Хэрэглээний үнийн индекс улсын хэмжээнд  11 дүгээр сард 8.1 хувь болсон нь өмнөх оны мөн үеийн түвшинтэй харьцуулахад 0.5 нэгж хувиар доогуур байна. Хэдий тийм боловч Төв банкны зорилтот түвшнээс 0.1 нэгж хувиар дээгүүр үзүүлэлт боллоо.

Инфляц сарын дүнгээр 1.7 хувьтай гарсан нь сүүлийн 26 сарын хугацаан дахь хамгийн өндөр өсөлт болж байна. 11 дүгээр сард цахилгаан эрчим хүчний үнийг айл өрх, аж ахуйн нэгжүүдэд ялгаатай байдлаар нэмсэн. Монголбанкны тооцооллоор эрчим хүчний үнийг 30 хувиар нэмэхэд инфляц 0.7 хувиар нэмэгдэх төсөөлөлттэй байгаагаа илэрхийлж байсан юм.

Сарын инфляц 1.7 хувьтай гарахад орон сууц, ус, цахилгаан, хийн болон бусад түлшний үнэ дүнгээрээ 13.9 хувь өссөн нь голлон нөлөөлжээ.

Хэрэглээний үнийн индексийн жилийн 8.1 хувийн 2.3 нэгж хувь нь импортын бараа, бүтээгдэхүүний нөлөөлөл болохыг Үндэсний статистикийн хороо мэдээллээ. Үүнийг өмнөх хоёр  жилийн мөн үетэй харьцуулахад импортын бараа, бүтээгдэхүүний инфляц дахь нөлөөлөл буурсан үзүүлэлттэй байна. Мөн хүнсний бараа, ундаа ус болон орон сууц, ус, цахилгаан, түлшний үнэ тус бүр 26 хувиар,  хувцас бөс бараа 12.5 хувиар, боловсролын үйлчилгээ 11.2 хувиар тус тус нь өссөн нь нөлөөлжээ.

Харин Улаанбаатар хотын хэмжээнд инфляц жилийн 7.9 хувь болж эрчимжихэд сарын инфляц мөн л 1.7 хувьтай гарсан нь нөлөөллөө.

Сүүлд Дэлхийн банкны тайланд 2024 оны эцэст Монгол Улсын инфляц долоон хувьтай байхаар байгааг мэдээлж байсан юм. Харин 2025 онд найман хувь, 2026-2027 онд 8.5 хувь орчимд байх төсөөлөл гаргаад байна. Мөн ОУВС-ийн зүгээс 2024 оны сүүлийн хагаст инфляц үргэлжлэн эрчимжиж, 2026 он хүртэл зорилтот түвшнээс дээгүүр байх төлөвтэйг онцолж байсан юм.