Барилгын салбарын инженерүүдийн мэргэшсэн, зөвлөх зэргийг олгох сургалтын систем Монголд нэвтрээд багагүй хугацаа өнгөрч байна. Гэвч сүүлийн үед уг зэрэг нь “барилгын үйл ажиллагаа эрхлэх тусгай зөвшөөрөл” авахад тавигдах суурь нөхцөл төдий болж, ихэнх инженерүүд энэ зорилгоор л зэрэг горилж, сунгаж байна. Үүнийг дагаад сургалтын чанар муудаж, зохион байгуулагч “түншлэл” - ийн дунд тодорхойгүй асуудал үүссэн төдийгүй сургалтын үйл ажиллагаа түр хугацаанд Барилгын Хөгжлийн Төвд шилжээд байгаа билээ. Уг асуудлаар Монголын Барилгын Инженерүүдийн Холбооны Ерөнхийлөгч Б.Гантулгааас тодрууллаа. 

-Барилгын салбарт хэчнээн төрийн бус байгууллага байна вэ? Мэргэжлийн нэгдсэн холбооны эрх зүйн байдлын тухай хууль гарлаа. Манай барилгын салбарт энэ хуульд заасан тавигдах шаардлагыг хангах холбоо байна уу?  

-Манай холбооны зүгээс Улсын бүртгэлийн ерөнхий газарт албан ёсоор хандан барилгын салбарт үйл ажиллагаа эрхэлж буй төрийн бус байгууллагуудын мэдээллийг авсан. Үүнээс харахад  2023 оны 12 сарын байдлаар нийт 137 төрийн бус байгууллага бүртгэлтэй байгаа бөгөөд үүний 52 нь гишүүнчлэлтэй, 85 нь нийгэмд үйлчилдэг ТББ байна. Нарийвчлаад үйл ажиллагааны чиглэлээр нь харахад ойролцоогоор 1/3 нь мэргэжлийн чиглэлээр үйл ажиллагаа явуулдаг байна. Саяхан  буюу 2024 оны 04 сард УИХ-аар  2025 оны 01 сарын 01 өдрөөс  мөрдөх  “Мэргэжлийн нэгдсэн холбооны эрх зүйн байдлын тухай хууль” батлагдлаа. Энэ хуулийн гол агуулга нь аливаа нэг салбарт төрийн чиг үүргийг тухайн салбарын мэргэжлийн нэгдсэн холбоогоор дамжуулж гүйцэтгүүлэх юм. Тус хуульд зааснаар "мэргэжлийн холбоо" гэж салбар, эсхүл мэргэжлийн эрх ашгийг хамгаалах зорилгоор аж ахуйн нэгж, төрийн бус байгууллага, тухайн салбарын мэргэшсэн хүнээс бүрдсэн гишүүнчлэл бүхий холбоог, "мэргэжлийн нэгдсэн холбоо" гэж тухайн салбарт үйл ажиллагаа эрхэлж байгаа мэргэжлийн холбоодын гишүүнчлэлтэй, салбарын нийтлэг эрх ашгийг хамгаалах зорилго бүхий мэргэжлийн холбоодыг нэгтгэсэн холбоог гэж заасан байгаа юм. Тэгэхээр мэргэжлийн холбоо гэдэг бол тухайн мэргэжилтэй холбоотой үйл ажиллагаа эрхэлдэг, гишүүнчлэлтэй холбоо байх юм байна. Хэрэв тийм бол одоо манай салбарт байгаа 45 гаруй мэргэжлийн холбоодын хэд нь гишүүнчлэлтэй байна, тэдгээрийн хэд нь төрийн бус байгууллагын тухай хуулийг баримтлан ажиллан байна гэдэг нь тодорхойгүй байна. Сүүлийн үед энэ “Мэргэжлийн нэгдсэн холбооны эрх зүйн байдлын тухай хууль” яригдаж эхэлсэнтэй холбоотой зарим ТББ-ууд нэрээ сольж, “нэгдсэн” гэдэг үгийг оруулсан. Ухаан нь “нэгдсэн” гэдэг үг орвол тэр холбоо салбарын бүх ТББ, холбоодыг нэгтгэсэн ТББ байх юм шиг ойлгоод байгаа. Гэтэл үгүй юм. Хуулийн  5 дугаар зүйлд заасан тавигдах шаардлага болон бусад заалтыг харахад гишүүнчлэлтэй, тухайн салбартаа хүлээн зөвшөөргдсөн, байнгын үйл ажиллагаатай мэргэжлийн холбоодын нэгтгэл байна гэдгийг тодорхойлсон байгаа.  

