Шинэ орон сууц, барилгын материалын үнэ ханшийн судалгааг сар бүр, ажил гүйцэтгэлийн үнэлгээг улирал тутамд шинэчлэн барилгын салбарт холбоотой мэдээ мэдээлэл, судалгаа, салбартаа нэр хүндтэй зочдын ярилцлага, мэргэжилтний зөвлөгөө мэдээлэл бэлтгэн хүргэдэг Барилга МН сэтгүүлийн 2024 оны аравдугаар сарын шинэ дугаар уншигчдадаа хүрлээ.

Энэ сарын дугаарын нүүр хуудсанд Тоонот Дизайн ХХК хамтран ажиллаа. 

 173 дахь дугаарт гарсан онцлох булангуудаас танилцуулбал, 

VIP ЗОЧИН: 

Үндэсний үйлдвэрлэл бол эх орны хөгжлийн нэгэн үндэс билээ. Энэхүү их үйлсэд өөрийн ур чадвар, оюун ухаанаа зориулан ажиллаж буй Ц.Халиун хэмээх эмэгтэйг энэ удаагийн VIP ярилцлагадаа урилаа. Тэрбээр Япон улсын Shins-Hu их сургуулийг Хот төлөвлөлтийн инженер мэргэжлээр төгссөн бөгөөд Монцемент Билдинг Материалс ХХК - ийн үйл ажиллагаа хариуцсан захирлаар ажиллаж байна. 

НИЙТЛЭЛ:

Дэлхийн өвийн хадгалалт хамгаалалтын мэргэжилтэн, Японы соёлын өвийн хамтын ажиллагааны концерцум О.Ангарагсүрэн “Түүхэн дурсгалт барилга, архитектурын дурсгалын сэргээн засварлалтын тулгуур ойлголт, түүнийг дахин авч үзэх талаар” цуврал нийтлэлийг хүргэж байгаа бөгөөд энэ удаагийн дугаарт “Шаардлагатай тохиолдолд нэн яаралтай хариу арга хэмжээг цаг алдалгүй авах”  VIII хэсгийг та бүхэндээ хүргэж байна. 

АРХИТЕКТУР ДИЗАЙН: 

Архитектурын зураг төслийн үе шатны 1-р хэсэгт гол санааг эрэлхийлэх үед гараар зурах нь бүтээлч архитекторт илүү чөлөөтэй сэтгэх боломжийг олгодог ба аль болох жижиг дүрслэлээр шугам ашиглахгүй зурах нь төсөөллийг илүү ажиллуулж форматад буулгахад хялбар болгож, анхны санааг уран бүтээлч өөртөө зориулж хийх ба шаардлагатай тохиолдолд зураг төслийн баг, захиалагчид илүү ойлгомжтой байдлаар задлан зурж харуулж болох ба архитекторын гар зургийн талаар Royal academy олон улсын их сургуулийн багш, Мэргэшсэн архитектор Д.Гантулгатай хамтран бэлтгэсэн нийтлэлээс уншаарай. 

ХУУЛЬ, ЭРХ ЗҮЙ

Газрын тухай хуулийн дагуу иргэн, аж ахуй нэгж, байгууллага газар эзэмшиж гэрээнд заасан зориулалт, нөхцөл, болзлын дагуу хуулиар зөвшөөрсөн хүрээнд өөрийн мэдэлд байлгах эрхийн талаар энэ удаагийн Хууль, эрх зүйн буландаа Иргэн, аж ахуй нэгж, багууллага газар эзэмшихтэй холбоотой хуулийн зөвлөгөөг хүргэж байна.  

МЭРГЭЖИЛТНИЙ ҮГ 

Хүйтний улирал гэлтгүй барилгын талбай дээр тухайн цаг уурын нөхцөлд тохирсон арга хэрэглэж бетоныхоо бат бэхийг төсөлд заасан хэмжээнд хүргэх нь барилгачдын зорилго байдаг. Тэгвэл энэ удаагийн 173 дахь дугаарын Мэргэжилтний үг буландаа хүйтний улиралд бетоны бэхжилт хэвийн явагдах нөхцөл бүрдүүлэх, хүйтний нэмэлттэй бетон цутгахдаа юун дээр анхаарах талаар бэлтгэн хүргэлээ.  

 НОГООН БАРИЛГА 

 Edge system ба Олон улсаас ногоон зээл авах боломж

Манай улсын хувьд барилга үйлдвэрлэл болон барилгын эрчим хүчний хэрэглээ хүлэмжийн хийн нийт ялгарал томоохон хувь эзэлдэг. Барилгын салбар дахь хүлэмжийн хийн ялгарлыг бууруулах, эрчим хүчний хэмнэлт үүсгэхэд дэлхий нийтээр анхаарч буйн нэг жишээ болох байгаль орчинд ээлтэй ногоон барилга барих, санхүүжүүлэх юм. Тэгвэл Олон улсын стандартад нийцсэн ногоон барилга барих, олон улсын санхүүгийн эх сурвалжаас зээл авахад ямар шалгуур хангах, ямар шат дараалалтай байдаг талаар Edge expert О.Гантулгатай хамтран бэлтгэлээ. 

ТОДРУУЛГА

Манай улсын барилгын салбар ажиллах хүчний хомсдолд ороод буйн нэг шалтгаан бол ажилтны цагийн үнэлгээ юм. Тэгвэл энэ оны 5 дугаар сарын 21-нд “Барилгын ажилтны тарифт цалингийн жишиг”-ийг шинэчлэн баталсан бөгөөд 2025 оноос эхлэн хэрэгжих уг шийдвэрийн дагуу барилгын салбарын ажилтны цалин хэрхэн өөрчлөгдсөн талаар Монголын Барилгачдын Нэгдсэн Холбооны Дэд ерөнхийлөгч Ч.Наранбаатараас тодрууллаа. 

Мөн та Барилга МН сэтгүүлээс орчин үеийн орон сууцны үнэ ханш болон ажил гүйцэтгэлийн тайлан,  шинэ орон сууцны судалгаа зэргийг уншаарай. 

СЭТГҮҮЛ ЗАХИАЛАХ 

Онлайн унших: Номын сан

Утас: 9100-0233, 7711-3333-2