Монгол Улсын эдийн засаг, нийгмийн үйл ажиллагааны бүх л салбарт ажиллах хүчний хомсдол бий болж олон хүндрэлтэй асуудал үүсэж байгаа ба барилга бүтээн байгуулалтын салбарт ажиллах хүчний хомсдол бодитой бий болсноор улсын төсвийн хөрөнгө оруулалттай сургууль, цэцэрлэг, эмнэлгийн барилгууд цаг хугацаандаа ашиглалтад орохгүй байх, ажиллах хүчний хомсдолоос үүссэн цалингийн өсөлтийг төрөөс тогтоосон цалингийн тариф гүйцэхээ байж аж ахуй нэгжүүд санхүүгийн алдагдалд орж, барилга орон сууцны үнийн өсөлтөд цалингийн өсөлт нөлөөлж эхэлсэн зэрэг олон бэрхшээл, сөрөг нөлөөллүүд бий болоод байна.

Монголын Барилгын Үндэсний Ассоциаци ТББ-ын зүгээс салбарын холбоодтой хамтран сүүлийн хоёр жил Гэр бүл, Хөдөлмөр, Нийгмийн хамгааллын яам, улс төрийн намуудын сонгуулийн мөрийн хөтөлбөрт санал оруулж тууштай хамтран ажилласнаар АЖИЛЛАХ ХҮЧНИЙ ШИЛЖИЛТ ХӨДӨЛГӨӨНИЙ ТУХАЙ ХУУЛЬД НЭМЭЛТ, ӨӨРЧЛӨЛТ ОРУУЛАХ ТУХАЙ хууль өргөн барьж асуудлыг шийдвэрлэх зөв шийдвэр гаргасан.

Гэтэл уг хуулийг өргөн барихаас нэг хоногийн өмнө УИХ гишүүн П.Сайнзориг тэргүүтэй гишүүд МОНГОЛ УЛСАД ХӨДӨЛМӨР ЭРХЛЭХ ГАДААД АЖИЛТНЫ ТОО, ХУВЬ ХЭМЖЭЭ ТОГТООХГҮЙ БАЙХ, ГАДААД АЖИЛТНЫ АЖЛЫН БАЙРНЫ ТӨЛБӨРӨӨС ЧӨЛӨӨЛӨХ ТУХАЙ хууль өргөн барьснаар нийгэмд маргаан дэгдээж улмаар Хөдөлмөрийн зах зээлд хамгийн хэрэгтэй байгаа хуулийг улс төрийн шоу болгож, ард түмэн зарим нэг УИХ-ын гишүүдийн оролцоотойгоор гацаах нөхцөл байдал үүсэж байна.

Ажиллах хүчний хомсдол нь эдийн засгийн өсөлтийг бууруулж, улс орны хөгжлийг сааруулах бүтээн байгуулалт, салбарын бодлогын хэрэгжилтийг унагах томоохон сөрөг нөлөөтэй бөгөөд даамжирвал АЖИЛЛАХ ХҮЧНИЙ ХЯМРАЛ үүсгэх нөхцөл байдал бодитой нүүрлэсэн цаг үе ирсэн байна.

Иймээс Гэр бүл, хөдөлмөр нийгмийн хамгааллын яамнаас өргөн барьсан АЖИЛЛАХ ХҮЧНИЙ ШИЛЖИЛТ ХӨДӨЛГӨӨНИЙ ТУХАЙ ХУУЛЬД НЭМЭЛТ, ӨӨРЧЛӨЛТ ОРУУЛАХ ТУХАЙ хуулийг дэмжин ажиллах хүчний хомсдолд орсон салбаруудын холбоод аж ахуй нэгжүүд нэгдэж үзэл бодлоо илэрхийлж нэгдэж байна.