Бүгд Найрамдах Хятад Ард Улсын Шенжинь хотын захиргаа тухайн үеийн Ковид 19 цар тахлын цөвүүн мөчийг үл тоон, дэлхийн шилдэг архитектурын компаниуд дунд худалдаа үйлчилгээ, оффис, орон сууцны зориулалттай 400 метр өндөр сүндэрлэх, технологийн бүрэн шийдлийг цогцлоосон барилгын архитектур зохиох уралдаан зарласан нь өндөр барилга байгууламжийн зураг төсөл бүтээх тендер байв. Хотын захиргаанаас урьд хожид харагдаагүй архитектурын шийдэл, техник техноллогийг бүрэн дүүрэн ашиглаж чадсан барилгыг хүсжээ. Архитектурын компаниуд өөрсдийн гаргасан санаагаа ирүүлснээс хойш нэг жилийн дараа буюу 2021 онд  хотын захиргаа шалгарсан төслүүдээс ялагчийг зарласан нь Заха Хадид байв. Заха Хадид конторын Шенжинь муж руу илгээсэн санал нь өмнөх төслүүдийн адил этгээд хачирхалтай санал байв. Энгийн архитектурын шийдлийг хэзээ ч ашигладаггүй, этгээд пропорци зүсэлт, хэлбэр ашиглан зураг төслөө туурвидаг түүнийг архитекторууд “Муруй дүрсийн хатан хаан” хэмээдэг. 

Түүний 400 метр өндөр сүндэрлэх 2 цамхаг нь суурь хэсгээрээ орооцолдон тэврэлдсэн мэт харагдах ба хотын төв буюу оффис голдуу зонхилох барилгуудтай зэрэгцэн орших юм. Дөрвөн замын уулзвар дээр баригдах тус барилгын бас нэгэн өвөрмөц шийдэл нь гадна зогсоолд цахилгаан дугуйг нарны эрчим хүчээр цэнэглэх боломжтой нь технологийн шийдлийг бүрэн ашиглах зорилгын биелэл байлаа. 

Барилгын доод хэсэгт метроны буудалтай бөгөөд интерьер дотор заслыг ой шугуй мэт ногоон байгууламж болгон засаж, гадна талбайд явган зорчигчдод зориулсан гудамж, цэцэрлэг, парк, усан оргилуур, амралтын талбайтай б айх юм. Нийтийн тээврийн дамжин өнгөрөх нэг чиглэл болж буй утгаараа явган болон дугуйт зорчигчдын ая тухыг хангахыг илүү чухалчилжээ. 

Уг цамхаг нь нийтдээ 300 мянга орчим ажлын байрны эрэлт бий болгоно гэж тооцоолж байгаа бөгөөд энэ тоон дээр талбай түрээслэгч худалдааны төвүүдийн ажилчид нэмэгдэх юм. Кино театр, үзэсгэлэн галлерей, шоу тоглолтын заал, хурлын танхим зэрэг оффисын ажилчид болон тэдний хүүхдүүдэд ч ээлтэй орчин бий болгожээ. Мөн цамхагийн ажилчид болон оффисын түрээслэгчдэд хүүхдийн өдөр өнжүүлэх тоглоомын газрыг төлөвлөсөн байгаа нь үнэхээр цогц шийдэл болсон байна. 

Цамхагийн дээд давхаруудад байрлах цөөн тооны бизнес орон сууцнуудын хувьд эрчим хүчний хэмнэлт, технлогийн шийдлийг хослуулсан саарал ус ашиглах технологи, нарны илчээр цахилгаан үүсгэх систем, дотор агаарын температур тохируулах автомат технологи зэргийг шийдэж өгсөн байна. Мөн архитекторуудын төлөвлөж буйгаар хоёр цамхагийг хөшиг мэт шилэн материалаар бүрж байгалийн аргаар нийт байгууламж доторх агаарын урсгалын халах, хөрөх асуудлыг шийдэхээр зорьж буй юм. 

Тус цамхагийн талаар Шенжинь хотын ерөнхий архитектор хэлэхдээ “Хот доторх хот бүтээх зорилго маань биелж байна” хэмээжээ. Шенжинь хот нь чөлөөт худалдааны бүс болох Хонг Конг, Макао хотуудын хөрш учраас энэ мэт нүсэр төсөл хэрэгжүүлэх нь худалдаа үйлдвэрлэлийг хөгжүүлэх, бизнес эрхлэгчдийн харилцааг бататгах, тэлэх, өөрийн хот руу худалдаа үйлчилгээ эрхлэгчдийг татах зэрэг маш олон давуу талтай гэж үзэж байна.