“Анхны Монголын хувь нийлүүлсэн хоршоо” гэсэн нэртэйгээр нэгэн зууны өмнө үндэс сууриа тавьж байсан түүхтэй, та бидний нүдний өмнөх бүтээн байгуулалтын гэрчүүд болсон манай барилгын салбарынхан үүсч хөгжсөн 85 жилийн түүхт ойн баяраа бахархалтайгаар тэмдэглэн өнгөрүүллээ. Барилгын салбарынханд бахархууштай зүйл тоолж барамгүй олон байдаг. Харин тэдэнд жинхэнэ утгаараа бахархах агшин нэг л тохиодог юм шиг. Төлөвлөсөн нүсэр бүтээн байгуулалтынхаа ард гараад сэтгэл уужим амьсгалж, бидний гараар бүтсэн энэ барилга дотор хүмүүс аз жаргалтайгаар амьдарч, ажиллана гэж бодохдоо өөрсдөөрөө бахархдаг болов уу. Ийм л сэтгэл огшоом бахархах зүйл ихтэй, алтан гарт барилгачдынхаа хөдөлмөр, хөлс хүчийг төр засгаас үнэлэн оны шилдэг 10 байгууллагыг шалгаруулсан юм.

x

Монгол Улсад барилгын салбар үүсч хөгжсөний 85 жилийн ойн баярын нээлтийн ажиллагаа 2011 оны 09 сарын 02-ны өдрийн 11 цагт “Барилгачдын талбай”-д шилдгүүдээр шалгарсан 10 байгууллагын туг залах ёслолоор эхэлсэн билээ. Цэргийн ансанбль сүрт ая эгшиглүүлж, барилгын салбарын оны шилдэгээр шалгарсан байгууллагуудын тугийг хүндэтгэлтэйгээр “Барилгачдын талбай”-н магнайд залсан юм. Энэ жил барилгын салбарын шилдгүүдээр “Бридж констракшн” ХХК, “Цамхаг констракшн” ХХК, Суруга Монгол” ХХК, “Макс Өргөө” ХХК, “Цац Суварга интернэшнл” ХХК, “Монгол Керамик” ХХК, “Байгууламж-Од” ХХК, “Хөтөл Цемент Шохой” ХХК, “Шифт” ХХК, МСS Property LLC гэсэн гарын арван хуруу шиг бүтээн байгуулалтыг буухиалан босгосоор гялалзсан амжилт гаргасан байгууллагууд шалгарчээ.

Салбартаа тэргүүлсэн барилгачиддаа үзүүлэх хүндэтгэл өртөөлөн явах “Хүндэтгэлийн цуваа”-аар үргэлжилсэн юм. Урьд өмнө нь зохиогдож байгаагүй энэхүү үйл ажиллагааг Барилга.МН БЗМТөвийн хамт олон санаачилсан аж. “Барилгачдын талбай”-аас барилгын салбар үүсч хөгжсөний 85 жилийн ойн тугаа өөрсдийн нэр хүндийн хамт мандуулсаар шилдгүүдээр түүчээлсэн цуваа “Барилга экспо-2011” олон улсын үзэсгэлэн яармагийг зорин хөдөлсөн. “Хүндэтгэлийн цуваан”-д шилдэг арван байгууллагаас гадна МБХ, МБҮЭХ, ойн баярын ерөнхий ивээн тэтгэгч байгууллагууд болох “Номин констракшн” ХХК, “Их Үйлсийн Эрэлд” ХХК болон Барилга.МН БЗМТөв оролцсон байна. “Хүндэтгэлийн цуваа”-нд оролцогч байгууллагууд Монгол Улсын хөгжлийг дэлхийд тодорхойлох өнгө аясыг илтгэсээр 4 дэх жилдээ зохиогдож байгаа “Барилга экспо-2011” олон улсын үзэсгэлэн яармагийн нээлтэнд оролцсоны дараа тус ойн баярт зориулсан “Барилгачны алдар” гэрэл зургийн үзэсгэлэнг сонирхсон юм.

Ингээд цуваа дараагийн өртөө болох Монгол Улсад барилгын салбар үүсч хөгжсөний 85 жилийн ойд зориулсан хүчит 128 бөхийн барилдааныг үзэхээр Монгол бөхийн өргөөнд очлоо. Шилдгүүд маань байгууллагынхаа нэр төрийн баталгаа болсон хүндэт туг, сүр жавхаагаа мандуулан Монгол бөхийн өргөөг тойрон алхсаар хүчит бөхийн барилдааныг эхлүүлсэн билээ. Үе үеийн ахмадууд, барилгачин залуус маань Монголчууд бидний гайхамшигт соёлын өв болсон Эрийн гурван наадмын нэг эд хаваа гайхуулан хүчийг үзэх бөхийн барилдааныг үзэж, эх орныхоо бүтээн босголтыг үргэлжлүүлэх шинэ эрч хүч авлаа хэмээн хөөрөлдөж байсныг дурдахад таатай байна.