Хятадын Ардын банк сүүлийн нэг жилийн хугацаанд анх удаа богино хугацааны бодлогын хүүгээ бууруулжээ. БНХАУ-ын эдийн засгийн өсөлт удаашралтай хэвээр байгаатай холбогдуулан Хятадын Ардын банк эдийн засагт үзүүлэх дэмжлэгээ нэмэгдүүлж, бодлогын шинэ жишиг рүү ийнхүү шилжиж байгаа аж.  

Хятадын Төв банк урвуу репо хэлцлийн хүүг 10 суурь нэгжээр буулгах шийдвэр гаргаж, долоо хоногийн хэлцлийн хүүг 1.7 хувь болголоо. Энэхүү шийдвэр нь нээлттэй зах зээлийн үйл ажиллагааны механизмыг оновчтой болгож, эдийн засагт үзүүлэх санхүүгийн дэмжлэгийг нэмэгдүүлэх зорилготой хэмээн мэдэгджээ.

Тус банкны цахим хуудсанд мэдээлснээр, таван жилийн хугацаатай зээлийн хүүг мөн 3.85 хувиас 3.6 хувь болгож бууруулсан байна. Сар бүрийн 20-нд хэлэлцэн шийддэг LPR-ийг бууруулснаар компаниуд болон хэрэглэгчдийн зээлийн өртөг буурах юм. 

LPR нь олгосон болон шинээр олгох зээлийн эргэн төлөлтийн түвшинд нөлөөлдөг. Өнгөрсөн онд жилийн хүүг хоёр удаа бууруулжээ. Тодруулбал, эхний удаад зургаадугаар сард 3.55 хувьд, хоёр дахь нь наймдугаар сард 3.45 хувь болгож байв. Харин энэ онд нэг удаа, долоодугаар сард 3.35 хувь болгож бууруулсан байна. 

Д.Болорцэцэг