Хятад Улс арван хоёрдугаар сарын 30-нд Шинжаан-Уйгурын өөртөө засах орны цаст уулсаар дамжуулан дэлхийн хамгийн урт хурдны замын хонгилын бүтээн байгуулалтыг барьж дуусгалаа.

22.13 км урт Тяньшань Шэнли туннел ашиглалтад орсноор дэлхийн хамгийн урт нурууны нэг болох Тяньшань уулсаар аялах цагийг 3 цагаас 20 минут болгон бууруулах юм. Энэ нь Торгоны замын эдийн засгийн бүс нутгийг Евроазийн орнуудад нээлттэй болгоход тусална гэж бүс нутгийн засгийн газраас мэдэгджээ. 

Туннелийн ажил 2020 оны дөрөвдүгээр сард эхэлсэн бөгөөд барилгын багийнхан олон бэрхшээлийг даван туулж, 3000 метрээс дээш өндөрт,  геологийн төвөгтэй нөхцөлд барьжээ. Барилгын талбай нь Тяньшань II мөсөн гол болон Өрөмч хотын усны эх үүсвэрийн хамгаалалтын бүсэд ойрхон байрладаг тул экологийн хамгаалалтын онцгой стандарт баримталж ажиллажээ.

Хятадад авто замын хонгил барихад анх удаа хонгилын цооногийн машин ашигласан нь технологийн томоохон нээлтэд тооцогдож байна. Шинэ технологи ашиглах нь барилгын ажлын хугацааг 10 жилээс 4 гаруй жил болгон бууруулсан байна.  

Уг хонгилыг барьсан компанийн ерөнхийлөгч Цүй Жинчуан "Бид энэ салбарт гадаадын орнуудын технологийн монопол байдлыг эвдэж, инновацын салбарт тэргүүлсэн" хэмээжээ. Шинэ туннел нь Шинжяны хойд болон өмнөд хэсгийн хүмүүсийн урсгал, харилцаа холбоог сайжруулж, хөгжлийн илүү боломжийг олгоно гэж бүс нутгийн засгийн газар мэдэгдэв.