Орчин үеийн хачирхалтай бүтээл "Цагаан мод"
Төслийн нэр: “Цагаан мод” цамхаг /L’Arbre Blanc Residential Tower/
Архитектор: Димитри Руселл, Манал Ради , Николас Ласне , Со Фүжимото
Байршил: Франц, Монтпелье хот
Талбайн хэмжээ: 10225м2
Ашиглалтад орсон он: 2019 он
Японы архитектор Со Фужимото /Sou Fujimoto/ Францын Монтпелье хотод олон төрөлт үйл ажиллагаа явуулах боломжтой цамхаг барьж сүндэрлүүлжээ. "Цагаан Мод" буюу "L’Arbre Blanc" гэж нэрлэгдсэн энэхүү цамхаг нь Николя Леснэ, Димитри Руссел болон OXO Architectes-ийн хамтарсан бүтээл бөгөөд орон сууц, ресторан, урлагийн галерей, оффис, панорам бар болон нийтийн талбайнуудаас бүрдсэн байна.
Уг цамхаг нь Монтпелье хотын хуучин болон шинэ хэсгүүдийн хооронд стратегийн байршилд байрладаг бөгөөд тэнгис далай, хотын үзэмж, Лез голыг толидон харж суух гайхалтай харууцтай байхаар төлөвлөгдсөн байна. Монтпелье хотын зөвлөлөөс 2013 онд хотын архитектурын өвийг баяжуулахыг зорьж, "Folie Richter" буюу "орчин үеийн хачирхалтай бүтээл" уралдааныг зохион байгуулсан бөгөөд уг уралдаанд энэхүү бүтээл шалгарч, 2019 онд биежиж сүндэрлэсэн түүхтэй.
Уг барилгыг олноос онцгой, анхдагч болгож буй зүйл нь архитектур төлөвлөлт, дизайн бөгөөд хоёр улсын соёлыг илэрхийлжээ. Нэг нь Газар Дундын тэнгис, нөгөө нь Японы соёлыг харуулсан байна. Тагтны хэсэгт онцгой анхаарч 7.5 метр урттай консол бүхий тагтнуудыг төлөвлөж өгснөөрөө дэлхийд анхдагч болсон юм. Тагтнууд нь модны их биеэс салаалж, нарны хаалт нь фасадаас ургаж буй мөчир мэт харагдахаас гадна нарнаас халхлах сүүдрэвчийн үүргийг давхар гүйцэтгэж байгаа аж. Нарны гэрлийг эрэлхийлдэг навчис шиг гадагш чиглэсэн эдгээр тагтнуудыг төлөвлөхдөө агаар сэлгэлтийн асуудалд онцгой анхаарсан байна. 
Орон сууц бүр хамгийн багадаа 7м2 гадна талбайтай (хамгийн том нь 35 м2) бөгөөд олон түвшний нууцлал болон зохион байгуулалтын сонголтуудтай. Дуплекс орон сууцны оршин суугчид нэг тагтаас нөгөөд шилжих боломжтойгоор төлөвлөгдсөн. Уг барилга нь ашиглалтад орсноос хойш жуулчдын анхаарлыг ихээхэн татах болсон бөгөөд уншигч та тус хотоор аялж байгаа бол дэлхийн хамгийн урт консол бүхий тагтан дээр тухлаад гайхалтай харууцыг тольдон суух боломжтой юм.
Уншигчдын бичсэн сэтгэгдэлд barilga.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү.