Барилгын өртгийн ерөнхий индекс (2015=100) 2024 оны гуравдугаар улиралд 261.6 болж, барилгын өртөг өмнөх оны мөн үеэс 4.5 хувь, өмнөх оны эцсээс 5.1 хувь, өмнөх улирлаас 0.4 хувиар тус тус өссөн байна.

Тодруулбал, Үндэсний статистикийн хорооноос гаргасан мэдээллээр Орон сууцны барилгын өртгийн индекс (2015=100) 2024 оны 3 дугаар улиралд 316.1 болж, өртөг нь өмнөх оны мөн үеэс 9.2 хувь, өмнөх оны эцсээс 8.7 хувиар өссөн бол өмнөх улирлаас 0.1 хувиар буурсан байна. Орон сууцны барилгын өртөг өмнөх оны мөн үеэс 9.2 хувиар өсөхөд цалингийн зардал 26.4 хувь, машин механизмын түрээсийн зардал 21.0 хувиар өссөн нь голлон нөлөөлсөн байна. 

Улаанбаатар хотод 800 орчим тэрбум төгрөгийн өртөг бүхий 45 мянга орчим түрээсийн орон сууцны эрэлт хэрэгцээ бий. Үндэсний статистикийн хорооны тайланг харвал есдүгээр сарын байдлаар шинэ орон сууцны нэг м.кв-ийн үнэ дунджаар 4.39 сая төгрөг байгаа нь өмнөх оны мөн үеэс 12.2 хувиар өссөн үзүүлэлт юм. 

2024 оны III улирлын байдлаар түрээсийн орон сууцны үнийн индекс 1.448 нэгж байгаа нь өмнөх оны мөн үетэй харьцуулахад 1.30 нэгж хувиар, өмнөх улирлаас 2.63 нэгж хувиар өссөн үзүүлэлт болж байна.

Шинэ орон сууцны үнэ ирэх оны энэ үед бараг 10 орчим хувиар өсөх төлөвтэй байгааг “Тэнхлэг зууч” компани мэдээлсэн ба Ипотекийн зээлийн нөлөө байгаагаас гадна тээвэр логистикийн зардал өссөн нь үнийн өсөлтөд голлон нөлөөлж байгаа аж.