Багануур дүүрэгт 5га талбайд 50мвт хүчин чадалтай батарей хуримтлуурын станцыг, энэ оны 11 дүгээр сарын 30-нд ашиглалтад оруулахаар төлөвлөж байгаа бөгөөд гүйцэтгэл 80 хувьтай үргэлжилж байна.

Батарей хуримтлуурын станц нь оргил ачааллын үеэр системд эрчим хүч нийлүүлж, ачааллыг хуваалцана. Харин ачаалал буурахаар системээс гарч, өөрийгөө цэнэглэх онцлогтой. 

Тиймээс тус станц ашиглалтад орсноор эрчим хүчний өвлийн оргил ачааллын үед хэрэглэгчдийн цахилгаан эрчим хүчийг тасалдуулахгүй байх, байгаль орчинд ээлтэй буюу хүлэмжийн хийн ялгарлыг бууруулах зэрэг олон талын ач холбогдолтой юм.

Станцын барилгын ажлыг БНХАУ-ын “Энвижн” компани гүйцэтгэж байгаа бөгөөд туслан гүйцэтгэгчээр дотоодын “Монхорус Интернэшнл” компани ажиллаж байгаа аж. Мөн батарей хуримтлуурын станцыг барих ажлын хүрээнд батарей станц, дэд станц, цахилгаан дамжуулах агаарын шугам, Багануур дэд станцын өргөтгөлийн ажлууд хийгдэнэ юм. 

Уг станцыг нийслэлээс гаргасан бондын 300 орчим тэрбум төгрөгөөр төсөвтэйгөөр барьж байгаа юм.