Нийслэлийн иргэдийн эрүүл аюулгүй амьдрах эрхийг хангахын тулд UCS1105B:2023 "Амины орон сууцны төлөвлөлт, ашиглалтад тавигдах шаардлага" хотын стандартыг мөрддөг билээ. Тус стандартад Амины сууцны эдэлбэр газрын төлөвлөлтийг тусгахдаа  хэсэгчилсэн ерөнхий төлөвлөгөөнд тодорхой тусгаагүй тохиолдолд барилгажилтын талбайн хэмжээг эдэлбэр газрын хэмжээнээс нь хамааруулан нийт талбайн (30-40) хувь байнй гэж заасан байдаг. 

Амины болон хэд хэдэн айлын сууцны барилгыг гудамжны улаан шугамаас 5 м–ээс багагүй, нэвтрэх замын улаан шугамаас 3 м-ээс багагүй зайд төлөвлөх бөгөөд барилгын өнгө үзэмж, архитектурын шийдэл нь орчны барилгажилт, хотхоны шийдэлтэй уялдсан шаардлагатай юм. 

Амины сууцны барилгыг хүн амд аюулгүй, тохь тухтай амьдрах нөхцөл бүрдсэн, орчных нь эрүүл ахуйн шаардлага хангагдсан, дэд бүтэц, усны эх үүсвэр нь шийдэгдсэн нутаг дэвсгэрт, батлагдсан кадастрын зураг, ерөнхий төлөвлөгөөний дагуу тохирлын гэрчилгээтэй барилгын материал, эдлэхүүнээр барина. Хэрвээ  хөгжлийн бэрхшээлтэй иргэдийн гэр бүлд зориулсан бол амины сууцны барилгын зураг төсөл боловсруулах даалгаварт тэргэнцэр ашигладаг иргэдэд зориулсан тусгай сууц, эзэмшил газарт нь тэргэнцэрт зохицсон зориулалтын талбай бусад үйл ажиллагааны нөхцөлийг хангасан төлөвлөлт хийнэ. 

Амины орон сууцын өрөө тасалгааны цонхноос зэргэлдээ эдэлбэр газарт байрлах

хөрш айлын сууцын барилгын хана ба туслах аж ахуйн барилга (саравч, пин, гараж г.м)

хүртэлх зай 6 м-ээс багагүй байх ёстой. 

Тайлбар: Тус сууцыг нарны хэт ээвэрлэлтээс хамгаалах зорилгоор ногоон

байгууламжийн сүүдэрлэлтийг тооцож байршуулснаас гадна, (өвөл модны навч унах

тул эсрэгээрээ ээвэрлэлт бий болно) нээлхий бүхий хаших бүтээцийн зэрэгцээ ногоон

байгууламж төлөвлөсөн нь агаарыг чийглэг болгож хуурайшихаас хамгаалсан шийдэл болжээ.

Амины орон сууцны барилгыг эдэлбэр газар дээр байрлуулан төлөвлөхдөө дараах аргыг баримтална. 

Үүнд:

    ●    Гадна хэлбэрийн хувьд өмнө ба хойд талын хэмжээ өргөн байхаас илүү зүүн ба баруун талынх өргөн байх нь дээр. Энэ нь нарны ээвэрлэлт, гэрэлтүүлгийн ашигтай талуудыг бий болгохоос гадна, салхины нөлөөллийг багасгах давуу тал үүсгэнэ. Мөн газрын хэлбэр (өндөржилт, налуулаг) байдлыг харгалзан байршуулах хэрэгтэй;

    ●    Хэтэрхий олон өнгийлт, доголтой, олон өнцөг булантай барилга барихаас зайлсхийх. Учир нь угсарч барихад хүндрэлтэйгээс гадна дулаан алдагдал их болж цантах магадлал өндөр байна. Гол том цонхоо урд талдаа гаргаж, баруун зүүн талдаа цөөвтөр цонхтой, хойд талдаа цонхгүйгээр төлөвлөхийг хичээх хэрэгтэй. Барилгын байршлыг сонгохдоо нөмөртэй, нарны тусгал саадгүй тусдаг газар сонгох хэрэгтэй;

    ●    Галын аюулаас урьдчилан сэргийлэх нормыг баримтлан барилгын хоорондох зайг сонгоно. Барилгын галд тэсвэрлэх зэргээс хамааран тэдгээрийн хооронд байх зай хэмжээг дараах хүснэгтээр харуулав (3-р хүснэгт);

    ●    Тоосго болон бетон ханатай орон сууцны барилгуудын хоорондох зай 6 м, тоосгон болон модон ханатай барилгуудын хоорондох зай 10 м, модон ханатай барилгуудын хоорондох зай 15 м-ээс багагүй байна;

Амины орон сууцны барилга дотор болон өргөтгөлийн хэсэгт барилгын материалын дэлгүүр, тэсрэх, гал гарах аюултай бодис ба тухайн материалын дэлгүүр, мөн шатамхай шингэн ашигладаг ахуйн үйлчилгээний цэг салбар (үсчин, цаг ба гутал засварын газраас бусад) зэргийг байрлуулахыг хориглоно.

Харин барилгын дотоод орон зайн хуваарилалт, бүсчлэл, бүрдлийг зөв тооцож, гадна орчны нөлөөллөөс хамаарч орон зайн зориулалт, байршил тодорхойлогддог. Жишээлбэл, хүн их ашигладаг өрөөг наран талд, техникийн өрөөнүүдийг байгалийн гэрэл шаардахгүй талд төлөвлөх зохилтой юм.