Заха Хадид архитекторын бас нэгэн гайхалтай бүтээл биежиж 2023 оны онцлох барилгуудын нэг болоод байгаа билээ. Тухайн бүтээл нь БНХАУ-ын Жухай хотын Жинван дүүрэгт байрлах бөгөөд нүүдлийн шувууд тэнгэрт нисэж буй хэлбэртэй соёл урлагийн төв юм. 

Тухайн соёл урлагийн төв нь 100 мянган метр квадрат талбайтай, 270м*170м хэмжээтэй, 35 м өндөртэй ба соёл, эрдэм шинжилгээний болон худалдааны шинэ дэд бүтцийг бий болгожээ. Үүнд 1200 хүний суудалтай урлагийн театр, 500 хүний суудалтай олон үйлдэлт  Black box театр, интерактив шинжлэх ухааны төв, урлагийн музей тус тус багтжээ. Тус барилгын ерөнхий концепц төлөвлөгөө нь 2021 онд танилцуулагдаж байсан бол ийнхүү хоёр жилийн дараа барилгын ажил бүрэн дуусжээ. 

Барилга нь төв тэнхлэгийн хувьд тэгш хэмтэй бөгөөд хоёр том, хоёр жижиг хэсгээс бүтэж,  дундын танхим болох үйлчилгээний төв талбайгаар хоорондоо холбогдсон байдаг. 1200 хүний суудалтай гранд урлагийн театр болон музейн хэсгийг өнгө үзэмж сайтай материалаар чимэглэсэн бол 500 хүний суудалтай олон үйлдэлт  Black box театр буюу интерактив шинжлэх ухааны төвийг бараан өнгөөр бүтээсэн байна. Хэсэг бүрийн давтамж, тэгш хэм, масштабын өөрчлөлтийг тохируулан тортой ган халхавчаар хийжээ.

1200 хүний суудалтай гранд урлагийн театр

Соёл урлагийн урлагийн төвийн бүтэц

Энэхүү зохицуулалт нь хэсэг бүрийн өөр өөр функциональ шаардлагад нийцсэн холбогдох элементүүдийг бий болгосон байна. Барилгын дизайны өвөрмөц элемент нь дөрвөн үндсэн жигүүрийг нэгтгэсэн дээврийн бүтэц юм. Дээврийн систем нь дөрвөн жигүүрийг бүрхсэн торлог сүлжээнээс бүрдсэн.

Дээврийн план 

Жигүүр бүрийг хооронд нь холбосон гүүр нь барилгын төв хэсэгт олон давхаргат нийтийн талбайг бий болгож, дотоод засал чимэглэл, кафе, ресторан, боловсролын байгууламж бүхий орчныг бүрдүүлжээ. Тухайн олон нийтийн хэсэгт байгалийн гэрлийг ашигласан нь үйлчлүүлэгчдийн сонирхлыг татахын зэрэгцээ чөлөөт цагаа өнгөрүүлэх таатай орчныг цогцлоожээ. 

Шинжлэх ухааны төвийн лекцийн танхим нь тус төвийн шинжлэх ухааны туршилт, нээлтийг олон нийтэд үзүүлэх хөтөлбөрт зориулагдсан. Модульчлагдсан дээврийн фасадууд нь ил тод байдлыг хангаж, дээврийн дор байрлах нуурын эргийн зам, талбай дээр хүмүүс чөлөөт цагаа өнгөрүүлэх боломжтой аж. Цаашилбал, төвийн баруун талын гаднах театр нь гадаа тоглолт, үйл ажиллагаа явуулах боломжийг бий болгожээ. 

Архитектор Заха Хадид тус барилгын талаар ярихдаа "Тухайн урлагийн төв нь ердөө 22 баганагаар бэхлэгдсэн бөгөөд нийт 270м x 170м хэмжээтэй, эдгээр чөлөөт хэлбэрийн ган дээврийн халхавч нь тэгш хэмтэй геометрээс бүрдсэн бөгөөд тэдгээрийн модульчлагдсан бүтэцтэй. Тус төв нь Жинван дүүргийн “хөвөн хот” санаачлагын салшгүй нэг хэсэг болон зохион бүтээгдсэн бөгөөд энэ нь хотын борооны усны 70-аас доошгүй хувийг байгалийн аргаар шүүж дахин ашиглах боломжтой. Усны зарцуулалтыг бууруулах зорилгоор тохижилтын усалгааны системийг хянах хүрээнд чийгшил мэдрэгчийг төлөвлөж өгсөн” гэжээ.

Тухайн урлагийн төв нь Хятадын өмнөд хэсгийн далайн эрэг орчмын уур амьсгалд оршдог тул архитекторын багийнхан давхар дулаалгатай шилийг төлөвлөсөн. Мөн нарны гэрлийн тусгалыг ашиглан барилгын дотоод орон зайг янз бүрийн байдлаар гэрэлтүүлэхээр шийдэлтэй. Жишээлбэл, шөнийн цагаар дээврийн фасад нь барилгын дотор орон зайг бага зэргийн гэрэлтэй дулаахан орчныг бүрдүүлж өгөх зохицуулалттай хэмээн ярьжээ.  

Барилгын дотоод агаарын чанар, эрчим хүчний зарцуулалтыг ухаалаг удирдлагын системээр хянадаг бөгөөд энэ нь төвийн дотоод орчныг автоматаар тохируулж, эрчим хүчийг бууруулдаг байна.

Түүнчлэн хаягдал дулааны нөхөн сэргээлтийг тус төвийн ус дахин боловсруулах системд холбосон бөгөөд үүгээр дамжуулан төвийн халуун усны хэрэгцээг хангахад ашиглаж болдог.

Энэхүү барилга нь Хятадын ногоон байгууламжийн үнэлгээний стандартын хамгийн өндөр түвшинд хүрэх зорилготой байгаа бөгөөд дахин боловсруулсан ган болон бусад эд ангиудыг сонгох, худалдан авах ажлыг нэн тэргүүнд тавьсан байна.