Монгол Улсын Засгийн Газрын 188-р тогтоолоор цементийн гаалийн албан татварыг 20 хувиас 5 хувь болгон бууруулсантай холбогдуулан  96 дугаар тушаалаар байгуулагдсан ажлын хэсэг цементийн чанарт хяналт, шалгалт хийжээ.

Шалгалтын хүрээнд хийгдсэн шинжилгээнүүд, гарсан зөрчил, холбогдох арга хэмжээний талаар Хот байгуулалт, барилга, орон сууцжуулалтын яамны Барилгын материалын хэлтсийн дарга Д.Батзориг, Нийслэлийн хяналт шалгалтын газрын барилгын техникийн хяналтын улсын байцаагч С.Мөнхцэлмэг нар газар дээр нь мэдээлэл өглөө.

Шалгалтаар барилгын материалын 44 зах дээр худалдан борлуулж буй БНХАУ-ын цементээс нийт зургаан дээжийг газар дээрээс нь авч, шинжилгээнд хамруулахад гурван дээжийн шахалтын бат бэх нь 42.5 МПа байхаас 42МПа, 39.9 МПа, 41.5 МПа гарсан байна.

 Дээрх гурван дээжний хоёр нь стандартад заасны дагуу хүлцэх алдаа буюу бага зэргийн согог, стандартын шаардлагаас байж болох хэлбэлзэл 40МПа байж болохоор заасанд хамаарч байгаа бол 39.9 МПа гарсан нэг дээж шаардлага хангахгүй байгаа юм. 

Чанарын шаардлага хангаагүй тус нэг дээжид нарийвчилсан шинжилгээ хийж Барилгын техникийн хяналтын улсын байцаагчийн дүгнэлтийн дагуу холбогдох арга хэмжээг авч ажиллах юм.