Zurich нуурын эрэг дээрх Google компанийн оффис 

Google компанийн оффисын тухай "аварга хүмүүсийн оромж" гэх яриа байдаг бөгөөд үлэмж биетүүдэд зориулсан мэт дотоод засал чимэглэл нь гоёмсог, ер бусын дизайн нь сонирхолтой. larry Page-ийн үзэл баримтлалын дагуу оффисууд нь ажилчдыг аль болох тав тухтай байлгах, улмаар бүтээмжийг илүү нэмэгдүүлэх зорилготой юм. 

Google компани нь бизнесийг таашаалтай хослуулж, амарч, эрч хүчээ сэргээж, ажилтаны бүтээлч сэтгэлгээг  хөгжүүлэх тухтай ажлын орчинг бий болгоход анхаардаг бөгөөд үүний тод жишээ нь Швейцарын хамгийн цэнгэг, бүлээхэн устай гэдгээрээ алдартай Zurich нуурын ойролцоо 2000 орчим ажилтантай Evolution Design-аас тохижуулсан оффис билээ. 

Зуу гаруй том ургамал хүрээлсэн жижиг ширэнгэн ой мэт харагдах өрөөнд, шалнаас тааз хүртэлх гулсуур, хөвөнгөөр дүүргэсэн аквариум шиг амрах өрөө зэргээр зогсохгүй хүүхдүүдэд зориулсан тоглоомын өрөө ч бий.

Мадридын ойролцоох Selgas Cano

Иван Бааны санаачилсан оффис нь хэмжээ чухал биш гэдгийг харуулсан хамгийн шилдэг загвар юм. Тэрбээр жижиг талбайг ч саруулхан болгон олон талаас нь ашиглан чадварлаг зохион байгуулж чаддаг. Иван Бааны загварыг нь гарган санаачилсан уг оффисын нэг талын хана нь бүхэлдээ шилэн бөгөөд гадаах орчныг шууд харах боломжтой. Selgas Cano компанийн уг оффисыг  байгалд зөөн байрлуулж болдог аж. 

Оффисын дотор тохижилт нь нэлэнхүйдээ цулгуй цагаан өнгөөр бүрхсэн нь цонхоор харагдах байгалийн үзэмжтэй нийцдэгээс гадна хэвшсэн дөрвөлжин цонх барилгын загварыг шинэчилсэн хэмээн архитекторууд үнэлдэг байна. Хүйтэн хурц гэрэлтүүлэггүй нарны гэрэл шууд дээврийн цонхоор нэвт дамжин тусдаг бөгөөд бүх ширээ нь хананы нэг талд байрладаг. Biophilia дизайн нь байгалийг дотоод засалд нэвтрүүлэх бус харин дотоод засалыг хүрээлэн буй байгальд шингээх замаар шийджээ.

Канад дахь Corus Quay-ын оффис

Канад дахь Corus Quay-ийн төв оффис нь дэлхийн хамгийн том, хамгийн шинэлэг оффисуудын нэг юм. 46 мянган м2 талбайтай, 1100 гаруй ажилчдыг нэг дор хамруулсан архитектор Жак Даймонд болон түүний дизайнеруудын ур ухаанаар бүтсэн уг оффис дизайны санаа нь найрсаг нээлттэй байдлыг бий болгохыг зорьсон байна. Таван давхраас доош буух битүү хоолой бүхий хэлбэртэй гулсуур, урам зориг өгөх тод өнгө, телевиз, радио студи, асар том дэлгэц, хоккейн талбайн хэлбэртэй ширээ бүхий хурлын танхим зэргээс дизайнеруудын илэрхийлэхийг хүссэн гол санааг харж болно. 

Biophila шийдэл нь Канадын оффисын маш том давуу тал болж байгаа юм. Эрчим хүч, усны хэрэглээ, дахин боловсруулсан материалын хэрэглээ багасгахаас гадна оффисын агаарыг цэвэр байлгах зорилгоор барилгын давхар бүрт бүхэлдээ амьд ургамлаар бүрхэгдсэн ногоон хана байгуулсаныг онцлох  нь зүйтэй. 

Калифорниа дахь Adobe компанийн оффис

Калифорни дахь Adobe-ийн төв байр нь орчин үеийн оффисын иж бүрэн ногоон байгууламж ямар байх ёстойг харуулсан хамгийн сайн жишээнүүдийн нэг гэлцдэг. Gesler компанийн дизайн нь гурван тусдаа цамхагийг нэгтгэж, нэгэн цул кампус болгосон юм. Бусад компаниудын адил ажилтаны ая тухыг хангахаас гадна тэдний эрүүл мэндэд ч мөн анхаарчээ. Байгалийн зөөлөн ногоон өнгө болон модон материал ашиглан тав тухыг бүрдүүлсэн байна. Байгалийн гэрлийг хангалттай нэвтрүүлэхийн тулд уужим саруул цонх, дүүжин сандал болон тасалгааны ургамалыг ч байрлуулжээ.  

Амьд ургамал, хөвд, зүлгэн хивс, пикник маягийн модон хөлтэй ширээ, түүнчлэн хана, таазанд суурилуулсан модон хайрцаг зэрэг нь ажилчдад байгалийн ландшафттай харилцах мэдрэмжийг төрүүлдэг аж. Энэхүү байгалийн мэт уур амьсгалыг бүрдүүлэхийн тулд геометрийн элдэв дүрс, мэргэжлийн модон эдлэл ашигласнаараа онцлог.

Миланы Thinkgarden оффис 

ThinkGarden хэмээх ид шидийн оффисын архитекторууд Сара Карлини, Радим Тадлек нар амьд байгальтай хамт байвал ажлыг хамгийн сайн гүйцэтгэдэг гэх зарчмын дагуу ажлын оффис нь байгалийн ландшафтыг харуулах байдлаар хийсэн байдаг. Чимэглэлүүд нь хус ойн ханыг дуурайлган хийсэн бөгөөд задгай талбай бүхэлдээ ургамал, цэцэг, тэр ч байтугай модны гайхалтай сорьц суулган чимэглэжээ. Цасан цагаан өнгийн тавилгыг зүлэгний ногоон өнгөтэй нийцүүлэн эв найртай нэгдмэл байдлыг бүрдүүлсэн байна. Энэхүү бүтээлч бизнес оффисын зорилго нь хотын дуу шуугианаас тусгаарлагдсан, тайвшруулах байгальд буцаж очсон мэт мэдрэмж төрүүлэх юм. 

Архитекторуудын "бизнес хийх нь байгалийн зүйл" гэсэн уриа уг оффисын уулзалтын өрөөнөөс шууд харагдана. Хөл нүцгэн алхах боломжтой зүлэг, байгалийн дуу чимээ зэрэг нь ажлын стрессгүй орчныг бүрдүүлэхэд оршино.