Монголын барилгын Инженерүүдийн Холбоо нь 1996 онд үүсгэн санаачлагчдын хурлаар байгуулагдсан бөгөөд одоогоор 109 гишүүн байгууллага, 2000 гаруй барилгын инженер гишүүдтэй, Улаанбаатар хот болон Увс, Завхан, Булган, Архангай, Дорнод, Баян-Өлгий, Эрдэнэт, Дархан хотод үйл ажиллагаагаа явуулж байгаа, гишүүддээ болон нийгэмдээ үйлчилдэг төрийн бус байгууллага юм.

    Мөн Азийн Барилгын Инженерүүдийн Зохицуулах Зөвлөл, Америк, Япон, Тайвань, Солонгос, Хятад, Туркийн Барилгын Инженерүүдийн Холбоо, Турк улсад төвтэй Олон Улсын Зөвлөх Инженерүүдийн Холбоотой тус тус хамтын ажиллагааны гэрээтэй ажилладаг юм.

     Өнөөдөр МБИХ гадаад харилцаагаа улам өргөжүүлэн Швейцарийн Барилгын Инженер-Архитекторуудын Нийгэмлэгтэй хамтын ажиллагааны гэрээг Улаанбаатар хотноо байгуулан, хоёр холбооны ерөнхийлөгч нар гэрээнд гарын үсэг зурлаа. Хамтын ажиллагааны гол зорилго нь хоёр улсын барилгын норм ба дүрмийг судлах, туршлага солилцох, стандарт норм дээр хамтран ажиллах, барилгын мэргэжлийн оюутнууд болон залуу инженерүүдийн мэргэжлийн туршлага солилцох солилцооны хөтөлбөрийг хэрэгжүүлэхэд оршино.

    Энэхүү гарын үсэг зурах ёслолын ажиллагаанд МБИХ-ны ерөнхийлөгч Э.Ганзориг, гүйцэтгэх захирал Б.Гантөмөр, Удирдах зөвлөлийн гишүүн К.Мурат, Г.Тулга нар, ШБИАХ-ны ерөнхийлөгч Даниел Кёндиг, Захирлуудын зөвлөлийн гишүүн Адреан Алтенбургер болон бусад төлөөлөгчдийн хамт оролцлоо.

Мөн ШБИАХолбоо нь 2011.09.02- нд нээгдэх “Барилга Експо -2011” олон улсын үзэсгэлэнд Швейцарын барилгын инженерүүдийн бүтээсэн Mongolian Circus Tower төслийн бүтээлээр оролцох юм. Энэхүү бүтээл нь сэргээгдэх эрчим хүчийг хэрхэн ашиглах болон агаарын бохирдлыг хэрхэн бууруулах арга зам байгааг үзүүлсэн шилдэг төсөл юм.