Архитектор, гэрэл зурагчин Б.Батзоригийн “АРХИВ” анхны бие даасан архитектурын гэрэл зургийн үзэсгэлэнг МУЭ байрны “Бичиг соёл төв”-ийн үзэсгэлэнгийн танхимд Дэлхийн архитектурын өдрийг тохиолдуулан 2024 оны 10-р сарын 1-ээс 15-ы хооронд олон нийтэд толилуулах гэж байна.

Нээлтийн хөтөлбөр:

- 18:00-18:15 Нээлт

- 18:20-19:00 “Өөрийн гэрэл зургийн чиг хандлага, туршлага” лекц

Товч танилцуулга:

Баттулгын Батзориг нь 2004 онд Мимар Синаны нэрэмжит Соёл Урлагийн Их сургуульд архитектур мэргэжлээр суралцах болсноор дэлхийн уран барилгууд болон архитектурын дүрслэх суурь ойлголтуудтай танилцаж эхэлжээ.Түүний оюутны төслийн ажлуудад гэрэл зураг авч цуглуулах, баримтжуулах шаардлага ихээр үүссэн бөгөөд энэхүү цаг үеэс эхлэн түүний архитектурын гэрэл зурагчин болох суурь, хүсэл эрмэлзэл бий болжээ. Тэрээр анх “Сони Эриксон” гар утасны камераар барилгын гэрэл зургуудыг буулгаж эхэлсэн бөгөөд 2007 онд ааваасаа хагас мэргэжлийн “Никон Ди40” загварын гэрэл зургийн камер бэлгэнд авсан нь архитектурын гэрэл зургаар дагнан авч гараагаа албан ёсоор эхлүүлэх үндэс бүрэлджээ. 

Б.Батзориг нь Монголын гэрэл зургийн блог Агшин.мн болон олон нийтийн гэрэл зургийн цахим сүлжээ Фликр сайтууд дээр өөрийн авсан архитектурын гэрэл зургийг нийтэлсээр ирсэн ба гэрэл зургийн багагүй цуглуулга, туршлагатай. Түүний уран бүтээлүүд нь архитектурын хэлбэр, орон зай, орон зайг гэрэлтүүлэх байгалийн гэрэл, материалын хэв шинжийг элдэв хачиргүйгээр, архитектур мэргэжлийн үүднээс харуулдаг бөгөөд түүхэн барилга байгууламжийн гэрэл зургийг баримтжуулан авч архивлах зорилгоор уран бүтээлээ туурвидаг. 

Тэрээр 2013 онд Антитезиз Ательег үүсгэн байгуулж архитектор, 2019 оноос “Архитектурын гэрэл зургийн холбоо”, Контемпорари Архитектурын Төв”-ийн гүйцэтгэх захирлаар тус тус ажиллахын сацуу гэрэл зургийн чөлөөт уран бүтээл туурвиж байна. Б.Батзоригийн анхны бие даасан гэрэл зургийн үзэсгэлэнгээр түүний өнгөрсөн хугацаанд харсан, үзсэн, хуримтлуулсан өчүүхэн мэргэжлийн туршлага мэдээллийг өөрийн авсан гэрэл зургаар дамжуулан олон нийтэд хуваалцахыг зорьж байна. 

Албан ёсны түнш: Антитезиз Ателье 

Зохион байгуулагч: Архитектурын гэрэл зургийн холбоо 

Куратор: Б.Бат-Оргил 

Үзэсгэлэнг дэмжигч: Бичиг Соёл Төв, Контемпорари Архитектурын төв