Барилга байгууламж гэдэг аль ч цаг үед өөр өөрийнхөө түүхийг өгүүлсээр байдаг. Улс орон хөгжихийн хэрээр барилга байгууламжийн өнгө төрх, загвар хийц ч өөрчлөгдөж байна. Өнөө үед барилга байгууламжийг урлаг талаас нь харж бүтээн босгодог болсон. Харин үүнийг хүн бүр өөр өөрийнхөө нүдээр харж, тайлбарлаж байна.

     Монгол улсад барилгын салбар үүсч хөгжсөний 85 жилийн ойд зориулж “Барилга.МН” БЗМТөвөөс INET гэрэл зургийн студитэй хамтран “Барилгачны алдар” фото зургийн уралдааныг зарласан юм.

“Барилгачны алдар” фото зургийн уралдааны гол зорилго нь барилгын салбарын бүтээн байгуулалт, салбарын хөгжил, барилгачны ажлын байран дахь дүрийг гаргахад энэхүү уралдааны ач холбогдол оршиж байсан бөгөөд

·         Шилдэг барилга

·         Барилгачны хөдөлмөр

·         Барилгачны алдар

·         Сонин содон барилга гэсэн сэдвүүдээр нийт 80- аад бүтээл ирсэн юм. Энэхүү фото зургийн уралдаанд Дорнод аймгаас хүртэл фото зургууд ирсэн нь энэ уралдаан нилээн өргөн хүрээг хамарч чадсаныг харуулж байна.

      Уг зургын уралдаанд ирсэн бүтээлүүдээс мэргэжлийн шүүгчдийн бүрэлдэхүүн шилдэг бүтээлийг нь шалгаруулсан бөгөөд “Барилгачны алдар” фото зургийн уралдааны тэргүүн байрыг У. Одбаяр, II- байрыг А. Оюунчимэг, III- байрыг Ө. Эрдэнэхүү нарын бүтээлүүд шалгаран барилгын салбар үүсч хөгжсөний 85 жилийн шилдгүүдийг шалгаруулах ёслолын ажиллагаан дээр шилдэг бүтээлийн эзэнд шагналыг нь гардууллаа.