Тодруулбал, мэргэжлийн холбоо гэдэг нь мэргэжлээрээ эвлэлдэн нэгдсэн, иргэдээс бүрдсэн гишүүнчлэлтэй, гишүүддээ болон нийгэмд тухайн мэргэжилтэй холбоотой, түүн рүү чиглэсэн үйл ажиллагаа явуулдаг, бие даасан, ашгийн бус төрийн бус байгууллагыг хэлдэг. Тйимээс ”Төрийн бус байгууллагын тухай хууль”-ийн дагуу удирдах зөвлөл, хяналтын зөвлөлтэй байж, их хурлаараа удирдлагаа тодорхойлдог, үйл ажиллагаа нь нээлттэй, хуулийн дагуу үйл ажиллагаа болон санхүүгийн тайлангаа гаргадаг, тайлагнадаг байх ёстой. Гэтэл манайд нэг хүнтэй, тамгаа “кармаалчхаад” ямарваа нэг ажлын хэсэгт орж, салбарын хөгжлийн төлөө бус, хувийн ашиг сонирхол эсвэл мөнгөний төлөө ажилладаг холбоо нэртэй ТББ-ууд нэлээн байна. Ийм төрлийн “холбоо” нэртэй газрууд салбарын хөгжилд саад болж, салбарын нэр хүндийг унагах хэмжээний хор хохирол учруулсаар байна.  

Тиймээс салбарт үйл ажиллагаа явуулж буй төрийн бус байгууллагууд нь “мэргэжлийн” холбоо болох талдаа анхаарч ажиллах зайлшгүй шаардлагатай болж байна. 

-Барилгын салбарын инженерүүдийн мэргэшсэн, зөвлөх зэргийг олгох сургалтын системээс хэдийнээс манайд нэвтэрч эхэлсэн бэ? Одоогийн нөхцөл байдал ямар байгаа вэ? 

-Анх “Дэд бүтцийн яам” байх үед “Дэд бүтцийн ажилтны мэргэжил дээшлүүлэх институт”-ыг байгуулж, тухайн үеийн инженер, архитекторуудад тухайн мэргэжлийн чиглэлийн мэдлэг олгох, барилгын үйл ажиллагаанд шаардагдах агуулга бүхий практикт үндэслэсэн ач холбогдолтой сургалтуудаар мэргэшүүлэх, чадавхжуулах зорилгоор энэхүү сургалтын тогтолцоог нэвтрүүлж эхэлсэн. Энэ тогтолцоог анх МБИХ - ны хүндэт ерөнхийлөгч, ШУТИС - ийн доктор, профессор, МУГБ Э.Ганзориг багш маань нэвтрүүлж, суурь үндэслэлийг бий болгож байсан. 

Тасралтгүй мэргэжил дээшлүүлэх тогтолцоо гэдэг бол “Инженер нь ажил эрхэлж байх хугацаандаа тасралтгүй хөгжих механизмыг  мэргэжлийн хариуцлага, ёс зүйтэй нэгтгэсэн систем” юм. Өөрөөр хэлбэл инженер хүн ажил мэргэжлээ эрхлэх хугацаандаа тасралтгүй сурч, хөгжих үйл явцыг хэлж байгаа юм. 

