Дизайнерууд ямар гэрт амьдардаг бол? Өвөрмөц содон хийц, зай талбайг ухаалаг ашигласан байдал, тав тух бүрэн хангасан гээд тоочоод барамгүй биз. Тэгвэл Лос-Анжелес хотод амьдардаг интерьер дизайнер, уран бүтээлч, Dazey LA брэндийн үүсгэн байгуулагч Дани Нагелийн гэрт зочилъё.Дани Нагел Лос-Анжелес хотын Бичвуд Каньон дахь гэрээ Винтэж болон ар-деко хэв маягаар тохижуулсан ба интерьер заслыг өөрөө гаргажээ. Зураг төсөл гаргах эхний шатнаас эхлээд л дуусах хүртлээ Pinterest тавцанг ашигласан байна. Түүний Калифорнийн Палм-Спрингс дахь эдлэн газрын байшин улбар шар, шар, улаан зэрэг тод өнгөнүүд болон бохо-шик хэв маяг зонхилох ба Бичвуд Каньон дахь байшингаас нь тэс өөр уур амьсгал мэдрүүлэх аж.

Тэрбээр, "Миний уран бүтээлүүд өмнө нь 1970-аад оны Калифорнийг санагдуулам байсан бол одоо 1990-ээд оны уур амьсгал болон ар-деко хэв маягийн нэгдэл мэт мэдрэгдэх болсон. Тиймээс интерьердээ ч бас уг хэв маягийг шингээсэн" хэмээн ярьсан байна.

Усан ягаан өнгийн хамба хилэн буйдан, ногоон ургамал, гар шиг харагдах сандал, ар-деко загвартай чийдэн зэргээр чимэглэсэн зочны өрөөнөөс тайван, намуун уур амьсгал мэдрэгдэх бол гүн хөх буйдан, хананд өлгөсөн уран зургууд ба сүлжмэл декор зэрэг завсрын өнгө давамгайлах түүний ажлын өрөө эрч хүч бэлэглэх мэт тохижилттой болжээ. Харин хоолны өрөө нь цэлгэр орчинтой төдийгүй тагт руу шууд гардаг тул тэрбээр ихэнх цагаа тагтан дээрээ өнгөрүүлэх дуртай гэнэ.