Хүмүүс өдөр тутамдаа ажил, харилцаанаас стресс мэдэрч байдаг бөгөөд гэрийн тохижилт ч мөн үүний бас нэгэн шалтгаан болдог гэдгийг тэр бүр мэддэггүй. Бидний хувьд гэр бол хамгийн тав тухтай, хувийн орон зай байдаг учраас аль болох цэвэр цэмцгэр орчинд тайван амгалан, тухтай байх нь чухал юм. Тиймээс сэтгэл зүйн мэргэжилтэн, стилист Амбер Данфорын хэлсэн таныг сөрөг стресст автуулах магадлалтай таван төрлийн интерьер дизайны тохижилтуудаас анхааралдаа авч, гэрээ хэрхэн илүү тав тухтай болгон өөрчилж болохыг доороос уншина уу.

1. Гэрэлтүүлэг хангалтгүй байх

Стилист Амбер Данфордын зөвлөснөөр гэртээ яг тохирсон гэрэл сонгох нь их чухал гэнэ. Байгалийн гэрэл бидний сэтгэл санааг сэргээж өгдөг төдийгүй цонхоор хангалттай гэрэл орж ирэхгүй байх нь хүний сэтгэл санаанд сөргөөр нөлөөлж, улмаар сэтгэл гутралд орох магадлалтай. Мөн нэгэн сонирхолтой зүйл хуваалцахад, модны навчсын завсраар тусдаг нарны гэрэл шиг цоохор гэрэл нь хүнд байгалиасаа таатай мэдрэмж төрүүлдэг учир илүү тухтай орчин бүрдүүлэхийг хүсвэл гэртээ ийм төрлийн гэрлийн бүрхүүл сонгож авч болох юм. Эсвэл цонхныхоо эсрэг талд толь байрлуулбал цонхны тусгал толинд ойж орчин илүү цэлгэр, гэгээлэг харагдах юм.

2. Олон төрлийн өнгө холилдох

Гэрээ тохижуулахдаа хэтэрхий олон өнгө холих нь таныг стрессд оруулах бас нэгэн шалтгаан болдог байна. Олон төрлийн өнгөтэй дотоод засал нь хүнд эрч хүч нэмж, сэргээх нөлөөтэй ч удаан хугацаанд ийм орчинд байвал сэтгэл зовних болон стрессдэх үндэс болдог гэнэ. Тиймээс тод өнгө хэрэглэхдээ тунг нь тааруулж, мэдрэмжтэй ашиглах нь их чухал. Өнгөний харьцааг байгалийн өнгөний зохицлоос жишээ авч хийх хэрэгтэй. Тухайлбал байгальд хөрслөг буюу завсрын зөөлөн өнгүүд голчилдог бол тод өнгөтэй цэцэг, ургамлууд харьцангуй бага хувь эзэлдэг.

3. Хэтэрхий цулгуй байх

Хэтэрхий их цагаан өнгө хэрэглэх нь мөн л гэрийг тухгүй болгодог. Ихэнх хүн байгалийн өнгөний зохицол харж тайвшрдаг бол цулгуй цагаан өнгө үүний эсрэг нөлөөтэй. Цав цагаан өнгийн дотоод засалтай байх үед байнга цэвэрхэн цагаанаар нь хадгалах шаардлага үүсэж энэ нь хүний тархинд тодорхой хэмжээгээр дарамт учруулдаг гэнэ. Харин үүний оронд beige өнгө сонговол цагаанаар нь байлгах гэж санаа зовохгүйгээс гадна цайвар өнгө учир өрөөнд гэрэл гэгээ нэмнэ. Хэрвээ үнэхээр цагаан ханатай байхыг хүсвэл завсрын зөөлөн өнгүүд болох бор шаргал, саарал, beige/крем/ өнгүүдийг акцент болгон нэмж оруулж өгч болох юм.

4. Өөр өөр төрлийн хээ, принтүүдийг холих

Тод өнгийн олон төрлийн хээ нүд ядраахаас гадна хоорондоо зохицоогүй үед өрөөг эмх замбараагүй харагдуулдаг. Өөр төрлийн принтүүд ашиглахыг хүсвэл маш мэдрэмжтэй хослуулах хэрэгтэй. Жишээлбэл "Swiss dot" хээг том ургамлын принтүүдтэй хоршуулах нь тэнцвэртэй атлаа сонирхолтой интерьерийн шийдэл болох юм.

5. Эмх замбараагүй байх

Өрөө хэт олон чимэглэл акссесур, эд хогшилтой байх нь таныг стресстүүлж тавгүйтүүлж болох юм. Учир нь хоорондоо зохицоогүй эд хогшил өрөөг давчуу, зай талбай багатай, хөглөрсөн мэт санагдаж болох юм.   “Амьдралыг өөрчлөх эмх цэгц ба түүний гайхамшигт ид шид” номын зохиолч Мари Кондогийн хэлснээр үнэхээр л цэвэрхэн, эмх цэгцтэй байх нь хүнд аз жаргалыг бэлэглэдэг гэнэ. Хүний анхаарал ихэвчлэн энд тэнд харагдаж буй хүүхдийн тоглоом, бичиг цаас гэх мэт эмх замбараагүй эд зүйлс дээр төвлөрдөг ба энэ нь бидний анхаарлыг сарниулж, бачимдах таагүй мэдрэмжийг төрүүлдэг байна.