Одоогийн манай салбарын хувьд энэхүү тогтолцоог хэрэгжүүлж байгаа гол эрх зүйн баримт бичиг нь БХБ- ын сайдын 2017 оны 200 дугаар тушаалаар батлагдсан “Барилгын салбарын ажилтны давтан сургалт, мэргэшлийн зэрэг олгох дүрэм” бөгөөд тус  дүрмийн дагуу тухайн хүрээнд хамаарах инженерүүд өөрийн мэргэжлийн үйл ажиллагаанд хэрэгцээтэй, шаардлагатай мэдлэгтэй болох багц цагийн сургалтад хамрагдаж, мэдлэг, бүтээлээ бататгах шалгалтыг өгч тэнцсэнээр мэргэшлийн зэрэг горилох, сунгах байдлаар хэрэгжиж байна. Энэ дүрмийн хэрэгжилтийг Монгол Улсын Засгийн газрын 2010 оны 325-р тогтоол, 2016 оны Барилгын тухай хууль зэрэг эрх зүйн баримтыг үндэслэн салбарын сайдын тушаалаар 2018 оноос эхлэн салбарын төрийн бус байгууллагуудын түншлэлийн хүрээнд 5 жил хэрэгжүүллээ. Мэргэжлийн холбоод сургалтыг эрхэлснээр салбарын хэмжээнд техникийн бодлогыг сургалтаар дамжуулан түгээх, инженерүүдийн мэдлэг, чадварыг сайжруулахтай холбоотой төрийн бодлогын хэрэгжилтийг төрийн зүгээс салбарын мэргэжлийн холбоодоор гүйцэтгүүлж эхэлсэн гэсэн үг юм. Мэргэжлийн холбоод сургалтыг эрхэлснээр сургалтын төрөл, сэдэв, агуулга өргөн хүрээнд нэмэгдэж, тухайн чиглэлийн инженерүүдэд чиглэсэн нийтлэг бус, мэргэжил тус бүрийн онцлог, ур чадварт чиглэсэн сургалтуудыг бий болгосон нь юм. Тодруулбал, сургалт эрхлэх чиг үүргийг хэрэгжүүлсэн мэргэжлийн холбоод энэ дээр маш сайн ажилласан. Харин яагаад тогтолцоо бүрэн сайжрахгүй байна гэхээр зохион байгуулах чиг үүргийг мэргэжлийн бус холбоо хариуцсан учраас системийн гажуудал үүссэн. Энэ нь зохион байгуулах үүрэг бүхий холбоо нь энэ тогтолцоог мөнгө олох үйл ажиллагаа гэж харж, зөвхөн өөрсдийгөө санхүүжүүлэхэд анхаарснаас инженер, мэргэжилтнүүдийг хөгжүүлэх, чадавхжуулах тал дээр огт хайхраагүй, бусад холбоодынхоо санаа, санаачилгыг дэмжиж ажиллаагүй. Ийм учраас манай холбоо бусад 3 холбоодтой хамтран тухайн үеийн түншлэлээс гарсан. Харин 2023 оны 12-р сард бид шинэ түншлэлийг байгуулж, түншлэлийн  гэрээ байгуулан, олон улсад хүлээн зөвшөөрөгдөх инженер, мэргэжилтнүүдтэй бэлтгэх зорилгоор хамтран ажиллах  салбарын 9 мэргэжлийн холбоодын түншлэл бий болсон. 

Яг одоогийн нөхцөл байдлыг харахад архитектор, инженерүүдийн маань “мэргэшлийн зэрэг” нь зөвхөн “барилгын үйл ажиллагаа эрхлэх тусгай зөвшөөрөл” авахад тавигдах суурь нөхцөл төдий болоод, ихэнх инженерүүд энэ зорилгоор л зэрэг горилж, зэргээ сунгаж байна. Уг нь “мэргэшлийн зэрэг” гэдэг зүйл бол тухайн инженерийн мэдлэг, ур чадварын хөгжлийг тодорхойлох, үнэлэх үнэлэмж, ажил мэргэжилдээ хүлээн зөвшөөрөгдсөн, чадамжтай, ёс зүйтэй гэдгийг нотлох, тодорхойлох үнэлэмж юм. Гэтэл энэ байдал ганц байгууллагын цөөн хүнээс болж алдагдаад байна. 

