Өмнөд Солонгосын дизайнер Ян Сынжин өнгө өнгийн хийлдэг шаарыг урлагийн бүтээл болгон хувиргах нэгэн бүтээлч, өвөрмөц технологи олсон байна.

Зөвхөн хаалттай дуудлага худалдаагаар худалддаг сонирхолтой хэлбэртэй тавилгын санаа, туршилтуудаа дизайнер анх 2015 оноос туршиж эхэлжээ. Тухайн үед түшлэггүй сандал, кофены ширээ зэрэг тавилга танилцуулж байсан бол 2020 онд илүү туршлагажиж буйдан, түшлэгтэй сандал зэрэг шинэээр хэд хэдэн тавилга бүтээсэн байна.  

Ян Сынжин бүтээлүүдээ жинхэнэ хийлдэг шаар ашиглан урладаг ба хийлсэн шааран дээр тусгай давирхайн бүтэцтэй түрхлэг найман удаа давхарлаж түрхэн долоо хоногийн турш хатааснаар тэсвэртэй гялгар бүрхүүл бий болдог байна. Мөн үүнээс гадна хэд хэдэн боловсруулалтын үе шатууд байдаг бөгөөд эцэст нь хийлдэг шаараар хийгдсэн тавилгууд насанд хүрсэн хүнийг хялбархан даах чадвартай болдог гэнэ. Жижиг хэмжээтэй ширээ бүтээхэд ойролцоогоор нэг долоо хоног зарцуулдаг бөгөөд дизайнер Ян Сынжины хэлж буйгаар эдгээр өвөрмөц шийдэлтэй сандал болон буйдангууд нэлээн хатуу мэдрэгддэг ба таны төсөөлж байгаа зөөлөн буйдангаас арай л ондоо гэнэ. Гэхдээ тус тавилгуудын гол онцлог нь тав тухтай байдал биш  харагдах дүр төрх нь юм. 

Сонирхуулахад, төстэй дизайнтай тавилгын цуглуулгыг зураач Нильс Шурманс 2014 оны Миланы дизайны долоо хоногийн хүрээнд танилцуулсан байдаг. Тэрээр сандал, ширээ болон гэрлийн цуврал цуглуулгыг олонд толилуулсан юм. Гэвч түүний бүтээлүүд амьдрал дээр ашиглахад тохиромжгүй байсан тул зөвхөн үзэсгэлэнд зориулагдан гарчээ.

Харин дизайнер Ян Сынжины урласан тавилгууд айл гэрийн интерьерт шинэ дүр төрхийг бий болгохоос гадна орчин үеийн дотоод засалтай гэрт болон оффисын интерьерт зохицож өнгө нэмэх нь гарцаагүй юм.