Баярынхаа өдрүүдэд барилгачид монгол бөхийнхөө хийморьт сэргэн баярлаж өнжлөө. Монгол улсад барилгын салбар үүсч хөгжсөний 85 жилийн ойд зориулсан 128 хүчит бөхийн барилдаан Монгол бөхийн өргөөнд болж өнгөрлөө.

    Монгол бөхийнхөө уран барилдааныг үзэхийг хүсдэггүй монгол хүн байхгүй. Тиймдээ ч барилгачид баярынхаа өдрүүдэд монгол бөхийнхөө хийморьт сэргэж өнжлөө. Монгол бөхөө дэмжихээр ирсэн барилгачид Монгол бөхийн өргөөний суудлыг дүүргэсэн байлаа. Барилгачид өөр өөрийн байгууллагын өнгө төрхийг харуулсан туг, жигдэрсэн нэг хувцастай ирсэн нь содон басхүү бахархмаар харагдаж байлаа. Тэд баярынхаа өдөрт нилээн ач холбогдол өгч оролцож байгааг эндээс харж болохоор байсан юм.  

Мөн баярынхан нь өдөр төрийн болон төрийн бус байгууллагын зүгээс ахмад барилгачид болон ажлынхаа бүтээмжээр хамт олноо манлайлсан ажилчидаа шагнаж урамшуулсан юм.

     Барилдааны Ерөнхий ивээн тэтгэгчээр 5 жилийн ойгоо тэмдэглэж буй "Их үйлсийн эрэлд" ХХК оролцож барилгын салбарынханыгаа баярлууллаа.

     85 – ныхаа нас сүүдрийг зооглож байгаа ахмад байгууллагын баярт 128 бөх зодоглосоноос их шөвөгт Хөвсгөл аймгийн харъяат Улсын арслан Х. Мөнхбаатар, Булган аймгийн харъяат Улсын начин Энхбат Архангай аймгийн харъяат аймгийн арслан Пүрэвдагва, Завхан аймгийн харъяат Улсын начин Гончигдамба нар тунж үлдсэнээс Хөвсгөл аймгийн харъяат Улсын арслан Х. Мөнхбаатар түрүүлж, Булган аймгийн харъяат Улсын начин Энхбат үзүүрлэж барилгачдын баяр дээр баяр, хүч нэмлээ.