Нийслэлийн хэмжээнд ашиглалтаас гарсан 80 орчим орон сууцны цахилгаан шатыг шинэчлэх санхүүжилтгүйн улмаас ашигласаар байгааг Хот байгуулалт, барилга, орон сууцжуулалтын яамны Шинжээч П.Дашдаваа мэдээллээ.

Орон сууцны цахилгаан шатыг 20-25 жил ашиглах стандарттай байдаг. Одоогоор санхүүжилтгүйн улмаас шинэчлэгдээгүй цахилгаан шатууд III, IV хороолол, I хороолол зэрэг хуучин хотхонуудад байгаа юм.

Хуулиар орон сууцны цахилгаан шатыг нэг удаадаа улсын санхүүжилттэйгээр сольж өгдөг хэдий ч санхүүжилт маш удаашралтай, хэдэн дамнан хүлээх тохиолдол ч гардаг байна.

Цахилгаан шат суурилуулалтын өртөг нь барилгын давхраас шалтгаалан цахилгаан шат зөвхөн суурилуулалтын хөлс дунджаар нэг давхарт 2-3 сая төгрөгөөр тооцдог. Тухайлбал: 16 давхар байранд цахилгаан шат суурилуулахад ойролцоогоор 32-48 сая төгрөг болно. Харин цахилгаан шатны үнэ хийц загвараасаа шалтгаалаад дунджаар 30-34 мянган ам.доллар буюу 130 сая төгрөг орчим болдог байна.

                                           Д.Болорцэцэг