Монгол Улсад барилгын салбар үүсэж хөгжсөний 98 жилийн ойн хүрээнд зохион байгуулагдаж буй 36 дахь удаагийн BARILGA EXPO барилгын үзэсгэлэн яармаг өнөөдөр Буянт-Ухаа ордонд нээлтээ хийлээ. Дэлхий нийтээрээ ногоон барилга, тогтвортой хөгжлийн бодлогыг хэрэгжүүлж байгаа энэ цаг үед  ногоон бүтээн байгуулалтыг дэмжиж, илүү нийгмийн хариуцлагатай байхыг салбарынхандаа уриалан “Build smart … ” уриа дор энэ жилийн үзэсгэлэн зохион байгуулагдаж байгаа бөгөөд 2024 оны 9-р сарын 6-8 өдрүүдэд үргэлжлэх юм.  

Нээлтийн арга хэмжээнд 36 дахь удаагийн BARILGA EXPO барилгын үзэсгэлэн яармагийн зохион байгуулах хорооны дарга Г.Батсүх, Барилга хот байгуулалт, орон сууцжуулалтын яамны Төрийн нарийн бичгийн дарга С.Төмөрхүү, Байгаль орчин уур амьсгал өөрчлөлтийн яамны сайд С.Одонтуяа, Нийслэлийн Засаг Даргын Тамгын Газрын Хөрөнгө Оруулалтын Хэлтсийн дарга С.Цэдэнсодном, Монголын Ипотекийн Корпорацийн Бизнес хөгжил хариуцсан дэд захирал Ц.Батбаяр болон холбогдох албан тушаалтнууд, 36 дахь удаагийн BARILGA EXPO барилгын үзэсгэлэн яармагийн ерөнхий ивээн тэтгэгч Монцемент Билдинг Материалс ХХК - ийн үйл ажиллагаа хариуцсан захирал Ц.Халиун, Эрээн хотын Боомтын барилгын материалын нийгэмлэгийн тэргүүн Хуан Шиаочин зэрэг 30 орчим зочид төлөөлөгчид хүрэлцэн ирлээ. 

Тус үзэсгэлэн яармагт шинэ орон сууц, хаусны төсөл хөтөлбөр хэрэгжүүлэгчид, барилгын материал үйлдвэрлэгчид, ханган нийлүүлэгчид, дэвшилтэт техник технологи нэвтрүүлэгчид зэрэг барилга бүтээн байгуулалтын салбарт үйл ажиллагаа явуулж байгаа 300 орчим ААН, компаниуд оролцож бүтээгдэхүүн, үйл ажиллагаагаа танилцуулж байна. 

Үзэсгэлэнгийн өдрүүдэд барилгын салбар дахь төрийн бодлого, шийдвэрүүд, Үл хөдлөх хөрөнгийн зах зээл, ипотекийн зээл, ногоон барилга, дэвшилтэт технологиудын талаар салбарын мэргэжилтнүүдийн илтгэл семинарууд тавигдах бөгөөд үзэгч хэрэглэгчдийн асуултад нээлттэй хариулах юм. 

Түүнчлэн оролцогч компаниуд нь шинэ орон сууцны төслүүд болон бүтээгдэхүүн үйлчилгээндээ 40 хүртэлх хувийн хөнгөлөлт урамшуулал зарлаж байгаа бөгөөд ипотекийн зээл, хувь лизинг, ногоон зээлд  хамрагдах боломжтой орон сууцны төслүүд танилцуулагдана. Хөнгөлөлт урамшуулалтай танилцах бол ЭНД ДАРНА УУ.