Ийм учраас манай холбоогоор төлөөлүүлсэн түншлэлд энэ гажуудал болон алдааг засах, сайжруулах,  шинэчлэл хийх шаардлага тулгарч байна.

-Одоогийн сургалтын тогтолцоо нь ямар байдлаар явагдаж байна вэ? Барилгын хөгжлийн төв дээр сургалт явагдаад хагас жилийн нүүр үзэж байна. Энэ асуудал юунаас болж үүсэв, цаашид хэрхэн шийдвэрлэх боломжтой вэ? 

-Засгийн газрын тухай хуулийн 19.1, Барилгын тухай хуулийн 34.2 гэсэн заалтуудаар энэхүү чиг үүргийг хэрэгжүүлэх мэргэжлийн холбоод, төрийн бус байгууллагуудын сонгон шалгаруулалтын үндсэн дээр зохион байгуулах чиг үүргийг хэрэгжүүлэх эрхийг өгнө гэж заасан байдаг. Гэвч 2017 оны 12-р сард гарсан БХБ-ын сайдын 215-р тушаалаар “Монголын Барилгачдын Нэгдсэн Холбоо” /МБНХ/ - нд шилжүүлсэн эрх нь ямар ч сонгон шалгаруулалтгүй шууд олгож, олгохдоо тэр холбооны нэрийн дор бусад холбоодыг нэгдэн түншлэл бий болгоод энэ чиг үүргийг хэрэгжүүл гэсэн. Тиймээс уг холбооны зохион байгуулалт дор анх 8 ТББ-уудын түншлэл үүсэж, МБНХ нь зохион байгуулагч, бусад нь сургалт эрхлэх чиг үүргийн хүрээнд тус тусын мэргэжлийн онцлогтой сургалтыг явуулж эхэлсэн. Гэвч МБНХ нь түншлэлийн гэрээгээ зөрчин, дур мэдэн түншлэлийг нэмж, 2020 онд 12 болгосон. 

МБНХ болон БХБЯам хооронд байгуулсан гэрээнд зааснаар зохион байгуулагчийн үүрэгт энэ тогтолцоог сайжруулах, шинэчлэх гэх мэт маш олон үүрэг байсан. Гэвч МБНХ нь үүнийг хэрэгжүүлэх бус, харин сургалт эрхэлж буй  ТББ-уудын сургалтын төлбөрийн орлогоос 10 хувийг нь шимтгэл байдлаар авч байсан. Уг шимтгэлээр түншлэлийн гэрээ болон БХБЯ-тай байгуулсан гэрээнд заасан сургалтад хамрагдсан инженерүүдийн мэдээллийн санг үүсгэх, тестийн баяжуулалт хийх, сургалтын модулийг шинэчлэх зэрэг олон ажлуудыг хийх ёстой байсан боловч зориулалтын бус байдлаар 5 жил ашигласан.  Тестийн шинэчлэлт хийсэн гэх боловч 2018 онд салбарын холбоод болон зөвлөх инженер, мэргэжилтнүүдийн боловсруулсан тестийн хариултын байрлалыг сольж тавьснаас биш доторх агуулгыг нь өөрчилж шинэчлээгүй. Иймэрхүү асуудлуудаас болж 2023 онд БХБЯ-тай байгуулсан гэрээний 4-т заасан үндэслэлээр 2020 онд 12 ТББ болж өргөжсөн түншлэлээс ⅓ нь тэр түншлэлээс гарснаар, МБНХ-ны БХБЯ-тай байгуулсан  гэрээ хүчин төгөлдөр бус болж,  БХБЯ–аас дараагийн түншлэлийг шалгаруулахаар сонгон шалгаруулалтыг зарласан. Үүнийг шийдвэрлэх хүртэлх түр хугацаанд Барилгын Хөгжлийн Төвд тус чиг үүргийг түр шилжүүлсэн. Сонгон шалгаруулалт явагдаж, манай түншлэл шалгарсан боловч гэрээ байгуулах асуудал дахиад тодорхойгүй хугацаагаар хойшлогдсон. Шалтгаан нь МБНХ шүүхэд яамтай холбоотой нэхэмжлэл гаргасан байсан. Ингээд бидэнд, энэ шүүхийн асуудал дуустал гэрээ байгуулахыг түр түдгэлзсэн тухай албан мэдэгдэл ирсэн. МБНХ өнгөрөгч 5 сарын сүүлээр шүүхээс нэхэмжлэлээ татсан боловч, яамнаас тодорхойгүй шалтгаанаар одоог хүртэл гэрээ байгуулаагүй байна.

