Өнгөрсөн нэгдүгээр сард Баянзүрх дүүргийн 26 дугаар хороо, Дүнжингарав худалдааны төвийн урд байрлах 207 дугаар байр хий тээвэрлэж явсан автомашин шатсаны улмаас дэлбэрэлтэд өртсөн. Үүний улмаас тус байрны 63 өрхийн 218 оршин суугчид өнөөдрийг хүртэл түрээсийн орон сууцанд амьдарч байна. 

   Энэ асуудлыг шийдвэрлэх талаар хотын дарга Х.Нямбаатар, "Нийт 63 үл хөдлөх хөрөнгийн гэрчилгээтэй, 63 өрх энд хохирсон гэж бүртгэлтэй байгаа учраас 207 дугаар байрыг нураахад татгалзах зүйлгүй гэсэн бичиг баримт болон гарын үсгийг цуглуулж, баталгаажуулж өгөх хэрэгтэй" гэсэн юм. Өөрөөр хэлбэл, уг барилгыг нураан оршин суугчид амьдарч байсан метр квадратаар нь шинээр барьж өгөх хүсэлт гарган, гарын үсэг зурах юм. Уг бичиг баримт бүрдсэний дараа барилгыг нураан 21 хоногт яаралтай сонгон шалгаруулалт зарлан ажлыг гүйцэтгүүлэх юм. Тендерийн төсөвт өртөг 2,4 тэрбум төгрөг байна хэмээн Барилгын хөгжлийн төвөөс магадласан байна.   

       Хэрэв нэг айл нураахаас татгалзах юм бол тухайн хүний өмч хөрөнгийг нураах боломжгүй цчир барилгыг нурааж болохгүй болохоос гадна таны орон сууц ипотекийн зээл, банкны барьцаанд байгаа тохиолдолд банктайгаа хамтарч нураахыг зөвшөөрсөн тодорхойлолт гаргаж өгөх аж. Харин улс банканд тус барилгыг 2025 он гэхэд шинээр барин өмчлөгчдөд хүлээлгэж өгөх албан бичиг өгөх юм байна. 

    Тухайн 207 дугаар байр дэлбэрэлтэд өртсөний улмаас хананы бетонд нүүрс хүчлийн хий үүсч, барилгын үндсэн хийцлэл алдагдаж, ан цав гарч, арматур зэвэрч, маш бага баллын газар хөдлөлтөд ч тэсвэргүй болсон гэсэн дүгнэлтийг эрдэмтэн, судлаачид удаа дараа хэлсэн байдаг. Энэ үеэр 207 дугаар байрыг нураах асуудалд оршин суугчдын төлөөллөөс санал хүсэлтээ илэрхийлж, бусад оршин суугчиддаа мэдээлэл хүргэж, бичиг баримт бүрдүүлж, гарын үсэг цуглуулахаа хэллээ.