Монголын Барилгын Үндэсний Ассоциаци (МБҮА) ТББ нь 2024.03-р сард Бодь Интернэшнл ХХК (Бодь групп)-аас олон нийтийн дунд зарласан нийгмийн хариуцлагын төсөл, хөтөлбөр сонгон шалгаруулалтад оролцож, “ДУЛААН БАЙШИН, ТУХТАЙ АМЬДРАЛ” төслөөрөө шалгарсан. Тус группийн бүрэлдэхүүнд багтдаг Бодь Пропертийз ХХК-ийн санхүүжилтээр тодорхой шалгуур хангаж сонгогдсон Улаанбаатар хотын гэр хорооллын 2 өрхийн байшинг бүтэн дулаалахаар боллоо. Төслийг 2024.11.12-ноос эхлэн хэрэгжүүлэхээр тохиролцож, Бодь Пропертийз ХХК-ийн гүйцэтгэх захирал Б.Тэгшбаяр, МБҮА ТББ-ын гүйцэтгэх захирал Г.Батсүх нар хамтран ажиллах гэрээ байгууллаа. 

“ДУЛААН БАЙШИН, ТУХТАЙ АМЬДРАЛ” төслийн хүрээнд байшингийн хана, дээвэр, суурь дулаалж, цонх солих юм.  

Мөн түүнчлэн манай байгууллагын хамтран хэрэгжүүлдэг Европын холбооны СВИЧ-Эшиа II хөтөлбөрийн санхүүжилттэй "Дулаан шийдэл-II" төслийн шугамаар дээрх дулаалга хийлгэхээр сонгогдсон 2 айл өрхийн байшинд дулааны камертай хэмжилт хийж, өвлийн хэмжилтийн болон сэргээгдэх эрчим хүчний тоног төхөөрөмж суурилуулж, үр дүнг хэмжихийг зорьж байна.  

“ДУЛААН БАЙШИН, ТУХТАЙ АМЬДРАЛ” төслийн зорилго нь дулаалга хийлгэсэн айл өрхүүдэд дулааны тав тухыг нэмэгдүүлэх, гадна болон дотоод агаарын чанарыг сайжруулахаас гадна Монгол Улсын холбогдох хууль, тогтоомж, дүрэм, журам, норм, стандартад нийцсэн/батлагдсан зураг төслийн дагуу байшин, амины орон сууц барьдаг байхыг барилгын салбартаа хэвшүүлэх, барилгын эрчим хүчний хэмнэлт, дулаалгын ач холбогдлын талаарх олон нийтийн мэдлэг, мэдээллийг дээшлүүлэх юм.  

Бодь Пропертийз ХХК нь 1997 онд байгуулагдсан бөгөөд үл хөдлөх хөрөнгө, барилга угсралтын ажлын төлөвлөлт, санхүүжилт, хэрэгжилтийг иж бүрнээр нь гүйцэтгэгч байгууллага юм. Тус компани улс орныхоо бүтээн байгуулалт, хөрөнгө оруулалт, тохижилтын ажилд идэвхтэй оролцож, олон төслийг амжилттай хэрэгжүүлээд байна. 

Эх сурвалж: Монголын Барилгын Үндэсний Ассоциаци