Байгаль орчин, уур амьсгалын салбарт 2024 оны байдлаар нийт 182.4 сая ам.долларын санхүүжилттэй 28 төсөл хөтөлбөр хэрэгжиж байгааг Байгаль орчин, уур амьсгал өөрчлөлтийн яамнаас мэдээллээ. Харин сүүлийн 25 жилийн хугацаанд нийт 360 орчим сая ам.долларын төсөл хөтөлбөр хэрэгжүүлсэн байна. Үүнийг өнөөдрийн ханшаар тооцвол 1.2 их наяд гаруй төгрөг болж байгаа аж.

Нийт санхүүжилтийн 30 гаруй хувийг тусгай хамгаалалттай газар нутаг тэр дундаа менежментийг сайжруулах чиглэлд зарцуулжээ. Олон улсын байгууллагууд байгаль хамгаалах чиглэлд урт хугацаанд тогтвортой өгөөж өгөх төсөл хөтөлбөр санхүүжүүлэхийг илүүд үздэг байна.

Үүнээс гадна уур амьсгал өөрчлөлтийн чиглэлд нийт санхүүжилтийн 24 хувь буюу 30 орчим сая ам.доллар зарцуулсан бол ойжуулалт, цөлжилттэй тэмцэхэд санхүүжилтийн 10 хүрэхгүй хувийг зарцуулсан аж. Одоо хэрэгжиж буй төсөл хөтөлбөрүүдээс байгалийн нөөц олон янз байдлыг хамгаалах чиглэлд 12.1 сая ам.долларын өртөгтэй таван төсөл хэрэгжиж байна.

Байгаль орчны салбарын санхүүжилтийг нэмэгдүүлэхэд Төрөөс олон улсын байгууллагуудтай хамтарсан санхүүжилт хийх шаардлагатай. Мөн төслүүдийн үр ашгийг нэмэгдүүлэхэд анхаарах нь чухал байгааг салбарын сайд тодотгов.