2024 оны 10-р сард инфляц улсын хэмжээнд 7 хувь байсан бол 11-р сард 8.1 хувь болсон нь цахилгааны үнийн нэмэгдэлтэй холбоотой гэж Монголбанк үзэж байна.

Тодруулбал, Монголбанкны мөнгөний бодлогын зөвлөл өнгөрсөн долоо хоногт хуралдаж, бодлогын хүүг 10 хувь хэвээр үлдээсэн ба тус зөвлөлөөс гаргасан хоёр дахь шийдвэр нь санхүүгийн салбарт эрсдэл хуримтлагдахаас сэргийлж, тогтвортой байдлыг бэхжүүлэх зорилгоор банкнуудын төгрөгийн болон гадаад валютын заавал байлгах нөөцийн хувь хэмжээг тус бүр нэг нэгж хувиар нэмэгдүүлж, 11 болон 16 хувь болгожээ. 

Энэ талаар Монголбанкны ерөнхийлөгч, инфляц 2024 онд зорилтот түвшнээс бага зэрэг давсан ч 2026 оны эхнээс зорилтот интервалын орчимд тогтворжихоор байна. Иймд зээл, санхүүжилтийн нөхцөлийг хэт хатууруулахгүй байж, дунд хугацаанд эдийн засгийн өсөлтийг тогтвортой хадгалах зорилгоор бодлогын хүүг 10 хувьд хэвээр хадгалах шийдвэр гаргалаа.
Банкны салбарын зээлийн өсөлт эрчимжсэн. Эдгээр багц шийдвэр нь инфляцыг дунд хугацаанд зорилтот түвшинд тогтворжуулах, эдийн засаг, санхүүгийн салбарын тогтвортой байдлыг хангах зорилттой нийцнэ. Энэ шийдвэрийг гаргаснаар эдийн засаг, санхүүгийн салбарын тогтвортой байдлыг хангах зорилготой.

Банк, санхүүгийн салбар хүчирхэг байгаа. Энэ салбарт үйл ажиллагаа явуулж буй арилжааны 12 банк өөрийн хөрөнгө болон төлбөр түргэн гүйцэтгэх чадвар, зээл нэмж гаргах эх үүсвэрийн хэмжээгээрээ ч тэр маш сайн үзүүлэлттэй байна. Тэр утгаараа эдийн засгийн өсөлтөд дэмжлэг үзүүлж, санхүүгийн салбарт зуучлалын  үүргээ гүйцэтгэж чадаж байна гэлээ.

Төсөв тэлж байгаа учир цалин, тэтгэвэр тэтгэмжийн хэмжээ өссөнтэй холбогдуулан цалин, тэтгэврээ барьцаалсан зээл өсөж байна. Мөн өрхийн орлого нэмэгдсэн учир хэрэглээний зээл өссөөр байна. Арилжааны банкнуудын зээлийн хүү дунджаар 18 хувьтай байгаа ба хүү энэ хэмжээндээ хадгалагдах төлөвтэй байна гэж мэдэгдлээ.