Авлигатай тэмцэх газраас УИХ-ын гишүүн асан Ц.Гарамжавт холбогдуулан хэрэг бүртгэлтийн хэрэг нээж, яллагдагчаар татан шалгаж буй. Ц.Гарамжавт үүсгэсэн хэрэгтсхолбогдуулан түүний үүсгэн байгуулсан нэр бүхий компаниудад нэгжлэг хийж, зарим үйлдвэрийг нт хаагаад хоёр сар гаруй болж байна. Харин уг үйл явдалтай холбогдуулан Монополимент группын удирдлага болон ажилчид хууль хүчний уг үйлдэл, ялангуяа компаниудын данс болон ажлын байрыг нь хаасанд эсэргүүцлээ илэрхийлж, хэвийн ажиллах нөхцөлөөр хангахыг удаа дараа шаардсаар байгаа юм. Тэгвэл өнөөдөр Монполимет группийн ТУК-ийн дарга Н.Мөнхнасан хууль хүчний байгууллагын шударга бус үйлдлийн улмаас 1000 гаруй ажилчинтай ААН дампуурах нөхцөл үүслээ гэж мэдэгдлээ.

Тэрбээр "Монполиметийн 6 салбар компанийн нийт 46 дансыг ямар нэгэн үндэслэлгүйгээр хааснаас өнөөдрийн байдлаар 19 данс битүүмжлэлтэй хэвээр байна. Эрүүгийн хэргийн бүх ажиллагаа хуульд нийцэж, эрх бүхий албан тушаалтны зөвшөөрлөөр явах ёстой байтал Хөгжлийн банкны гэх хэрэгт ямар ч хамааралгүй компаниуд болон гэр бүлийн гишүүдийн бүх хувийн данснуудыг хаасан нь Монгол Улсын Үндсэн хуулиар олгогдсон эрхийг зөрчиж, тэр дундаа хүний эрх эрх чөлөөнд халдсан үйлдэл болж байна. 

Бид Авлигатай тэмцэх газар болон Нийслэлийн Прокурорын газарт Үндсэн хуульд заасан хөдөлмөрлөх эрхээ сэргээлгэж, үйл ажиллагаа нээлгэх, бусад хууль бус ажиллагааг таслан зогсоолгох тухай 100 гаруй хүсэлт илгээсэн боловч өнөөдрийг хүртэл тодорхой үндэслэл шалтгаангүйгээр татгалзсаар байна. 

Үйл ажиллагаа болон данс хааснаас хойш 76 хоног, Тосон үйлдвэрийг битүүмжилснээс хойш 71 хоног өнгөрч үйл ажиллагаа доголдож, 1000 гаруй инженер техникийн ажилтнуудын маань Үндсэн хуулиар хамгаалагдсан хөдөлмөрлөх эрх нь ноцтой зөрчигдөж, өдрөөс өдөрт цаг хугацаа, эдийн засгийн хувьд асар их хохирол үүсч, хагас жилийн тайлангийн байдлаар дампуурлаа зарлах хэмжээнд хүрээд байна. 

Хууль хүчний байгууллагын шударга бус үйлдлийн улмаас хувийн аж ахуйн нэгж дампуурсан түүх ийнхүү үүслээ" гэж мэдэгдлээ.

Мөн өчигдөр Монполимет группийн Гүйцэтгэх захирал Б.Дэлгэр "Тосон үйлдвэрийг хаахаас хэд хоногийн өмнө лицензээ зарчих гэж нэгэн сайд хэд хэдэн удаа залгасан. Манай лицензийг булаах гэж элдэв асуудал нялзайж, Үнэн ба зөв нам гэх мэт нөхдөөр гүтгүүлж удалгүй үйл ажиллагааг хаасан. Сценарийнх нь дагуу биднийг туйлдахыг хүлээж суугаа байх. Ард түмэн нүдтэй шүү" гэж жиргэжээ.