Гэтэл энэ бүх хугацаанд юу болов? 2023 оны 11 сараас 2024 оны 3 сарыг дуустал БХТ нь “зохион байгуулах” болон “сургалт эрхлэх” чиг үүргийг аль алийг нь хийлээ. Сургалт эрхлэх чиг үүргийн хувьд салбарын хэмжээний 52 хүрээний инженерүүдэд 3 төрлийн 10 агуулга бүхий онлайн нэртэй видео бичлэг бүхий сургалтыг зохион байгуулж, түүндээ 3800 орчим багц цаг бүхий сургалтын гэрчилгээг тараасан байгаа юм. Тодруулбал 2018 оны ТнБД-ын тушаалаар батлагдсан нэг багц цагийн сургалтын төлбөр болох  Мэргэшсэн бол 45,000, Зөвлөх бол 73,000 төг-р дундаж тооцоолбол хэдэн төгрөг болох уу? Нөгөө талаас нь харвал Барилга бүтээцийн хүрээний мэргэшсэн горилох инженер, Цахилгаан хангамжийн угсралтын хүрээний зөвлөх  сунгах инженер гэсэн 2 хүний нэг нь 45,000 төг-р , нөгөө нь 73,000 төг-р ижилхэн сургалтуудын бичлэг үзэж, гэрчилгээ авсан гэсэн үг. Мөн шалгалтад өгөх инженерүүдийн төлбөр 1 хүний 80,000 төгрөг, давтан шалгалт бол 40,000 төг төлдөг бол 2023 оны 11 сар, 2024 оны 04 сард болсон шалгалтуудад ойролцоогоор нийт 2000 орчим инженер, мэргэжилтнүүд оролцсон гэхээр хэд болох уу? Эндээс юу хэлэх гээд байна гэхээр салбарын инженерүүдийн тасралтгүй мэргэжил дээшлүүлэх тогтолцоог сүүлийн хэдэн сард нэг төрийн бус байгууллага, 1 төрийн өмчит компани маш ихээр дордууллаа. Үүнээс болж инженерүүдийн мэдлэг, ур чадварын хөгжил зогслоо, сургалт байхгүй болохоор мэдээж инженерүүд зэрэг горилох, сунгах нь хойшлогдлоо, түүнчлэн тусгай зөвшөөрөл авах, сунгах компаниудын асуудал зогсонги байдалд  ороод байна. 

Хэрэв яам салбарын хөгжил, бүтээн байгуулалтын гол цөм болох мэргэжилтнүүд, инженерүүдээ боддог, өөрөөр хэлбэл хүнээ боддог бол энэ байдлаас гарах гарц бэлэн байгаа. Энэ бол манай 9 мэргэжлийн холбоодын  түншлэл нь 48 хүрээний 225 сэдвийн 910 агуулга бүхий багц цагийн сургалтыг өнөөдөр эхлүүлэхэд  ч бэлэн байна. 

-Сүүлийн үед салбарын инженерүүдийн дунд яригдаж буй нэг зүйл бол сургалтад заавал хамрагдахгүйгээр шууд сертификат авдаг гэх боллоо. Ийм зүйл үнэхээр байдаг уу? 

