Хүний эрхийг дээдэлсэн, авлигагүй төр, шударга ёсыг бэхжүүлэх зорилготой хуулийн төслүүдийн явцыг Хууль Зүй Дотоод Хэргийн яамны сайд О.Алтангэрэл өнөөдрийн Засгийн Газрын хуралдаанаар танилцууллаа. 

Тэрбээр энэ тухай ярихдаа, “Өнөөдрийн Засгийн газрын хуралдаанаар Хүний эрхийн багц хуулийн төслийн эхний танилцуулгыг хийлээ. Тухайлбал, Жагсаал цуглааны журмын тухай, Хэвлэлийн эрх чөлөөний тухай, Эрүүгийн хэргийн хянан шийдвэрлэх хуульд өөрчлөлт оруулах тухай, Хууль зүйн туслалцааны тухай багц хууль багтсан юм. Түүнчлэн, Өнөөдөр Засгийн газрын хуралдаанаар Авлигалын эсрэг хуулийн эхний танилцуулгыг хийлээ. Энэ хууль нь нийтийн албан тушаалтны хууль бус хөрөнгө, орлогыг хураах тухай юм" гэлээ.

Тус яамнаас авлигатай тэмцэхтэй холбоотой зарим хуулийн төсөл төлөвлөж буй бөгөөд,

• Жагсаал, цуглаан хийх журмын тухай хуулийн шинэчилсэн найруулга,
• Хэвлэл мэдээллийн эрх чөлөөний тухай хуулийн шинэчилсэн найруулга,
• Хүний эрх, эрх чөлөөг хангахтай холбоотой зарим хуульд нэмэлт, өөрчлөлт оруулах тухай хуулийн төсөл,
• Эрүүгийн хэрэг хянан шийдвэрлэх тухай хуульд нэмэлт өөрчлөлт оруулах тухай зэрэг хуулийн төслүүдийг УИХ-ын намрын чуулганд өргөн мэдүүлэх юм. 

Эдгээр хуулийн төслүүдийг Засгийн газрын хуралдаанаар хэлэлцээд УИХ-ын даргын захирамжаар байгуулсан холбогдох хууль, тогтоомжийн төсөл боловсруулах үүрэг бүхий Ажлын хэсгийн үйл ажиллагаатай Засгийн газрын үйл ажиллагааг уялдуулах талаар зохих арга хэмжээг авч ажиллахыг Монгол Улсын сайд, ЗГХЭГ-ын дарга Н.Учралд даалгасан байна. 

Мөн ХЗДХЯ-ны сайд О.Алтангэрэл үргэлжлүүлэн өнөөдрийн танилцуулсан хууль батлагдвал хөөн хэлэлцэх хугацаа зэрэг элдэв шалтаг, тайлбар сонсохгүйгээр татвар төлөөгүй, хууль ёсны орлогоо баталж чадаагүй албан тушаалтнуудын хууль бус хөрөнгийг хураах ёстой. Үүнийг Монголын ард түмэн шаардаж байгаа. Ингэж байж бид авлигатай тэмцэх дээр амжилт гаргана гэсэн ба УИХ-ын 80 орчим хувь нь шинэ гишүүд сонгогдсон учир шинэ гишүүдийг авлигын эсрэг зоригтой байна гэдэгт итгэж буйгаа илэрхийлсэн юм.