Барилга угсралт, их засварын ажлын гүйцэтгэл 2024 оны эхний улиралд 1.2 их наяд төгрөг болж, 1.2 (97.1%) их наяд төгрөгийн ажлыг дотоодын барилгын байгууллага, 33.9 (2.9%) тэрбум төгрөгийн ажлыг гадаадын барилгын байгууллага гүйцэтгэсэн байна.

ХҮСНЭГТ 1. БАРИЛГА УГСРАЛТ, ИХ ЗАСВАРЫН АЖИЛ, гүйцэтгэгчийн төрлөөр, жил бүрийн эхний улирлын байдлаар

Барилга угсралт, их засварын ажил 2024 оны эхний улирлын гүйцэтгэлээр өмнөх оны мөн үеэс 278.2 (30.6%) тэрбум төгрөгөөр өсөхөд дотоодын байгууллагын гүйцэтгэсэн барилга угсралт, их засварын ажил 255.2 (28.4%) тэрбум төгрөгөөр өссөн нь голлон нөлөөлөв.

Харин дотоодын барилгын байгууллагаас хувийн байгууллагын гүйцэтгэсэн барилга угсралт, их засварын ажил 1140.6 тэрбум төгрөг болж, өмнөх оны мөн үеэс 251.7 (28.3%) тэрбум төгрөгөөр, төрийн байгууллагын гүйцэтгэсэн барилга угсралт, их засварын ажил 8.2 тэрбум төгрөг болж, өмнөх оны мөн үеэс 3.7 (81.3%) тэрбум төгрөгөөр өссөн бол гадаадтай хамтарсан байгууллагынх 4.5 тэрбум төгрөг болж, 0.2 (4.5%) тэрбум төгрөгөөр буурсан байна.

ЗУРАГ 1. БАРИЛГЫН БАЙГУУЛЛАГЫН ГҮЙЦЭТГЭСЭН БАРИЛГА УГСРАЛТ, ИХ ЗАСВАРЫН АЖЛЫН ХЭМЖЭЭ, жил бүрийн эхний улирлын байдлаар, тэрбум төгрөг

Энэ оны эхний улиралд барилга угсралт, их засварын ажлын 44.4 хувийг орон сууцны барилга, 39.6 хувийг орон сууцны бус барилга, 14.8 хувийг инженерийн барилга, байгууламж, 1.2 хувийг их засварын ажил эзэлж, өмнөх оны мөн үеэс инженерийн барилга, байгууламжийн ажлын эзлэх хувь 10.3 нэгж хувиар, орон сууцны бус барилгынх 1.0 нэгж хувиар өссөн бол орон сууцны барилгынх 11.0 нэгж хувиар, их засварын ажлынх 0.4 нэгж хувиар тус тус буурсан байна.

ХҮСНЭГТ 2. ОРОН СУУЦНЫ БУС БАРИЛГА, төрлөөр, жил бүрийн эхний улирлын байдлаар

Орон сууцны бус барилгын ажил 2024 оны эхний улирлын гүйцэтгэлээр 470.3 тэрбум төгрөг болж, өмнөх оны мөн үеэс 119.7 (34.1%) тэрбум төгрөгөөр өссөн байна. Үүнд худалдаа, үйлчилгээний барилгын ажил 34.3 (2.1 дахин) тэрбум төгрөгөөр, бусад орон сууцны бус барилгынх 38.0 (71.8%) тэрбум төгрөгөөр, сургууль, соёлын барилгынх 35.6 (66.2%) тэрбум төгрөгөөр, эмнэлгийн барилгынх 4.2 (47.0%) тэрбум төгрөгөөр, үйлдвэрийн барилгынх 7.6 (3.7%) тэрбум төгрөгөөр тус тус өссөн байна.

ЗУРАГ 2. ДОТООДЫН БАРИЛГЫН БАЙГУУЛЛАГЫН ГҮЙЦЭТГЭСЭН БАРИЛГА УГСРАЛТ, ИХ ЗАСВАРЫН АЖЛЫН ХЭМЖЭЭ, аймаг, нийслэлээр, 2024 оны эхний улирал, тэрбум төгрөгөөр

Улаанбаатар хотод 2024 оны эхний улирлын урьдчилсан гүйцэтгэлээр 683.4 тэрбум төгрөгийн барилга угсралт, их засварын ажил хийгдсэн нь улсын дүнд 59.3 хувийг эзэлж, өмнөх оноос 1.7 нэгж хувиар буурсан байна.

Дотоодын барилгын байгууллагын гүйцэтгэсэн барилга угсралт, их засварын ажлын гүйцэтгэлийг аймгаар авч үзэхэд 2024 оны эхний улирлын урьдчилсан гүйцэтгэлээр Өмнөговь аймагт 296.3 тэрбум төгрөг, Дархан-Уул аймагт 31.9 тэрбум төгрөг, Орхон аймагт 18.2 тэрбум төгрөгийн ажил гүйцэтгэсэн нь аймгуудын барилга угсралт, их засварын ажлын дүнд 73.7 хувийг эзэлж байна. Өмнөговь аймгийн нутаг дэвсгэрт Оюу толгойн далд уурхайн бүтээн байгуулалтын ажил, төмөр зам болон автозамын ажлууд, Дархан-Уул аймагт зам засвар өргөтгөлийн ажил, орон сууцны барилгын ажлууд, Орхон аймагт Эрдэнэт үйлдвэрийн барилгын өргөтгөлийн ажил, орон сууцны барилга зэрэг ажлууд эрчимтэй явагдсан байна.