-Ковид гарснаас хойш цахим сургалт гэж яригдах болсон. Энэ нь давуу тал ч байна. Сул тал ч байна. Давуу тал нь мэдээж, тухайн суралцагч хэзээ ч хаанаас ч боломжтой цагтаа сургалтдаа хамрагдана, мөн давтан үзэж болно, нөхөж болно гэх мэт олон хүчин зүйл байгаа. Нөгөө талаас нь сул талыг нь харвал, видео бичлэг бүхий сургалтыг үзснээр инженерүүд маань асуулт, тодруулах зүйл гарвал шууд хариулт авах боломж байхгүй, ө.х: амьд харилцаагүй учир багштай шууд харилцаж чадахгүй, онлайн платформоор явагдаж байвал төхөөрөмжөө удирдаж чадахгүйгээс дуу яриа сонсогдохгүй, тасалдах гэх мэт зүйлс бас байгаа. Энэ мэт зарим нэг цахим сургалтын асуудлаас шалтгаалан үр дүнгүй сургалтад хамрагдаж, түүнийхээ гэрчилгээг авах байдал гарч байна. Ялангуяа энэ оны эхээр ийм асуудал маш их гарсан. Үүнийг шийдэх гаргалгаа бол өнөөх л тогтолцооны асуудлыг сайжруулах юм.   

-Тэгвэл тогтолцоог хэрхэн сайжруулах вэ? 

-Бидний судалснаар барилгын салбарын инженерүүдийг хөгжүүлэх, чадавхжуулах тасралтгүй мэргэжил дээшлүүлэх тогтоолцоог дэлхийн 100 гаруй улсад тухайн улсын мэргэжлийн холбоод нь гүйцэтгэдэг байна. Манай холбоо 20 гаруй улсын барилгын инженерүүдийн холбоотой хамтран ажилладаг. Мөн бид Азийн барилгын инженерүүдийн зохицуулах зөвлөлийн гишүүн холбоо. Тус зөвлөл Америк, Австрали, Орос, Шинэ зеланд улсууд болон Ази тивийн гээд 21 улс орны барилгын инженерүүдийн холбоодын гишүүнчлэлтэй. Эдгээр холбоодын туршлагаас харахад манайхаас бусад нь бүгд инженерүүдийн мэдлэгийг ахиулах, ёс зүйг мөрдүүлэх сургалтын асуудлаа хариуцан ажилладаг. 

Жишээ нь Америкийн Барилгын Инженерүүдийн Холбооны хувьд гэхэд сургалтыг нь тус холбооны дэргэдэх 9 академи, 6 институт нь хариуцдаг, Японы Барилгын Инженерүүдийн Холбоо сургалт, сургалтын дараах шалгалтаа хүртэл хариуцдаг гэх мэт бусад улс оронд мэргэжлийн холбоод нь хариуцаад явж байгаа. 

Манай улсын хувьд ч энэ жишиг рүү шилжсэн. Одоо бид харин цаашаа хэрхэн сайжруулах вэ гэдэгт л анхаарах нь чухал байна. Яагаад мэргэжлийн холбоод энэ сургалтын асуудлыг хариуцах гээд байна вэ гэхээр одоо мөрдөж байгаа “Барилгын салбарын ажилтны давтан сургалт, мэргэшлийн зэрэг олгох дүрэм” -д барилгын салбарын инженер, мэргэжилтнүүд 52 хүрээгээр мэргэшлийн зэрэгтэй болно. Тэгэхээр тэдгээр мэргэшлийн хүрээ тус бүрд мэргэжлийн онцлог, мэргэжилтний ур чадварт тулгуурласан сургалтуудыг тухайн мэргэжлийн холбоод бүрэн хийх боломжтой.  Мөн дүрэмд заасны дагуу инженерүүд хэрхэн мэргэшдэг вэ гэхээр их дээд сургуульд мэргэжлээ эзэмшиж төгсөөд 5 жилийн дараа МЭРГЭШСЭН инженер болох багц цагийн сургалтад хамрагдсаны дараа, шалгалтаа өгнө. Ингээд зэргээ горилсны дараа 3 жилийн хугацатай 2 удаа сунгана, мэргэшсэн зэрэг нь хугацаагүй болсны дараа ЗӨВЛӨХ зэрэгтэй болоод 5 жилийн хугацаатай 2 удаа сунгах байдлаар явагдаж байгаа. Энэ нь тухайн инженер зэргээ ахиулахын тулд тасралтгүй мэргэшиж, суралцах боломжтой гэсэн үг. Мэдээж анх мэргэшсэн зэрэг горилж байгаа хүн, зөвлөх зэрэг горилж байгаа хүнээс мэргэших мэдлэг, чадварын хувьд ялгаатай байна гэсэн үг юм. 

