин, Наталья Белоусова 

1972 онд ЗХУ-ын Омск хотын Хөгжмийн Театрын барилга хуучирч, заалны багтаамж нь хэрэгцээ хангахаа больсон тул шинэ театр барихаар болсон түүхтэй. Уг театрын барилгын фундаментын ба ерөнхий цутгалтын ажил бүтэн 7 жил үргэжилсэн нь Омск хотын иргэдийн бухимдлыг төрүүлж байсан хэдий ч 8 дахь жилдээ буюу 1980 онд барилга баригдаж дууссан ч иргэдийн сэтгэлд хүрсэнгүй. Энэ одоо юу вэ? Гулгуур юм уу... Болиочээ! Ичээчээ!... гэх мэтээр бухимдлаа илэрхийлж байсан.

Тус барилгын төслийг Москва хотын архитекторууд санаачлан гүйцэтгүүлж барилга нь тухайн үедээ л орчин үеийн шинэлэг дизайнтай театрт тооцогдож байсан юм. Жишээ нь:  тайз нь баруун, зүүн, урагш, хойш шилжин эргэлддэг, үзэгчидийн суудлыг дуу чимээ шингээгч материалаар бүрсэн гэх мэт шинэлэг байж. Мэдээж театр баригдаж дуусав уу үгүй юу, хотын оршин суугчид “Трамплин” барилга  гэх болжээ. Энэ нь цаначид уруудан гулгадаг замыг хэлдэг байна.

Тус театрын хувцас солих өрөө болгоныг угаалгын болон ариун цэврийн өрөөтэй төлөвлөн барьсан нь тухайн үедээ л хаана ч үзэгдэж харагдаж байгаагүй тансаглал байжээ.    

Омск хотын оршин суугчид одоо ч тухайн барилга хотын өнгө үзэмжийг гутаагаад байна уу? сэргээгээд байна уу? Гэдэг дээр маргалдсаар байгаа гэнэ.

«Курпаты» сувилал

Байршил: ОХУ, Ялта хот

Барьсан огноо: 1980—1985

Архитектор: Игорь Василевский 

Энэхүү нисдэг тавагны хэлбэртэй авангард барилгыг тухайн үедээ ЗХУ ба Бүгд Найрамдах Чехословак Улсын Ажилчидын үйлдвэрчний эвлэлийн холбоод хамтран бариулсан байна. Чехословакууд ажилчидийнхаа сувиллыг заавал Хар Тэнгисийн хөвөөн дээр бариулах хүсэлтэй байсан бөгөөд тэнгисийн эрэг орчим зай талбай хомс байснаас ийм өвөрмөц дизайны шийдвэрт хүрсэн гэдэг. 

400 өрөөний хүчин чадалтай уг сувилал нь дотроо эмнэлэг сувиллаас гадна усан бассейн, концертны заал, бар ресторан, диско талбай болон номын сантай юм. Мөн дээвэр дээр нь од гаригийн ажиглалт явуулах обсерватори байдаг. 

Робототехник ба Кибернетикийн институт

Байршил: ОХУ, Санкт-Петербург

Баригдсан огноо: 1973—1987

Архитекторууд: Борис Артюшин, Станислав Савин

Тус байгууламжийн бүтэн нэр нь Роботехник ба Техник кибернетикийн Эрдэм шинжилгээ Судлалын, Конструктор Туршилтын Төв Институт. Уг цогцолборт ЗХУ-ын үед сансар огторгуйн холбогдолтой, сансар аяллын нэн шинэ технологи, элдэв шинэ зэвсэгтэй холбоотой технологи туршдаг лаборатори байсан ба өдгөө ч анхны төрхөөраа байгаа юм.