2005 оноос эхлэн нийслэл болон ойр орчмын бүсэд үүссэн газар хөдлөлтийн тоо эрс нэмэгдсэн төдийгүй нийслэл орчимд үүсээд буй хүчтэй газар хөдлөлтийн голомтуудад үнэлгээ хийхэд Улаанбаатар хотоос баруун тийш 50 км-ийн зайд 80 км гаруй урттай хагарал байгаа нь тогтоогдсон байдаг. Ийнхүү нийслэл хотноо 7.5 болон түүнээс дээш магнитудын хүчтэй газар хөдлөлт болоход хотын нийт барилгажилтын 20-30 хувь нь ямар нэг байдлаар эвдрэх, нурах эрсдэлтэй гэсэн судалгаа байдаг. 

Иймд та бүхэндээ энэ удаагийн дугаартаа Улаанбаатар хотын газар хөдлөлийн 8 балл эрчимтэй бүс нутагт баригдахаар төлөвлөгдсөн 80 м2 амины орон сууцны төлөвлөлт ба төсвийн тооцооллыг хүргэж байна. 

Уг барилга нь тэнхлэгээрээ 13*8,2м хэмжээтэй зоорьгүй нэг давхар барилга бөгөөд үндсэн хийцлэл нь цутгамал төмөр бетон арагтай, 3 төрлийн суурьтай, цутгамал хучилттай. Мөн энгийн болон цэвдэгтэй, хөрсний устай гэх мэт төрөл бүрийн буурь хөрсөнд барих боломжтойгоор ажлыг зураг төслийг боловсруулсан. Тиймээс та уг зураг төслөөр барилгаа барихаар шийдсэн бол барилга угсралтын ажлыг тусгай зөвшөөрөл бүхий мэргэжлийн байгууллага, инженер техникийн ажилчдын удирдлаганд хийж гүйцэтгэх хэрэгтэй ба гадна заслын ажлыг хүйтний улиралд гүйцэтгэхийг хатуу хориглоно гэдгийг бид нийтлэлийнхээ эхэнд сануулъя. 

    -    Гадна агаарын тооцооны температур: -39С

    -    Цасны ачаалал: 50кг/м2

    -    Салхины ачаалал: 35кг/м2

    -    Газар чичирхийллийн балл: 8балл (MSK-64 шаталбар)

    -    Барилгын хариуцлагын зэрэг: III (Хариуцлагын зэрэг 1,0)

Буурь хөрс: 

Захиалагчаас буурь хөрсний талаар мэдээлэл өгөөгүй тул хөрсийг сонгохдоо олон жилийн цэвдэг хөрсний дээд хил- 2,6м байна. Шавранцар хөрсний механик шинж чанар нь: 

    -    Барьцалдах хүч Cн=44kПа

    -    Дотоод үрэлтийн өнцөг фo=20

    -    Хөрсний хэв гажилтын модуль E=14МПа

Тооцооны эсэргүүцэл Ro=250кПа

Архитектур төлөвлөлт: 

Барилга руу орох үндсэн нэг орцтой, барилгын үүдэн хэсэгт шат, довжоо шилэн фасад бүхий террас, саравч төлөвлөгдсөн. Барилга руу гонхоор дамжин орох ба гонхоос халаалтын техникийн өрөө, хонгил руу орно. 

Суурь: 

Котлованыг механизмаар ухахдаа суурь суулгах төслийн түвшнээс дээш 20-30 см дутуу ухаж, түүнээс доош төслийн гүн хүртэл гараар ухах хэрэгтэй. Барилгын суурийг угсармал баганан суурьтайгаар төлөвлөв. Суурь суух гүнийг -3.00м байхаар тооцов. Суурийн бетоны анги B20 (M250), Арматурын анги AIII (A400), AI (A240) байна. Суурийн доор 20 см зузаантай давтаж нягтруулсан элсэн дэвсгэр хийнэ. Бетоны ажлыг гүйцэтгэхдээ “Цутгамал бетон, төмөрбетон бүтээц. Угсралтын БНбД 52-02-05, цутгамал төмөрбетоны ажил гүйцэтгэх заавар БД52-104-04-ийн холбогдох заалтуудын дагуу хийнэ. Буурь суурийн ажлыг БНбД52-02-05-г баримтлан гүйцэтгэвэл зохино. Суурийн хөрстэй харьцах бүх хэсэгт MNS 6303:2016 стандартын шаардлага хангасан ус чийгнээс хамгаалсан хар тосон түрхлэг 2-3-н үе сайтар түрхэнэ. Суурийг буцаан булахдаа овойлт үүсгэхгүй хайрган хөрсөөр чигжих бөгөөд өндөржилт зургийн тохижилтын түвшин хүртэл булна. 1,63гр/см3 хүртэл 20 см тутамд үечлэн нягтруулна. 

