Нийтийн тээврийн салбарын парк шинэчлэлийн хүрээнд БНХАУ-ын “Yutong Bus” компанийн үйлдвэрлэсэн 600 их багтаамжийн автобусыг өнгөрсөн гуравдугаар сарын 1-нээс үйлчилгээнд нэвтрүүлэн есдүгээр сарын 27-оос 31 ширхэг угсраа автобус ээлжээр оруулж иржээ. Энэ сарын 1-ний өдрийн байдлаар эхний ээлжийн автобуснууд “Таван шар-Офицеруудын ордон” чиглэлд үйлчилгээнд явж байгаа юм. Тус автобус нь нийт 125 ба түүнээс дээш хүн тээвэрлэх хүчин чадалтай, 41 суудалтай, хяналтын камер сууриулуулсан, хөдөлгүүрийн хүчин чадал өндөр автобус юм. Мөн арилжааны банкны бүх төрлийн картаар үйлчлэх боломжтой аж.  

Шинэ урт автобусны үйлчилгээ, чанарын талаар Нийтийн тээврийн бодлогын газрын дарга Д.Отгонжаргал, Замын-Үүдийн авто замын хальтиргаа гулгаатай холбоотойгоор хөдөлгөөний аюулгүй байдалд тааруулж, автобусыг ээлжээр авчирч байна. Сүүлийн ээлжийн автобусыг 1-2 хоногт Замын-Үүдээс татаж авчирна гэлээ.

Үйлчилгээнд явж байгаа өмнөх цэнхэр урт автобуснуудын насжилт 2025 оны хоёрдугаар сард дуусах учир насжилт хэтрэхээс өмнө шинэ урт автобуснуудаар парк шинэчлэлт хийж байгаа бөгөөд Улаанбаатар хотод явж байгаа 1100 их багтаамжийн автобус, шинэ 31 урт автобус аль аль нь нэгдүгээр эгнээнд дүрэм зөрчсөн тээврийн хэрэгслийн мэдээллийг дамжуулах системтэй аж. 

Шинэ урт автобус М1, М2, М3 гэсэн төв зам дагуу иргэд ихээр зорчдог чиглэлд явж байна.