Эрс тэрс дөрвөн улиралтай манай улсын хувьд ногоо, жимс тариалах боломжтой улирал хаяанд ирлээ. Сүүлийн үед хүмүүс хүнс ногооны хэрэглээгээ өөрсдөө тариалж, илүү эко амьдралын хэв маягт шилжиж байна. Тиймээс энэ удаагийн нийтлэлдээ хашаандаа жимс, ногоогоо тариалах хүсэлтэй хүмүүстээ зориулан хүлэмж барихад тань туслах таван үнэтэй зөвлөмжийг бид танд хүргэж байна. 

Алхам 1. Байршлаа сонгох

Өөрийн амьдарч байгаа хүрээлэн буй орчноосоо хамааран аль зүг рүү хүлэмжээ харуулан барихаа сонгох хэрэгтэй. Энэ нь хамгийн чухал бөгөөд хүлэмжээ зөв байрлуулж чадвал хүссэн тариалангаа хялбар хийж чадах болно. Ингэхдээ аль болох өдрийн турш нарны илч авч байхаар байршлыг сонгох хэрэгтэйг анхаараарай. Мөн хүлэмжийн аль нэг талын хана нь өөр байшин, байгууламжийн ханатай залгуулан хийх нь оновчтой шийдлийн нэг юм.  

Байршлаа сонгохдоо хамгийн багадаа 6 цаг нарны илчийг авч байхаар тооцоолох хэрэгтэй бөгөөд аль болох өглөөний нарыг олон цагаар шингээж чадахуйц байршил байхаар тооцоорой. Өглөөний нар нь үд болон бусад үеийн нартай харьцуулахад хүлэмжид ургаж буй жимс ногооны ургах процесст илүү ихээр нөлөөлж чаддаг байна. Түүнчлэн хүлэмж барихаар төлөвлөж буй газрын ойр орчимд сүүдэрлэхүйц  өндөр мод, бут байгаа эсэх дээр анхаарвал зохистой.

Өвөл болон зуны нарны байршил дээр анхаарах хэрэгтэй. Өвлийн нар нь зуны нартай харьцуулахад богино бөгөөд дэлхийн тэнхлэгээс хамааран тусгалын цэг ч бас өөрчлөгддөг гэдгийг санаарай. Гацуур мод болон далбагар навчид модоор хүрээлэгдсэн орчинд хүлэмж барих нь мөн л тохиромжгүй юм.

Цахилгааны эх үүсвэртэй хялбар холбогдохуйц байршил сонгоорой. Ихэнх хүлэмжүүд халаалт болон агааржуулалтын системтэй байх шаардлагатай байдаг юм. 

Тэгш гадаргуу сонгох хэрэгтэй. Хэрэв та тэгш бус эсхүл газрын нүхжилттэй хэсэгт барихаар төлөвлөж байгаа бол эхлээд газрын гадаргууг тэгшлэхийг зөвлөж байна. Ингэснээр бороо орсны дараах тогтоол ус болон борооны усны урсгал дагуу байснаар үүдэх эрсдэлүүдээс та өөрийн тарьж буй жимс ногоог хамгаалж буй алхам болно.

Алхам 2. Хүлэмжийн бүтэц болон хэмжээг сонгох. 

Хүлэмж барина гэдэг нь амар ажил биш учраас та хэмжээ болон халаах зардал гэх мэт хүчин зүйлсийг маш сайн тооцоолоорой.

Хамгийн түгээмэл баригддаг хүлэмж нь 2,4м*1,8м хэмжээтэйгээр баригддаг байна. Хүлэмжийнхээ загвар болон хийцлэлийг сонгохдоо барихад амар сонголтыг эрэлхийлж байгаа бол Amazon болон Costco гэх мэт онлайн худалдааны сайтууд дээр худалдаалагдаж буй багц бүтээгдэхүүнүүдээс сонголтоо хийж болох юм. Харин өөрөө барихаар төлөвлөж байгаа бол дараах зөвлөмжүүдийг санал болгож байна.

    -    Байшингийн ханатай залгаа байршлаар барих. Хэрэв та хүлэмжээ байшингийнхаа ханатай залгуулан барихаар төлөвлөж байгаа бол танд тоосгон ханатай байшинд залгуулан барихыг зөвлөж байна. Ингэснээр тоосгон ханын нарнаас шингээж буй дулаан нь шууд таны хүлэмжийн дулааны системийн нэг хэсэг болох давуу талтай юм.

    -    Бөмбөгөр оройтой дээврийн хүрээ хийх. Бөмбөгөр оройтой дээврийг барихдаа та металл эсвэл модон хийцлэлтэй арааман дээр тааруулан PVC материалыг хэлбэрт оруулан зангидах юм.

    -    Хүлэмжийн суурь хэсгийг хийхдээ газраа бага зэрэг доош ухан сууриа байршуулах нь зүйтэй. Ингэснээр таны хүлэмж салхи, бороо гэх мэт байгалийн үзэгдлүүдэд хэлбэрээ алдахаас сэргийлнэ.

Алхам 3. Хүлэмжийн гадаргууг сонгох. 

Хэт ягаан туяанд тэсвэртэй polyethylene энэ төрлийн хулдаас нь өртөг бага боловч энгийн пластик хулдаастай харьцуулахад тийм ч их таатай материал биш бөгөөд ашиглах явцад химийн бодис ялгаруулах, тогтмол арчилгаа шаардагддаг гэх мэт сул талуудтай материал юм.  

Харин шилэн гадаргуу нь хагарах эрсдэл багатай боловч ямар төрлийн шил ашиглагдаж буйгаас хамааран 15 жил хүртэл өнгөө алдахгүй байж мөн нарны цацрагийг хүлэмжид нэвтрүүлэх чадамж өндөртэй байдгаараа маш том давуу тал болдог байна.

Алхам 4. Хүлэмжийн араамыг босгох.

Хүлэмжээ барихаар төлөвлөсөн газартаа суурь босгох байршлууддаа шон хатгаж, хатгасан шонгуудаа утсаар холбох хэрэгтэй. Хүлэмжээ барих газраа суурь хэсгийг нь тойруулан ухаж дам нуруу буюу сууриа байршуулах, дараа нь хүлэмжийн гадаргууд ашиглах гэж буй хулдаасаа сайн татаж оруулан суурьтай нь хамт бэхлэн хадаж шороогоор чигжинэ.

Алхам 5. Хүлэмжийн температурыг удирдах

Хэрэв шилэн гадаргуу бүхий хүлэмж барихаар төлөвлөж байгаа бол дээвэр хэсэг дээрээ агаарын урсгал нэвтрүүлж болохуйц цонхнуудыг байршуулаарай.

Хэрэв хулдаасан гадаргуу бүхий хүлэмж барихаар төлөвлөж байгаа бол булангууддаа халуун хүйтнээр үлээх боломжтой агааржуулагч байршуулах нь зүйтэй. Ингэснээр та хүлэмжийнхээ дотор температурыг хүссэнээрээ удирдан өвлийн улиралд ч ногоо жимс тариалах боломжтой юм.  

Та дээрх зөвлөмжийн дагуу хүлэмжийн байршлаасаа эхлэн температур удирдах хүртэлх дарааллаар зөв хийсэн бол ногоо тариалах явцад алдаа дутагдал гаралгүй та өөрийнхөө хүссэн жимс ногоог тариалж болно.