Довжоо, шат: 

Гадна довжоо нь төлөвлөлтөөр гадрын түвшингээс дээш 600мм байхаар төлөвлөгдсөн ба довжооны хэсэгт шилэн фасад бүхий тагт, террас, цутгамал саравч төлөвлөгдсөн. Шат довжоо нь эргэн тойрондоо шилэн хаалттай ба шилэн хаалт нь төмөр арамтай, хатаалгатай шилтэй байна. Гадна довжоо нь цутгамал төмөр бетон хийцлэлтэй. 

Ариун цэврийн өрөө: 

Уг барилгын ариун цэврийн өрө өнь гадна хананд төлөвлөгдсөн ба гадна хананы хэсэгт дотор талаас нь Сu төмөр арамтай хөөсөнцөр дулаалга 100мм хийж, ус чийгт тэсвэртэй гипсэн хавтан 12мм-аар 2 үе угсарч дотор засал хийнэ. 

Гадна хана: 

Гадна хана нь 250мм хөнгөн блок дүүргэгч ханыг гал дэмждэггүй, 200мм зузаан, V=30кг/м3 нягттай EPS хөөсөнцөр хавтангаар дулаалж, 50 мм тортой бетон шаварлаг хийн гадна өнгөлгөө эмульсэн будгаар будна. Гадна тортой бетон өнгөлгөөний торыг ханын тортой үе тутамд бэхэлж өгнө. 

Дотор хана: 

Бүх дотор хана нь 120мм тоосгон өрлөг байх ба ханыг хоёр талаас нь Cu төмөр арамтай хөөсөнцөр дулаалга 100мм хийж гипсэн хавтан 12 мм-аар угсарч дотор засал хийнэ. 

Шал: 

Барилгын шал нь суурийн төрлөөс хамаарч 80мм цутгамал бетон, 160мм цутгамал төмөр бетон шалтай байна. Шалны бүтэц нь өрөөний зохион байгуулалт, үйл ажиллагааны төрлөөс шалтгаалан шалны байгуулалтын зураг төслийн дагуу угсрагдана. Цутгамал шалыг угсрахдаа 200мм нягтруулсан шороон дээр ус тусгаарлагч дэвсэж, 100мм V= 30кг/м3 нягттай EPS хөөсөнцөр хавтангаар дулаалж 80 мм цутгамал шал цутгана. 

Дээвэр, парпет хана: 

Барилгын хучилт нь 160 мм зузаантай төмөр бетон цутгамал хучилт байх ба 250 мм зузаантай, галд шатдаггүй, 25кг/м3 нягттай, EPS хөөсөнцөр хавтангаар дулаалж технологийн дагуу ус тусгаарлалт хийнэ. Барилгын парпет хана нь 150 мм зузаантай цутгамал төмөр бетон хана байхаар төлөвлөгдсөн. Агааржуулалтын шахтны хана нь 150мм цутгамал хана ба агааржуулалтын хоолойг тойруулан шахтны нүхийг эрдэс хөвөнгөөр чигжиж дүүргэнэ. 

Хаалга цонх, шилэн фасад: 

Бүх хаалга, цонх, шилэн фасадыг зурагт үзүүлсэн ерөнхий схем зургийн дагуу угсарна. Хаалга цонхны түүвэр, тодорхойлолтын зурагт, хаалга цонхны хананд гарах /суух/ нүхний хэмжээ, хаалга цонхны хэмжээг заасан. Бүх хаалга, цонх, шилэн фасад нь одоо мөрдөгдөж буй MNS-5802, MNS-5874, MNS-5830 шаардлагыг хангасан байна. Бүх цонх нь 3 давхар шилтэй хуванцар вакум байна. Шилэн фасад нь 2 давхар шилтэй металл арамтай байна. 

