Нийслэлийн агаар, хөрсний бохирдлыг багасгах, гэр хорооллыг орон сууцжуулж, иргэдийн ая тухтай орчинд амьдрах нөхцөлийг бүрдүүлэхээр нийслэлийн Орон сууцны бодлогын газраас Сонгинохайрхан дүүргийн 9 дүгээр хороонд 5.6 га газрыг чөлөөлж, 13 блок бүхий, 462 айлын ногоон орон сууцны хорооллын ажлыг эхлүүлсэн.

Энэхүү ажлын хүрээнд Баянхошуу дэд төв орчмын 162 га талбайг гэр хорооллын газрыг дахин төлөвлөн барилгажуулах төсөл хэрэгжүүлэх байршлыг баталж, “Улаанбаатар хотын ногоон орон сууц төсөл”-ийн эхний ээлжийн 110 айлын дөрвөн блок орон сууцыг энэ оны дөрөвдүгээр улиралд багтаан ашиглалтад оруулахаар төлөвлөн ажиллаж байна.

Төслийг НЗДТГ, АХБ, Уур амьсгалын Ногоон сан хамтран хэрэгжүүлж байгаа юм. Төслийн талаар “Ногоон орон сууц” төслийн инженер П.Наранбаатар “110 айлын дөрвөн блок орон сууцны барилга нь орох хаалганаасаа эхлээд нэг давхар тэр чигээрээ тусгай хэрэгцээт иргэдэд ээлтэй байдлаар өргөн хаалгатай, угаалгын өрөөнд тэргэнцэртэй иргэн бүтэн эргэх боломжийг бүрдүүлж, зохион байгуулсан. Мөн барилгын зураг төслийг олон улсын үнэлгээний стандартад нийцүүлэн боловсруулж, уг зураг төслөөрөө барилгын ажлыг гүйцэтгэж байна. Орон сууцны бас нэг онцлог нь ашиглалтын зардал 25 хувиар багассан бөгөөд орон сууцныхаа урд хүлэмжтэй тул хэрэглээний ногоог хүлэмжинд тарих бололцоог бүрдүүлсэн. Түүнчлэн үйлчилгээний төвүүд бий болгож байгааг” онцоллоо.

Д.Болорцэцэг