Иргэд орон сууцныхаа балконыг /тагт/ ихэвчлэн агуулах эсвэл бүр амбаар болгон ашигладаг. Тагтны ашигтай орон зайг зөвхөн энэ зорилгоор ашиглах нь зохимжгүй бөгөөд дизайны хувьд илүү сонирхол татахуйц, гэр бүлийнхэнтэйгээ  амарч, чөлөөт цагаа өнгөрүүлэх  талбай болгохын тулд дулаалга, өнгөлгөөний түгээмэл материалыг ашиглан өөрсдийн гараар өөрчилж, цэвэрхэн, тав тухтай болгож болно. Тагтыг  ингэж өөрчлөснөөр өрөөний нийт ашигтай талбай нэмэгдэж, жижиг өрөө болж, дулааныг сайн тусгаарлаж, орон сууцны өрөө тасалгаанд тоос шороо орохоос хамгаална.  

Тагтыг өөрчлөн зочны өрөөнд байгаа юм шиг тав тухтай, саруулхан  болгохын тулд дараах ажлуудыг хийх хэрэгтэй.

    ●    Давхар шилтэй цонх суурилуулах

    ●    Гадаргуугийн бэлтгэл хийх. Үүнд: хана, шалны завсар, ан цавыг битүүмжлэх 

    ●    Нимгэн тусгаарлагч материалыг хана,таазанд хадах

    ●    Өнгөлгөөг хадах модон болон металл каркас угсрах

    ●    Дулаалгын материалыг суурилуулах

    ●    Тааз, хананы өнгөлгөө хийх. 

    ●    Шалны ус үл нэвтрэх давхарга ба дулаалга, өнгөлгөөг хийх

    1.    Гадаргуугийн бэлтгэл

Аливаа өнгөлгөө гадаргуугийн бэлтгэл ажлаас  эхлэх ба өнгөлгөөний чанар бэлтгэл үеэс ихээхэн хамаарна. Энэ үе шатанд юу хийх вэ?

    1.    Эхлээд та тагтнаас шаардлагагүй бүх зүйлийг гаргах хэрэгтэй.

    2.    Тагтны дотор талын хана, тааз, шалны гадаргууг цэвэрлэж, тоос, шорооноос салгаж, сул хөрсийг буулгах

    3.    Тагтны хана, таазны хагарал, завсарт нөхөөс хийх. Гадаргуугийн хагарал, завсраар дамжин чийг, тоос шороо нэвтэрч, улмаар дулаалга, өнгөлгөөний материалын чанар муудаж, хөгц, мөөгөнцөр үүсэх шалтгаан болдог.  Үүнд ус чийгэнд тэсвэртэй хар замаскыг хэрэглэж болно. Хэрэв тагтны гадаргуу завсар ихтэй бол ханыг битүүмжлэхээс өмнө хөөсөөр дүүргэх хэрэгтэй. Хэрэв завсар нь босоо байвал тэдгээрийг полиуретан хөөсөөр битүүмжилж, илүүдлийг нь цаасны хутгаар таслана. Цонхны нүхний дагуух хагарлыг зуурмагаар биш хөөсөөр битүүмжлэх нь дээр.

Бүх том хагарлыг зайлшгүй битүүмжлэх шаардлагатай. 

2.  Гадаргууд хөрсжүүлэг хийх 

Дараагийн үе шат нь хана, таазны гадаргууг бүхэлд нь хөрсжүүлэх явдал юм. Тагтны гадаргууг бат бэх болгох, хөгц мөөгөнцөрөөс тусгаарлах зорилгоор хөрсжүүлэг үеийг хийнэ. Зориулалтын хөрсжүүлэг, праймер, 107 цавууг шингэлж хана таазны хуурай, цэвэрхэн гадаргууд өнхрүүшээр түрхэх, хязгаарлагдмал орчинд багс ашиглаж, хоёр үеэр хийвэл тохиромжтой, эхний үеийг хатсаны дараа хоёр дахь үеийг хийнэ. 

 Хөрсжүүлэг нь тагтны гадаргууг бат бэх болгохоос гадна ариутгах нөлөө үзүүлнэ.