Тиймээс манай түншлэл инженерүүдийг хөгжүүлэх, тасралтгүй мэргэшүүлэх, ур чадварыг нэмэгдүүлэхийн тулд сургалтын хөтөлбөрийг шинэчлэх, сургалтын төрөл, тоог нэмэгдүүлэх, инженерүүдийн хэрэгцээт сургалтыг бий болгох, холбогдох дүрэм журмыг шинэчлэх гэх мэт маш олон ажлыг шат дараатайгаар хийнэ. Хамгийн гол нь эрх зүйн орчныг сайжруулах нь хамгийн чухал байна. 

Мэдээж энэ асуудалд бид Хот байгуулалт, Барилга, Орон сууцжуулалтын яам, Барилгын Хөгжлийн Төв зэрэг байгууллагуудтай хамтран ажиллаж, хамтдаа л шинэчилнэ.  

-Цаашид танай түншлэл зорилгоо хэрэгжүүлэхийн тулд ямар бодлого чиглэл баримталж ажиллах вэ?  

-ХББОСЯ-аас бидэнтэй гэрээрээ байгуулбал бид нэн түрүүнд сүүлийн 6 сар тасалдсан мэргэшлийн сургалтуудаа хамгийн түрүүнд хийнэ. Түүний дараа “Барилгын салбарын ажилтны давтан сургалт, мэргэшлийн зэрэг олгох дүрэм”-г шинэчлэх, одоо байгаа сургалтын хөтөлбөрөө шинэчлэх, хөтөлбөрийн уялдааг сайжруулах, тогтоолцоогоо сайжруулах ойрын хугацааны стратегийн төлөвлөгөөгөө гаргах, инженерүүдийн хэрэгцээ, шаардлагад нийцсэн мэргэжлийн болон олон улсын сургалтыг бий болгох, шалгалтыг цахимжуулах, сургалтын асуудалтай холбоотой цахим мэдээллийн санг бий болгох гэх мэт маш олон ажлыг төлөвлөж байгаа. Энэ цахим мэдээлийн сан бол хамгийн чухал ажил. Инженерүүд маань сургалтад суугаад л байдаг, хэдэн багц цаг хангаснаа мэддэггүй, эсвэл ямар сургалтад хамрагдахаа мэддэггүй, бас сургалтын мэдээллийг нэг сувгаас авч чадддаггүй, шалгалтын тов, мэдээллийг бас тухай бүр шуурхай авч чаддаггүй. Тиймээс бидний хийх мэдээллийн сан бол энэ бүгдийг нэг цогц болгох юм.  

Эцэст нь хэлэхэд Сургалт зөв тогтолцоогоор явагдвал мэргэшлийн зэрэгтэй инженер нь тусгай зөвшөөрлийн суурь үзүүлэлт төдий биш, харин  инженерүүдийн маань мэдлэг чадвар нь үнэлэгддэг, ёс зүйтэй, хариуцлагатай байж, чанартай бүтээн байгуулалтыг бий болгох, улмаар барилгын чанар сайжрах юм. Тиймээс барилгын салбарт хэрэгжиж буй төрийн бодлогыг сургалтаар дамжуулан инженерүүдэд хүргэх, түүний үр дүнд инженерүүдийн маань үнэлэмж нэмэгдэх нь маш чухал байна.