Хараа бэлчээм уудам элсэн цөлийг сүрдэм өндөр, үзэмжит барилгаар дүүргэж, амьдрахад аюулгүй болгосон улсын нэг бол Арабын Нэгдсэн Эмират Улс /АНЭУ/ юм. Тэд Саадият арал дээр архитектурын өвөрмөц хийц бүхий “Зайед“ хэмээх үндэсний музейг сүндэрлүүлж байгаа бөгөөд уг музейг АНЭУ - ыг удирдагч асан Шейх Зайед бин Султан Аль Нахайяны дурсгалд зориулсан юм. 

Тус музейн барилгын ажил нь 2007 оноос хойш 15 жилийн турш явагдаж байгаа бөгөөд  2025 онд нээлтээ хийхээр төлөвлөж байгаа аж. Барилгын конфепцийг 1999 онд Pritzker prize шагнал хүртэж байсан алдарт архитектор  Лорд Норман Фостер гаргахдаа орчин үеийн дизайныг Арабын уламжлалт архитектуртай хослуулан шонхор шувууны далавчийг дүрсэлжээ. 

 Барилгын нийт өртгийг 260 сая фунт стерлинг буюу ойролцоогоор 325.5 сая ам.доллар гэж тооцсон бөгөөд гадна фасадыг ган материалаар хийж гантиг чулуу, алт, үнэт чулуу, талст, керамик зэрэг эдэлгээ даах байгалийн чулуугаар дотор интерьерийг шийдсэн байна. Музей нь нийт 60,042 мкв талбайг хамарсан зургаан байнгын галерей, нэг түр үзэсгэлэнгийн танхим, нэг галерейтай юм. Тус цогцолборт Гуггенхаймын музей болон Луврын музей үзмэрээ дэлгэх ажээ. 

Эртний бүс нутгийг олон улстай худалдаа хийх боломж олгосон уламжлалт усан онгоц бүтээх арга техникийг судлахын тулд 2023 онд байгуулагдсан Зайед үндэсний музейн судалгааны сан нь Зайед их сургууль болон Нью-Йоркийн их сургуультай хамтран Маган завь төслийг хэрэгжүүлж байгаа юм. Уг төсөл нь 300,000 жилийн өмнөөс хөгжсөн усан тээврийг судлах юм.     

Барилга гурван хэсгээс бүрдэх бөгөөд галерейн үзэсгэлэнд зориулан таван далавч хэлбэртэй 123 метр өндөр блок, дөрвөн хонхор музейн талбай, усан оргилуур, цэцэрлэгт хүрээлэн зэрэг ногоон байгууламжтай. Барилгын дээврийн шилэн цамхгууд нь агаар сэлгэлтийг зохицуулахаас гадна нарны зайн хураагуур болдог байна. Шилэн цамхагт нарны зайн самбар байрлуулж оройн цагаар барилгын гадна талбайн гэрэлтүүлгийг шийджээ.  

Цамхагууд нарны эрчим хүчийг нөөцөлж музейд дамжуулан байгалийн агаарын урсгалаар хөргөдөг системтэй. Хөргөх зарчим нь агаарын хөдөлгөөний хууль дээр үндэслэсэн ба хүйтэн агаарыг түвшингүүддээ хучилтан дунд байрлах хөргөх хоолойгоор дамжуулан тарааж, дараа нь музейн угтан авах танхимд цуглуулаад халсан агаарыг босоо тэнхлэгээр дээш хөөрөн ирэхэд далавч хэлбэртэй цамхагийн дээд талын нөмөрлөсөн хэсэг нээгдэж гадагш гаргадаг байна. Уг цогцолбор нь дан ганц музей биш сургалтын төв, үйлчилгээний байгууллагууд нэг дор байрладаг.

Хэрэв та ирэх онд алч уур нөмөрсөн арабуудын нутгаар аялах бол заавал очиж үзэх газруудын нэг нь Зайед үндэсний музей юм.