3.   Нимгэн тусгаарлагчаар бүрэх

Бэлтгэсэн гадаргуу дээр полиэтилен хөөсөн нимгэн тусгаарлагчийг "шингэн хадаас"-р хадна.

Тагтны дулаан тусгаарлалтыг сайжруулахын тулд бүх гадаргууг тугалган бүрхүүлтэй полиэтилен хөөсөөр хучдаг 

Хүйтэн гүүр үүсэхээс сэргийлэхийн тулд өөр хооронд нь скочоор наасан байна. 

4. Өнгөлгөөг бэхлэх каркас угсрах

Бэхэлгээг та хананаас эхлэж болно. Ашигласан материалаас хамааран бэхэлгээ нь металл эсвэл модон байж болно. 

    ●    Тагтныхаа хана, таазны урт, өргөнийг хэмжиж, ямар хэмжээтэй брус орохыг тооцно.

    ●    Дулаан тусгаарлах материалтай ижил хэмжээтэй каркас зангидах нь тохиромжтой. Каркасын босоо чиглэлд 4×5см хэмжээтэй, хэвтээд 2 × 5 хэмжээтэй брусыг цохилттой дрил ашиглан хананд тэлэгчтэй шрупээр тогтооно. 

    ●    Босоо тулгуурыг нэг метр, хэвтээг  50 см-ийн алхамаар байрлуулна.

    ●    Та шалнаас 1 см зайд хэвтээ тэнхлэг суурилуулах хэрэгтэй. Энэ зайг полиуретан хөөсөөр дүүргэсэн байх ёстой бөгөөд үүний зэрэгцээ угсралтын ажил зөв хийгдсэн эсэхийг баталгаажуулахад хэрэглэнэ. 

    ●    Бэхэлгээний төмөр элемент нь 6х40 мм хэмжээтэй, хоорондох зай нь 30 см орчим байх ёстой.

Нимгэн тусгаарлагч дээр бэхэлгээг суурилуулах 

5. Дулаалгын материалаа суурилуулах

Тагтны ажлын чухал алхам бол дулаалгын материалаа суурилуулах юм. Дулаалгын материалд хөөсөнцөр, чулуун хөвөн хавтанг өргөнөөр ашигладаг.  Ноосон дулаалга ашиглавал уян хатан, амархан шахагддаг тул модон каркасын хооронд амархан суурилуулахад тохиромжтой. Харин хөөсөнцөр ашиглахад зай завсар үүсдэг тул полиуретан хөөсөөр битүүмжлэх хэрэгтэй. Хөөсөнцөр нь гал дэмждэггүй, бат бэх сайтай байх хэрэгтэй. 

Хөөсөнцөрийг дулаан тусгаарлагч болгон өргөнөөр ашиглаж байна. 

6. Дотор өнгөлгөө хийх

Тагтны дотор өнгөлгөөнд мод, PVC хавтан, хуурай хийцийг өргөнөөр ашиглаж байна. Хамгийн тохиромжтой, эрүүл, бат бэх сайтай, үзэмжтэй өнгөлгөө бол байгалийн мод юм. Өнгөлгөөнд зориулалтын, үйлдвэрээс боловсруулсан ховилтой банз, рейк модыг  ашиглавал тохиромжтой байдаг. 

Байгалийн модон доторлогоо нь удаан хугацааны туршид чанараа алдахгүй

Модон өнгөлгөөг тагтныхаа таазнаас эхэлвэл тохиромжтой. Тааз, хананыхаа хэмжээсийн дагуу модон материалаа зүсч бэлтгэнэ. Угсрах модон самбар тус бүрээ сайн хэмжиж үзээрэй, таазанд уртын хэмжээгээр харилцан адилгүй ордог. Эхний самбарыг булангаас эхлэж угсрахдаа булангийн хазайлтыг сайн шалгаж, тэгш ус ашиглан шугам татах хэрэгтэй. Жижиг хадаас эсвэл шруп, бэхэлгээний далд төмрийг ашиглан модон самбаруудаа байрлуулаарай. Ховилтой модон самбарууд нь бэхэлгээний далд төмөр, ховилоороо бэхлэгддэг тул зай завсар гарахгүй нягт, үзэмжтэй болдог. 

Таазнаас бүрэх ажлыг эхлүүлэх нь илүү тохиромжтой байдаг. 

