Монгол Улсад барилгын салбар үүсч хөгжсөний 85 жилийн түүхт ойд зориулан Улс, аймаг, цэргийн алдар цолтой хүчит 128 бөхийн барилдааныг зохион байгуулах гэж байна. Энэхүү салбарын ойд зориулсан хүчит бөхийн барилдааныг 2 дахь удаагаа зохион байгуулж байгаа бөгөөд нээлтийн ажиллагаа нь 09-р сарын 2-ны 15 цагт Монгол бөхийн өргөөнд зохиогдох гэж байна.

    Тус бөхийн барилдааныг ЗТБХБЯ, ГХБГЗЗГ, Барилга.МН БЗМТөв, МБХ, МБҮЭХ гээд төрийн болон төрийн бус байгууллагууд хамтран зохион байгуулж байгаа бөгөөд түрүү бөхийг 5 сая төгрөг, үзүүрлэсэн бөхийг 2 сая 500 мянган төгрөгийн бай шагналаар шагнаж, урамшуулахаар болжээ. Өнгөрсөн жил барилгын салбар үүсч хөгжсөний 84 жилийн ойн баярын бөхийн барилдаанд хүчит 128 бөх хүч бяраа сорьсоноос Архангай аймгийн Хашаат сумын харьяат, Уулын Баяжуулах Эрдэнэт үйлдвэрийн бөх Улсын заан Ч.Санжаадамба түрүүлж, Говь-Алтай аймгийн Чандмань сумын уугуул “Хүч” спорт хороо, “Туушин” компанийн бөх Улсын гарьд Н.Ганбаатар үзүүрлэж байсан. Харин Их шөвөгт Булган аймгийн Бүрэгхангай сумын харьяат ах дүү заанууд шалгарч байсан билээ.

    Энэ жилийн хүчит бөхийн барилдааны ерөнхий ивээн тэтгэгчээр үүсэн байгуулагдсаныхаа 5 жилийн ойг тэмдэглэж байгаа “Их Үйлсийн Эрэлд” ХХК ажиллаж байна. Барилгын салбарынхан болон бөхөд хорхойтой хэн бүхнийг БЯР ХҮЧ, БАЯР НЬ ТЭГШИРСЭН ӨДРҮҮДИЙН барилдаанд ирж хийморь юугаан сэргээхийг урьж байна.