УИХ-ын чуулганы нэгдсэн хуралдаанаар Монгол Улсын 2025 оны төсвийн тухай, Нийгмийн даатгалын сангийн 2025 оны төсвийн тухай хуульд өөрчлөлт оруулах тухай, Эрүүл мэндийн даатгалын сангийн 2025 оны төсвийн тухай хуульд өөрчлөлт оруулах тухай хуулийн төслүүдийн эцсийн хэлэлцүүлэг хийн баталлаа.

Тус хуулийн төслүүдийг Засгийн газар энэ сарын 4-нд өргөн мэдүүлж, алдагдал ихтэй, үр ашиггүй зардал өндөр байгааг бууруулахаар МУ-ын Ерөнхийлөгч 2025 оны төсвийн тухай хуульд бүхэлд нь хориг тавьсан учир Засгийн Газар ирэх 2025 оны төсвийг хоёр дахь удаагаа өргөн барьж, батлууллаа. 

 Засгийн газар 2025 оны төсвийн хуулийн дахин өргөн барихдаа Монгол Улсын Ерөнхийлөгчийн тавьсан хоригт нийцүүлж, алдагдалгүй төсөв өргөн барих бодлого барьсан. Энэ хүрээнд төсвийн зардлыг 2.3 их наяд төгрөгөөр, орлогыг 393 тэрбум төгрөгөөр бууруулахаар төсөлд тусгасан. Төсвийн орлогыг 33 их наяд төгрөгөөр тооцсон юм.

Урсгал зардлаас 800 тэрбум, хөрөнгийн зардлаас 800 тэрбум, гадаад зээлийн ашиглалтын зардлаас 700 тэрбум төгрөг тус тус танахаар тооцож, урсгал зардлаас 800 тэрбум төгрөг хэмнэхийн тулд нэг удаа хойшлуулж болох дараах зардлуудыг бууруулахаар төлөвлөжээ. Үүнд,

• Тавилга авах зардлыг 100 хувь
• Багаж, техник хэрэгсэл, бичиг хэргийн зардлыг 50 хувь
• Дотоод, гадаад томилолтын зардал 50 хувь /Өндөр түвшний айлчлал, өндөр түлшний зочин төлөөлөгч хүлээн авахаас бусад/
• Тээвэр шатахууны зардал 50 хувь /ЭМ, Тусгай чиг үүргийн байгууллагаас бусад/
• Хичээл үйлдвэрлэлийн дадлагын зардлыг 50 хувь бууруулан баталсан. /ЭМС, БС, ХЗДХС, БХС-аас бусад/
• Мөн УИХ-ын төсвийн ажлын хэсэг Засгийн газраас өргөн барьсан төсвийн төсөл дээр ажиллаад 80 тэрбум төгрөгийн тэвчиж болох зардлаас хасаж шаардлагатай салбар руу шилжүүлсэн юм.