Дэлхийн алдарт архитектор Заха Хадидын амьдралынхаа сүүлийн мөчүүдэд цаасан дээр үлдээсэн бүтээлүүд нь биежиж дэлхийн өнцөг булан бүрт сүндэрлэсээр байгаа бөгөөд үүний нэгэн тод жишээ бол Масаричка барилга юм. Жилдээ таван сая орчим жуулчин хүлээн авдаг Европын хамгийн том хотуудын нэг гэдгээрээ алдартай Чех улсын  Прага хотод сүндэрлэсэн уг барилга нь  2023 онд баригдсан бөгөөд орчин үеийн архитектурын хөгжилд томоохон түлхэц болсон бүтээлүүдийн нэг юм. Уг барилгын төсөл нь 2014 онд хэрэгжиж эхэлсэн боловч олон саад бэрхшээлээс шалтгаалан гүйцэтгэл удааширч энэ оны зургаадугаар сард албан ёсоор нээлтээ хийгээд байна. 

Уг хотод олон хаад, хатдын булшийг хадгалсан алтан бүрмэл бүхий сүм хийдүүд, гялалзсан шаргал, шовх үзүүрт оройтой гайхалтай түүхэн барилгуудтай. Тийм ч учраас тус улсын энэхүү гайхалтай түүхэн соёлыг Масаричка барилгын архитектур дизайнд гүн шингээж өгсөн юм. Үүний тод илрэл нь алтлаг фасад түүнийг бүрхсэн шовх оройнууд юм.

Барилгын зүүн жигүүр долоон давхар, баруун жигүүр есөн давхар өндөртэй. Барилгын гаднах эгц өндөр сэрвээ мэт дизайн нь давхрын тоо буурах тусам намсаж урсаж буй мэт харагдахаар төлөвлөсөн байна. 

Масаричка барилга нь “Муруйн хатан хаан” хэмээгддэг архитектор Заха Хадидын гар бие оролцсон сүүлчийн барилгуудын нэг бөгөөд архитекторын нэрийн хуудас болсон органик хэв маягийг дотор шийдэлдээ ашигласан байна.  

Тус барилга нь 28,000 метр хавтгай дөрвөлжин талбайг хамарсан оффис болон жижиглэн худалдааны төвөөс бүрдэх бөгөөд дотор заслыг Corian компани хийж гүйцэтгэжээ. Тэд лобби хэсэгт онцгой анхаарч, сонирхолтой шийдлийг бий болгож чадсан байна. Өөрөөр хэлбэл, хамгийн сайхан зохицдог хэр нь ялгаатай харагдахаар өнгийг ашигласан ба байгальд ээлтэй материалыг өвөрмөц хэлбэр, бүтэцтэй болгохын тулд тодорхой нөхцөлд хэлбэржүүлж 3D хэлбэрээр цутгаж, орон зайг бүхэлд нь 3D хэлбэрээр дүрсэлсэн байна. Түүнчлэн орон зайг сонирхолтойгоор мэдрүүлэх LED гэрэлтүүлэг ашиглажээ.

Уг барилга нь гоо зүйн үзэмжээс гадна олон улсад хүлээн зөвшөөрөгдсөн эрчим хүчний хэмнэлтийн LEED Platinum гэрчилгээ эзэмшдэг. Энэхүү гэрчилгээ нь АНУ-ын Ногоон барилгын зөвлөлөөс (USGBC) ногоон байгууламжийн салбарт олон улсын тогтвортой байдал, төгс шийдлийг сурталчлах зорилгоор тогтоосон үнэлгээний систем юм. Тус барилга нь сэргээгдэх эрчим хүч, усны хэмнэлт, ногоон байгууламжаас гадна дотор орчны чанарын жишиг шийдэлд нийцжээ. Мөн барилгын хойд талд нь байрлах На Флоренси гудамжны модтой өргөн чөлөөг услах, дээврийн цэцэрлэгийг арчлахдаа борооны ус цуглуулах технологи ашигласан бөгөөд усны хэрэглээг төдий чинээ багасгаж чадсан юм. 

Уг барилгад ашигласан материалууд нь RIBA 2030 Уур амьсгалын сорилтоор тогтоосон хүлэмжийн хийн ялгаралыг багасгах зорилтод нийцүүлэн дахин боловсруулсан материал ашигласнаараа онцлог юм. 

Масаричка барилгын  план Барилгын баруун болон зүүн талаас харагдах байдал

Барилгын хажуугийн хөндлөн хэсгээс харагдах байдал 

Үүдний угтах хэсэг

Энэхүү барилгыг барьсан талбай өмнө нь автомашины зогсоол байсан учир олон нийтийн тээврийн хэрэгслээр зорчих нөхцөлийг бүрдүүлж, хотын төв вокзалыг шинэчлэн барьсан байна.