Дараа нь ханаа өнгөлнө. Мөн ханын гадаргууг маш сайн хэмжиж, түүний хэмжээгээр модон самбаруудаа зүсч бэлтгэнэ. 

Эхний самбарыг модон каркаст шууд хадаас эсвэл шрупээр бэхлэнэ. Хадаас, шрупны толгойг далдлагч хэрэглэж болно. Өнгөлгөөг мөн булангаас эхлэх ба булангийн хазайлтыг сайн шалгаж, тэгш шугам татах хэрэгтэй. Тэр шугамын дагуу эхний самбараа байрлуулна. Буланд тусгай чимэглэлийн булангуудыг суурилуулж болох ба энэ нь зай завсрыг хаана. Дараагийн самбарыг ховил руу шахаж оруулах маягаар бусад самбарыг угсрана. Сүүлийн самбарыг угсарсаны дараа түүний ирмэгийг хадаас эсвэл шрупээр бэхлэнэ.

 Доторлогоо бэхлэх зориулалттай далд хаалт-бэхэлгээ 

Бэхэлгээний төмрийг бэхлэх

Тав тухтай байхын тулд тагтанд гэрэлтүүлэг зайлшгүй шаардлагатай. Розетка унтраалганы нүхийг модон самбар дээр гаргахдаа цахилгаан утасны холболтоо хаанаас хийвэл илүү тохиромжтой зай хэмжээгээ сайн тооцоорой. 

Розетка, унтраалга суурилуулах 

7.  Цонх, хаалганы амалгааг өнгөлөх

Цонх, хаалганы налуу, амалгааг өнгөлөх нь төвөгтэй байдаг ба ихэвчлэн буддаг. Модон өнгөлгөө ашиглаж байгаа үед дизайны илүү тохиромжтой, модтой сайн хосолдог, цэвэр, гоо зүйн хувьд тааламжтай, суурилуулахад хялбар хувилбар нь хуванцар өнгөлгөө юм. Амалгааг өнгөлөхдөө маш няхуур хандаж, сайн хэмжиж, хуванцар материалаа тааруулах хэрэгтэй. Мөн хуванцар цонхны тавцанг суурилуулж болно.

 Цонх, хаалганы амалгааг хуванцар хавтангаар өнгөлөх 

Бэлэн модульчлагдсан PVC налууг ашиглах нь хялбар 

8. Шалны өнгөлгөө хийх

Тагтны шалны өнгөлгөө хийх ажил нь чухал юм. Өнгөлгөөнд ус чийгэнд тэсвэртэй ламинат, паркет, плита, тэр ч байтугай хулдаасыг ашиглаж болно. Өнгөлгөөг хийхээс өмнө гадаргууг бэлтгэх шаардлагатай. Үүнийг гурван үе шаттайгаар гүйцэтгэнэ.

    1.    Шалыг ус үл нэвтрэх материалаар хучих

    2.    Дулаан тусгаарлах материал  дэвсэнэ.

    3.    Өнгөлгөө хийнэ.

Шалны ачааллыг багасгахын тулд дай мод тавьж, тэдгээрийн хооронд дулаалгын материалаа хийж, дээрээс нь ус нэвтрүүлдэггүй фанерыг хадаж болно.

9. Модон гадаргууг лакаар будах

Ажлын эцсийн шат бол модон гадаргууг лакаар будах юм. Модон гадаргууг лакаар бүрэх нь  тогтвортой байдлыг хадгалж, удаан эдэлгээтэй, үзэмжтэй болгоно. Лак түрхэхэд толбо үлдэхгүй байх нь маш чухал юм.

 Гадаргууг лакаар өнгөлөх нь ажлын эцсийн шат юм

Тагтыг гоо зүйн хувьд тааламжтай, орон зайн хувьд ашигтай талбайг нэмэгдүүлж, дулаан байдлыг мэдрүүлж, тав тухтай, амралтын өрөө болгоход та өөрсдийн хүчийг ашиглах боломжтой ба энэ нь тийм ч хэцүү ажил биш, их цаг хугацаа, хүчин чармайлт шаардахгүй. Тагтыг дулаалж, өнгөлсөний дараа жижиг орон сууцанд чухал ач холбогдолтой өрөө болгон ашиглаж болно.