Швед дизайнер Густаф Уэстмены тавилгын дизайныг эрс өөрчилсөн бүтээлүүд
Тавилгын дизайн шинэ эрин үед ирснийг Швед дизайнер Густаф Уэстмены бүтээлүүдээс харж болно. Түүний бүтээлийг харсан хэн бүхэнд идчихмээр санагдаж байна гэж хэлдэг нь ч түүнд таалагддаг байна. Далайн од мэт долгиотсон хүрээтэй, хөвсгөр дэр мэт пастель өнгийн толь, буйдан, ширээ, сандал, өрөө тусгаарлагч зэрэг тавилгуудаараа алдартай. Густафын бүтээлээр тохижуулсан өрөө яг л хүүхэлдэйн киноноос, эсвэл чихрийн ертөнцөөс амилсан мэт үлгэрийн орчин мэдрүүлж чаддаг. Мөн декор бүр нь дахин давтагдашгүй, онцлог загвартай учир интерьер заслыг уйтгартай, нэгэн жигд болохоос сэргийлж чаддаг байна. Түүний бүтээлээр Tyler, the Creator, Оливиа Родриго гэхчлэн алдартнууд болон Вивид Ву, Мари Жедиг зэрэг загварын инфлюенсерүүд гэрийнхээ дотоод тохижилтыг хийж байна.
Тренд тогтоогч дизайнер Густаф Уэстмен
Густаф 2020 онд Шведийн стилист Hanna MW-тэй хамтран тааз шүргэм өндөр дугуйрсан хүрээтэй толь гаргаснаар брэндийн нэр олон нийтэд танигдаж эхэлсэн юм. Улмаар дугуйрсан хүрээтэй толь тренд болж TikTok дээр гэрийн нөхцөлд гар аргаар тус загварыг дуурайлган хийхийг заасан бичлэгүүд олширч эхэлсэн билээ. Үүний талаар Густаф “Хүмүүс заавал надаас худалдан авалт хийхгүйгээр миний бүтээлийн нэг хэсэг болж байгаа нь надад үнэхээр таатай байна. Тэд уг стилийг түгээж байна” хэмээжээ.
Тэрээр хар зургийн дэвтрээ хаа сайгүй авч явдаг
Уэстмены бага нас Шведийн Долхефуш хотод өнгөрсөн ба багаасаа зураг зурах дуртай, үргэлж харандаа зургийн дэвтэрээ авч явдаг, бүтээлч санаа орж ирсэн үед тэр даруйд нь буулгадаг байжээ. Улмаар барилгын дизайн гаргах сонирхолдоо хөтлөгдөн Готенбургд архитектурын мэргэжил эзэмшсэн байна. Мэргэжлээсээ салбарлан тавилга урладаг болсон бөгөөд төд удалгүй Шведийн алдартай PR мэргэжилтэн Даниел Редиэтын оффисыг сэргээн тохижуулах анхны томоохон ажлын саналаа авч байжээ.
Тэрбээр тавилгаа урлахдаа загварын салбараас ихээхэн урам зориг, шинэ санаа авдаг бөгөөд ирээдүйд өөрийн дуртай Loewe, Jacquemus, Cecilie Bahnsen брэндтэй хамтран бүтээл гаргахыг хүсдэг талаараа хэлдэг.
Түүний зүгээс өгч буй зөвлөгөө,
"Бүү хослуул! Өнгө будаг, хээ угалзыг өвөрмөц байдлаар хоршуулж контраст үүсгэ. Шинэ тавилгыг хуучинтай хослуул. Өөрийгөө жаргалтай болгох бүх зүйлс хийгээрэй. "
Уэстмены тавилгыг харсан хүмүүс “Идчихмээр санагдаж байна” гэж түгээмэл хэлдэг бөгөөд “Энэ бол миний сонсох дуртай хамгийн таатай магтаал” гэж дизайнер хэлжээ. Тэгвэл хүрэх, харах таашаалаас гадна амтлах мэдрэмж өдөөж чаддаг түүний тавилгуудтай танилцъя.
Дарсны ширээ
Энэ бол дөрвөн хөл, нэг тавцангаас бүрдэх энгийн ширээ биш, харин С хэлбэрийн мушгиа багануудыг бөөрөөр нь нийлүүлэн дарсанд зориулж тусгайлан бүтээсэн декор юм. Тус ширээг худалдан авах хүсэлтэй интерьер сонирхогчдын тоо нэмэгдсээр байгаа бөгөөд 1800 еврогоор зарагддаг тус ширээг авах хүсэлтэй 2,000 гаруй хүн бүртгүүлсэн байгаа гэнэ.
Цайны аяга
“Chunky Cup” буюу том аяга нь амралтын өдрийн өглөө орондоо цайгаа уух дуртай барууны соёлоос улбаатай хэмээн Уэстен тайлбарласан ба аяганы суурь таваг нь хонхор бүхий хэлбэртэй учир орон дээр тавьсан ч асгарахааргүй аж.
Ном болон сэтгүүлийн тавиур
Томруулсан пүрш шиг харагдах энэхүү декор нь ном, сэтгүүл тавих зориулалттай. Минимал, модерн загвартайн сацуу тод өнгөний сонголтууд нь ретро мэдрэмж төрүүлнэ.
Зөөлөн чихэр шиг буйдан
2400 еврогоор зарагддаг хөвсгөр чихэр мэт буйдан нь худалдаанд гарсан цагаасаа хамгийн хурдан зарагдаж дууссан тул авахыг хүссэн хүмүүс хүлээлгийн жагсаалтад нэрээ оруулах л арга үлджээ.
Гэрлийн бүрхүүл
Интерьер тохижилт хийхэд гэрэлтүүлэг маш чухал үүрэг гүйцэтгэдэг. Өнөө л нэг болор гэрлийн бүрхүүлээс залхсан хүмүүст энэхүү декор ухаалаг сонголт болж гэрт тань өнгө нэмэх нь гарцаагүй.
Уншигчдын бичсэн сэтгэгдэлд barilga.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү.