Барилгын Материалын Ханган нийлүүлэгчдийн зөвлөл, Эрээн хотын боомтын барилгын материалын холбоо хамтран  “Монгол - Хятадын барилгын салбарын бизнес уулзалт” - ыг 04 сарын 19 - ны өдөр "Эрээн хотын олон улсын үзэсгэлэнгийн төв" - д  амжилттай зохион байгууллаа. 

Тус уулзалтыг хоёр орны барилгын салбарын бизнес эрхлэгчдийг танилцуулах, хамтын ажиллагааг өргөжүүлэх,  импортоор орж ирж буй барилгын материалын чанар, стандарт, аюулгүй байдлыг цаашид хангуулан ажиллах нөхцөлийг бүрдүүлэх, чөлөөт бүсэд Монголын аж ахуй нэгжүүдэд хамтран ажиллах боломжуудыг нээн танилцуулах зорилгоор анх удаа зохион байгуулаад байна.Уулзалтад Хятадын талаас Эрээн хотын Улс төрийн зөвлөгөөний орлогч дарга, Худалдаа хөгжлийн танхимын тэргүүлэгч Ч.Хасхүү, Шилийн гол аймгийн Худалдаа хөгжлийн танхимын дэд ерөнхийлөгч Лу Хай Ну, Эрээн хотын боомтын барилгын материалын холбооны тэргүүн Хуан Шиаочин болон барилгын салбарын 60 гаруй компанийн төлөөлөл, Монголын талаас Барилгын Материалын Ханган нийлүүлэгчдийн зөвлөлийн тэргүүн Г.Батсүх, Барилга МН гүйцэтгэх захирал Д.Цолмонгэрэл болон 50 гаруй барилгын салбарын аж ахуй нэгж байгууллагын удирдлагууд хүрэлцэн ирсэн юм.

"Барилга МН" гүйцэтгэх захирал Д.Цолмонгэрэл нээлтийн үг хэлэв 

Уулзалтын үеэр "Монгол - Хятадын чөлөөт бүсийн нөхцөл байдал", "Монголын барилгын зах зээл, өнөөгийн байдал" гэх мэт хоёр талын төлөөлөгчдийн илтгэлүүд тавигдаж, “B2B” уулзалт зохион байгуулагдаж, бизнесийн гэрээ хэлэлцээрүүд хийгдлээ. Мөн Барилгын Материалын Ханган Нийлүүлэгчдийн Зөвлөл болон Эрээн хотын боомтын барилгын материалын холбоо хамтран ажиллах "Санамж бичиг" - т гарын үсэг зурав.

Санамж бичгийн хүрээнд хоёр тал харилцан барилгын материалын мэдээ мэдээлэл солилцох, хамтарсан сургалт, уулзалтууд зохион байгуулах, барилгын салбарын бизнес эрхлэгчдийнхээ эрх ашгийг хамгаалах, дэмжин ажиллах тал дээр хамтран ажиллахаар боллоо.

"Санамж бичиг" - т гарын үсэг зурав 

Барилгын материалын ханган нийлүүлэгчдийн зөвлөлийн тэргүүн Г.Батсүх: "Монгол Улс  барилгын материалынхаа 70 орчим хувийг импортоор авдаг учраас цаашид барилгын материалын чанар, аюулгүй байдлыг хангуулж, хуурамч материалыг хилээр  нэвтрүүлэхгүй байх нөхцөлийг бүрдүүлэх тал дээр хамтран ажиллахаар боллоо. Мөн Эрээн хотод, тэр дундаа чөлөөт бүсэд Монголын аж ахуй нэгжүүдэд үйл ажиллагаа явуулах боломж буюу үйлдвэр байгуулах, худалдаа үйлчилгээ эрхлэх таатай нөхцөлүүдийг бий болгох талаар мэдээлэл солилцлоо. Цаашид зөвхөн Монголдоо бус Хятадын зах зээл рүү барилгын материалаа нийлүүлэх, татвараас чөлөөлөгдөх бусад олон талт боломжуудын талаар энэ удаагийн уулзалтаар мэдэж аваад байна" хэмээн ярив.

Эрээн хотын боомтын барилгын материалын нийгэмлэгийн ерөнхий нарийн бичгийн дарга Гуо Жунпин: “Энэхүү уулзалтаар дамжуулан хоёр улсын аж ахуй нэгж байгууллагууд харилцан бизнесийн үйл ажиллагаагаа танилцуулж, илүү сайн ойлголтой болж байгаа төдийгүй хамтын ажиллагааны үндэс суурь тавигдаж, боомтын үйл ажиллагаа, худалдааг өргөжүүлэн бэхжүүлэхэд хамтран ажиллах болсондоо таатай байна” гэлээ. 

Эрээн хотын Улс төрийн зөвлөгөөний орлогч дарга, Худалдаа хөгжлийн танхимын тэргүүлэгч Ч.Хасхүү: "Эрээн хот нь Хятадыг хойд бүстэй холбох гол гүүр нь болдог төдийгүй Монгол Улс руу импортлогдож байгаа ихэнх барилгын материал нь Эрээн хотоор дамжин гарч байна. Тиймээс цаашид чанар стандартыг хангуулах, чөлөөт бүсэд явагдах үйл ажиллагаануудад хамтын ажиллагаа өргөжүүлэх, олон талт харилцааг бий болгохыг зорьж энэхүү уулзалтыг зохион байгуулж, амжилттай болсонд баяртай байна" гэдгээ хэлсэн юм. 

Хоёр талын илтгэлүүд тавигдав  

Монголын зочид төлөөлөгчдийг хүндэтгэлтэйгээр хүлээн авав