“Автомашингүй өдөр-2024” арга хэмжээ энэ сарын 21-ний бямба гарагт болно. Тус арга хэмжээг манай улс 12 дахь жилдээ зохион байгуулж буй бөгөөд энэ удаагийн авто машингүй өдрөөр зам тээврийн ослоос сэргийлэх, иргэдэд автомашинаас татгалзахыг уриалах зорилготой юм. Арга хэмжээний талаар холбогдох албаныхан мэдээлэл өглөө. Нийслэлийн Эрүүл мэндийн газрын дарга П.Эрхэмбулган “Нийслэлийн Засаг даргын захирамжийн дагуу автомашингүй өдөр зохион байгуулах ажлын хэсгийг томилж, бэлтгэл ажлыг хангаж байна. Дэлхийн автомашингүй өдөр есдүгээр сарын 22-нд тохиодог. Улаанбаатар хотын хувьд энэ бямба гарагт зохион байгуулна. Энэ жилийн арга хэмжээний онцлог нь Улаанбаатар хотоос хэрэгжүүлж байгаа “Экомобилити” аяныг тодотгон дэмжиж байна. Ингэхдээ төвийн байршлуудад авто замын хөдөлгөөнийг хязгаарлаж 20 зах, худалдааны төвийг амраана. Сүхбаатарын талбайд болох нэгдсэн арга хэмжээгээр иргэдэд эрүүл мэндийн зөвлөгөө, үйлчилгээ үзүүлэхээс гадна уралдаан тэмцээн, бусад арга хэмжээ болно. Мөн төвийн зургаан дүүргээс асар барьж үйл ажиллагаагаа явуулна” гэлээ. 

 Зам хааж байгаа 310 цэг дээр 360 гаруй албан хаагч ажиллана

Өглөөний 07:00 цагаас оройны 18:00 цагийн хооронд хойд чиглэлдээ СУИС-ийн уулзвар, Хүнсний IV дэлгүүрийн уулзвар, баруун талдаа Дарь-Эхийн уулзвар, Сансрын тунель, Зүүн 4 зам, Бөхийн өргөө, урд талдаа “Шангрила”-гийн уулзвар, Хүүхдийн ордны уулзвар, зүүн талдаа “Өгөөж”-ийн уулзвар, Баруун 4 зам, “Бөмбөгөр” худалдааны төвийн уулзвар, Гэсэр сүмийн уулзвар гэсэн байршлууд дээр өмнөх жилүүдтэй адилхан түвшинд хөдөлгөөнийг түр хязгаарлаж, цагдаагийн албан хаагчид хяналт тавьж ажиллана. Дээрх нэршил бүхий байршил дотор явган зорчигчдыг гэмтээхгүйн тулд  тээврийн хэрэгсэл болон унадаг дугуй, цахилгаан мотоцикл, цахилгаан дугуй, цахилгаан скүүтер, суррон зэргийг хөдөлгөөнд оролцуулахгүй  зэрэг  зорчихгүй гэсэн үг гэдгийг ТЦА-ны  Урьдчилан сэргийлэх хэлтсийн дарга, дэд хурандаа Б.Очирбат мэдээллээ. 

Автомашингүй өдрөөр 41 чиглэлийн 345 тээврийн хэрэгслийн хөдөлгөөнд өөрчлөлт орно

Нийслэлийн Тээврийн бодлогын газрын Захиргаа, удирдлагын хэлтсийн дарга З.Цэвээндорж Автомашингүй өдрөөр Зүүн 4 замаас Баруун 4 зам хооронд, Энхтайвны өргөн чөлөө, Бага тойруу гэсэн авто замуудаар дайран өнгөрөх бүх чиглэлийн тээврийн хэрэгслийн хөдөлгөөнд өөрчлөлт оруулж байгаа. Автомашингүй өдөр урдаас хойш болон хойноос урагш явж байгаа тээврийн хэрэгслүүдийг Их тойруугаар тойруулах, Сүхбаатарын талбай болон Бага тойруугаар эргэлт хийж байгаа тээврийн хэрэгсэл бүгд богино эргэлтээр хөдөлгөөнд оролцоно. Нийт 41 чиглэлийн 345 тээврийн хэрэгслийн хөдөлгөөнд өөрчлөлт оруулахаар маршрутыг төлөвлөжээ. Маршрутад өөрчлөлт оруулсан ч амралтын өдөр ажилладаг 945 тээврийн хэрэгслийн тоонд өөрчлөлт орохгүй учир иргэд саадгүй зорчих боломжтой гэлээ.