Гадна засал:

Гадна заслыг зураг төсөлд заасны дагуу угсарна. Барилгын эргэн тойрны цоклийн хананд 120 мм тоосгон өрлөг дээр хэсэгчилсэн чулуун өнгөлгөө хийнэ. Гадна талд гарсан барилгын дээврийн хүрээ хаалга болон цонхны гоёлын хүрээг галд шатдаггүй гипсэн материалаар хийнэ. 

Дотор засал:

Дотор заслыг заслын тодорхойлолт зурагт заасны дагуу угсарна. Заслын тодорхойлолтод нөөц аваагүй болно. 

  -   Шалны төрлийг Таних тэмдэг хэсгээс нарийвчлан тодорхойлно. 

    -    Таазны эмульс нь цагаан өнгөтэй байна. 

    -    Хананы эмульс, обойн өнгө, загварыг захиалагч сонгоно. 

    -    УГ-ДТ: Уналттай гипсэн дүүжин тааз, АЦӨ-ДТ нь 300*300 мм ус чийгт тэсвэртэөй, зэвэрдэггүй төмөр арамтай, дүүжин тааз байна. АЦӨ-ний хананы плитаг h=2700 мм байна. 

    -    Гал зуухны хананы плитаг тавилга суух хэсгийн хойд талд шалнаас дээш 800-850мм-m h=600мм өндөртэйгээр наана. 

Хөндий суурьтай 80м2 талбайтай гамшигт тэсвэртэй амины орон сууцны барилга угсралтын ажлын төсөвт өртөг

Тус амины орон сууцыг барихдаа дараах зүйлийг анхаарах хэрэгтэй. Үүнд:  

    1.    Барилга баригдах газар нь тодорхойгүй, барилгын өндөржилт, буурь хөрсний геологийн дүгнэлт байхгүй тул энэ зургаар барилга угсралт хийхээр сонгосон захиалагч нь зохиогч инженерээр тухайн барилга барих газарт тохируулсан суурийн холболтын зураг төсөл боловсруулсны дагуу угсралтын ажил гүйцэтгэх хэрэгтэй. Суурийн холболтын зураг төсөл хийлгэхгүйгээр угсралт хийхийг хориглоно. 

    2.    Барилгад хэрэглэх арматур нь ГОСТ 5781-82 стандартын А400, А240 ангийн арматур байхаар тооцсон. Арматурын бат бэхийн үзүүлэлтүүд нь урсалтын хязгаар 390мпа, бат бэхийн үзүүлэлт нь 590мПа, харьцангуй суналт нь 14% байна. 

    3.    Барилгын цутгалт хийх бетоноос барилгын талбай дээр сорьцын 3-аас багагүй шоо авч дээжийг лабораторт шалгуулна. Гадна агаарын температурт тохируулж бетоны арчилгааг хийх шаардлагатай. 

    4.    Барилгын хэв, тулаасыг бетоны бат бэхийнхээ 70 хувиас багагүй бэхжилтийг авсаны дараа авах хэрэгтэй. Тулаасын чангалгааг хийхдээ хэвтээ хийцийн голыг бага зэрэг өргөх байдлаар гүйцэтгэвэл зохимжтой. 

    5.    Цутгамал төмөрбетон хийцүүдэд хэрэглэх арматурын төрлийг өөрчлөх тохиолдолд тухайн арматурын багц бүрээс 45 см урттай дээж авч зохих эрх бүхий мэргэжлийн байгууллагаар шалгуулж зураг төсөлд заасантай тохирч байгаа бол зохиогчийн зөвшөөрлийг авч хэрэглэнэ. 

    6.    Барилга угсралтын үед зохиогч инженертэй зохиогчийн хяналтын гэрээ хийж заавар зөвлөгөө авч ажиллах шаардлагатай.