Барилгын салбартай холбоотой мэдээ мэдээлэл, судалгаа, салбартаа нэр хүндтэй зочдын ярилцлага, мэргэжилтний зөвлөгөө, шинэ орон сууц, барилгын материалын үнэ ханшийн судалгаа сар бүр, ажил гүйцэтгэлийн үнэлгээ улирал бүр шинэчлэн гаргадаг Барилга МН сэтгүүлийн 2024 оны тавдугаар сарын дугаар уншигчдадаа хүрч эхэллээ. 

Энэ удаагийн нүүр хуудсанд Эвт чулуу ХХК хамтран ажиллаа. 

Шинэ дугаарт гарсан онцлох булангуудаас товч танилцуулбал,

VIP ЗОЧИН: Багш гэдэг хүмүүний амьдралын луужин, чиглүүлэгч нь болдог эрхэм дээд хүн билээ. Тийм ч учраас энэ удаагийн зочин хоймортоо барилгын салбарт мянга мянгаар тоологдох мэргэжилтнүүдийг бэлтгэж, туршилт судалгаа, эрдэм шинжилгээний олон ажлаараа боловсролын төдийгүй барилгын салбарт өөрчлөлт шинэчлэлтийг авчирсан Монгол Улсын гавьяат багш, зөвлөх инженер Ц.Дашдоржийг урин ярилцлаа. Түүний хийж бүтээсэн бүхэн бэлтгэсэн шавь нар нь өнөөгийн барилгажилт, сантехникийн системд үнэтэй хувь нэмэр оруулж буй билээ. 

НОГООН БАРИЛГА: Ногоон барилга буюу тогтвортой барилга нь архитектурын салбар, хүрээлэн буй орчны салбарт сүүлийн үед хүч түрэн орж ирж байгаа чиг хандлага бөгөөд хүлэмжийн хийн ялгарлыг бууруулахад чиглэсэн алхам хийх шаардлагатай томоохон салбарууд юм. Аж үйлдвэрийн хувьсгал эхэлсэн цагаас байгаль орчин, нийгэм, эдийн засаг гэсэн гурван тулгуур асуудал яригдаж сүүлийн жилүүдэд дэлхий нийтийг хамарсан асуудал болж хувирсан. Дээрх 3 асуудалд тулгуурладаг тогтвортой хөгжлийн бодлогын нэг чухал сэдэв бол эдийн засаг буюу тогтвортой санхүүжилт юм. 

НИЙТЛЭЛ: Түүхэн дурсгалт уран барилга, архитектурын дурсгалын сэргээн засварлалтыг хийхийн өмнө ямар материалаас бүтсэн, уламжлалт хийцэл дээр үндэслэсэн нарийн технологиудыг тодорхойлох, олон төрлийн суурь судалгааг хийх хэрэгтэй. Тухайлбал, сүмийн барилгын ноён нуруу, дам нуруу, холбоос нуруу, булангийн дам нуруу, дэлний моднууд, багана зэрэг модон хийцлэлд хэрэглэсэн будаг нь ямар төрлийн будаг байв, суурь давхарга буюу пайтууны бүтэц нь юу болох, маажин, зүмбэрийн онцлог болон ханын өрлөгт хэрэглэгдсэн тоосго, шавар, лагшингийн найрлага, орцыг хүртэл маш сайн судлах ёстой.

МЭРГЭЖИЛТНИЙ ҮГ: Барилгын салбар хурдацтай тэлж, хөгжиж байгаагийн хэрээр төсөв санхүү, чанар аюулгүй байдал, удирдлага зохион байгуулалт, хүний нөөцийн маш олон асуудлууд ар араасаа урган гарсаар байна. Хэдийгээр тухай бүрд нь шийдэл хайж, норм нормативын баримт бичгүүдийг шинэчлэх, хууль эрх зүйн орчныг сайжруулах, салбарын хэмжээнд тогтмол хэлэлцүүлэг зохион байгуулах замаар асуудлыг эрэлхийлж, тулгараад буй асуудлуудыг зохицуулахаар оролдож байгаа боловч тэр бүр нарийн судалгаагүй, өмнөх болон хойчийн үр дүнгээс оновчтой дүн шинжилгээ хийх боломж бүрдэхгүй байгаагаас хараахан дорвитой ахиц гарахгүй байна. 

МЭРГЭЖИЛТНИЙ САНАЛ: Манай Засгийн газар 2030 он гэхэд Сэргээгдэх эрчим хүчний (СЭХ) эзлэх хувийг улсын нийт эрчим хүчний хүчин чадлын 30%-д хүргэх зорилтыг дэвшүүлсэн. Энэхүү зорилт нь хүлэмжийн хийн ялгарлыг 2030 он гэхэд 22,7%-иар бууруулахаар олон улсын өмнө хүлээсэн үүрэг, Төрөөс эрчим хүчний талаар баримтлах бодлого, ирээдүйд учрах эрчим хүчний хомсдолоос сэргийлэх төрийн бодлоготой нийцэж байгаа юм. Өнөөдөр дээрх зорилтын биелэлт хангалттай биш ердөө 9%-тай байна. Энэ байдлаараа явбал дээрх зорилт яагаад ч биелэх боломжгүй худлаа амлалт болох төлөвтэй байна.

Эдгээр булангуудаас гадна хууль эрх зүй, та чадна, орон сууцны нягтрал гэх мэт шинэ мэдээ мэдээллээр дүүрэн байгаа.  

СЭТГҮҮЛ ЗАХИАЛАХ 

Онлайн унших: Номын сан

Утас: 9100-0233, 7711-3333-2