Барилгын салбартай холбоотой мэдээ мэдээлэл, судалгаа, салбартаа нэр хүндтэй зочдын ярилцлага, мэргэжилтний зөвлөгөө, шинэ орон сууц, барилгын материалын үнэ ханшийн судалгаа сар бүр, ажил гүйцэтгэлийн үнэлгээ улирал бүр шинэчлэн гаргадаг Барилга МН сэтгүүлийн 2024 оны зургаадугаар сарын дугаар уншигчдадаа хүрч эхэллээ. 

Энэ удаагийн нүүр хуудсанд Дельта элеватор ХХК хамтран ажиллаа. 

Шинэ дугаарт гарсан онцлох булангуудаас товч танилцуулбал,

VIP ЗОЧИН: Үндэсний үйлдвэрлэгч, баялаг бүтээгчид бол улс эх орны хөгжлийн хөдөлгүүр билээ. Барилгын салбарт хөрөнгийн зах зээл төдийлөн хөгжөөгүй байхад барилгын материалын салбарт хувьцаат компани үүсгэн байгуулалцаж өдгөө 16 жилийн туршид салбарынхаа жаргал зовлонг үүрэлцэж, бүтээн байгуулж буй Э.Мөнхсайхан хэмээх эрхэм хүнийг энэ удаагийн зочин хоймортоо урьж ярилцлаа. Тэрээр Санкт-Петербургийн санхүү эдийн засгийн улсын их сургуулийг төгсөж, Монголын томоохон компаниудад ажиллан туршлага хуримтлуулж, өдгөө Ремикон ХК-ийн гүйцэтгэх захирлаар ажиллаж байгаа юм. 

ХӨНДӨХ СЭДЭВ: Монгол Улсын хэмжээнд барилгын салбарын хүний нөөц хомсдож, энэ төрлийн мэргэжлийг сонгон суралцагчдын тоо жил ирэх тусам буурч байна. 2024 онд ажиллах хүчний эрэлт хамгийн их байх салбаруудын тэргүүн эгнээнд барилгын салбар бичигдэж байгаа бөгөөд 15,3 мянган ажиллах хүчний эрэлт бий болж байгаа нь нийт эрэлтийн 16,0 хувийг эзэлж байна. Энэхүү эрэлтийг барилгын чиглэлийн дотоодын их, дээд сургуульд бэлтгэгдэж байгаа 7601 суралцагч нөхнө гэж бодоход энэхүү эрэлтийн 40 гаруй хувийг л хангахаар байна. Хөдөлмөрийн зах зээлийн барометрийн судалгаагаар барилгын салбарын ажиллах хүчний хомсдол 5,6 мянгад хүрээд байна.

НИЙТЛЭЛ: Түүхэн дурсгалт барилга, архитектурын дурсгалын сэргээн засварлахын өмнө олон төрлийн суурь судалгааг хийж хэрэгжүүлэх ёстой. Энэ судалгаануудын нэг нь үнэ цэн, эх сурвалжийн судалгаа байдаг. Архитектурын өвд олон хүчин зүйл заналхийлж байгаа бөгөөд эдгээр аюулд зохих ёсоор хариу өгөхгүй бол тухайн нийгмийн хөгжил, өвөрмөц байдал, соёлын үнэт зүйлсэд ноцтой асуудал тулгарах болно. 

ШИНЭ МАТЕРИАЛ: Барилгын салбар нь дэлхийн дулаарлыг нэмэгдүүлдэг уур амьсгалд сөргөөр нөлөөлдөг цемент бетон зэрэг материал ашигладаг учраас байнга шүүмжлэлд өртдөг. Ялангуяа бетоныг уур амьсгалын алуурчин гэж үздэг аж. Учир нь түүний үйлдвэрлэл нь эрчим хүч болон үнэ цэнтэй байгалийн түүхий эдийн нөөц их шаарддаг, нүүрстөрөгчийн давхар ислийг их хэмжээгээр ялгаруулдаг. Иймээс барилгын салбарын эрдэмтэн судлаачид байгаль орчинд ээлтэй, ногоон бүтээгдэхүүн гарган авахын төлөө ажилласны тод жишээ бол ХБНГУ-ын хойд зүгийн хоёр ч компани байгаль орчин, уур амьсгалд ээлтэй бетон үйлдвэрлэх өөр өөрийн бодлогыг боловсруулсан байна. 

АМИНЫ ОРОН СУУЦ: Хүн гэдэг амьтан үргэлж тав тухтай байдал, амар амгалан руу өөрөө ч мэдэлгүй тэмүүлж байдаг жамтай байдаг. Тэр тусам өөрийн эзэмшлийн газартаа өөртөө тав тухыг бүтээж чадахгүй бол харамсаад ч барахгүй биз. Тиймээс таны цаг завыг хэмнэж, гэр бүлийн тань аюулгүй байдал, эрүүл ахуй талаас зөвлөгөө хүргэж байна. Амины орон сууцны гадна тохижилт, backyard буюу арын талбайн тохижилтыг хийхдээ гэр бүлийн гишүүдийн нас, хүйс, тэдгээрийн онцлогт тохирсон аюулгүй, эрүүл орчинг бүрдүүлэх шаардлагатай. 

НОГООН БАРИЛГА: Өнөөгийн орон сууцны шинэ хотхон, хорооллуудын хувьд тулгамдаж буй нэг том асуудал нь олон нийтийн барилгын хүртээмжийн асуудал юм. Улсын сургууль, цэцэрлэг, өрхийн эмнэлэг, хорооны байр зэргийг онцолж байна БНбД 30-01-21 ХОТ, ТОСГОНЫ ТӨЛӨВЛӨЛТ, БАРИЛГАЖИЛТ-ийн норм ба дүрэмд зонхилох олон нийтийн барилгын үйлчлэх хүрээг заасан байдаг. Өөрөөр хэлбэл хүртээмжийн нэг үзүүлэлт буюу ойрхон байх. 

Эдгээр булангуудаас гадна хууль эрх зүй, та чадна, дуулгах сонин, дэвшилтэт технологи гэх мэт шинэ мэдээ мэдээллээр дүүрэн байгаа. 

СЭТГҮҮЛ ЗАХИАЛАХ 

Онлайн унших: Номын сан

Утас: 9100-0233, 7711-3333-2