Өнөөдөр барилгын салбарынхан 85 жилийн ойн босгон дээр хурлаа хийж тулгамдаж байгаа асуудлуудынхаа талаар хэлэлцлээ. Хурлын нээлтийн ажиллагаанд төрийн болон төрийн бус байгууллагын төлөөлөл хүрэлцэн ирсэн бөгөөд барилгын үйлдвэрлэлийн осол гэмтлийн шалтгаан, үүнээс хэрхэн урьдчилан сэргийлж болох талаар хурлын үйл ажиллагаанд хүрэлцэн ирсэн компаниудын төлөөлөгчидөд мэдээлэл хийлээ.

     Энэ удаагийн уулзалт бүхэлдээ барилгын үйлдвэрлэлийн осолгүй, аюулгүй, өндөр бүтээмжтэй ажиллахыг барилгын компаниудад зааж зөвлөсөн, уриалсан хурал боллоо. Уг хуралд ирсэн төлөөлөгчдийн хамгийн их анхаарал хандуулсан илтгэл нь “Барилга.МН” БЗМТөвийн захирал                    Г. Батсүхийн “Барилгачдаа байржуулъя” сэдэвт илтгэл байлаа. Монгол барилгачид барилга дээрээс материал хулгайлдаг, архи уудаг, ажил тасалдаг гэсэн “Муу нэртэй, луу данстай”. Гэвч тэд яагаад тийм нэртэй болсон тухай хэн ч анзаарахгүй байгаа нь харамсалтай. Барилгачдын хэдэн хувь нь байртай вэ? гэсэн судалгаа төрийн болон төрийн бус байгууллагын аль нь ч гаргаагүй. Гаргалаа гэхэд тийм өндөр тоо баримт гарч ирэхгүй нь ойлгомжтой.

      Авсан цалин нь амьдрал ахуйд нь хүрэлцэхгүй, барилгын ахуй хангамж муу, өдөр шөнийг ялгахгүй ажиллана гээд тэдний ажлын нөхцөл байдлыг тоочоод байвал дуусахгүй. Барилгачдын ахуй хангамжийг сайжруулаад өгвөл ядаж л гадаад руу цувж байгаа ажилчдын урсгалыг зогсоох, МУ-ын засгийн газраас батлан гаргасан “Шинэ бүтээн байгуулалт” дунд хугацааны зорилтот хөтөлбөрийг хэрэгжүүлэхэд хэрэгтэй байгаа боловсон хүчний асуудлыг шийдвэрлэх боломж байна.

     Хурал нь бүхэлдээ барилгын үйлдвэрлэлийн ослоос барилгын ажилчидаа хэрхэн сэргийлэх, ямар арга хэмжээг авах ёстойг ойлгуулсан ухааруулсан ажил хэрэгч, үр дүнтэй хурал болж өнгөрлөө. Хуралд тавьсан илтгэлүүдээс харахад барилгын салбарт аюулгүй ажиллагааг тэр бүр мөрдөж ажилдаггүй гэсэн дүгнэлт гарч байлаа. Учир нь жилд гэмтэж бэртэж байгаа хүмүүсийн ихэнх хувийг барилгын аюулгүй ажиллагааны заавар дүрмийг дагаж мөрдөөгүйгээс үүсэлтэй гэсэн осол гэмтлийн тоо баримтнаас харж болохоор байлаа.

     Өнөөдөр барилгын тусгай зөвшөөрөл авсан 1452 аж ахуйн нэгжид 48800 хүн ажиллаж байна гэсэн тоо баримт гарч байгаа нь барилгын салбар эрчимтэй хөгжиж байгааг илтгэж байна. Гэвч энэ салбар хөгжихийн хирээр барилгын үйлдвэрлэлийн ослын тоо жилээс нэмэгдэж байна гэсэн харамсалтай тоо баримт гарч ирж байна.

     УМХЕГ-аас 2005-2010 онд 2684 хүн ямар нэг байдлаар осолд орсон гэсэн тоо баримтыг гаргасан байдаг. Үүний 473 нь барилгын салбарын үйлдвэрийн ослоос болж гэмтэж бэртсэн бол 180 хүн амь насаа алдсан гэсэн харамсалтай тоо гарч байна. Гэвч энэ тоо баримт нь зөвхөн мэргэжлийн байгууллагуудад мэдэгдэж байгаа тоо баримт бөгөөд далд мэдэгдэлгүй үлдсэн ослын тоог гаргавал хэд хүрэхийг хэн ч хэлж чадахгүй.

     Тиймээс Монголын Барилгын Үйлдвэрчний Эвлэлийн Холбооноос 85 жилийн ойн баярыг угтан  “Үйлдвэрлэлийн осолгүй, аюулгүй, өндөр бүтээмжтэй ажиллацгаая ” 3 сарын аяныг зарлан шилжин явах тугыг өнөөдөр гардуулан өглөө.

     Барилгын салбарт тэргүүлэгч компаниуд болох “Хөтөлийн Цемент Шохой”, “Эрэл Цемент”, “Одкон Холдин”, “Нийслэл Өргөө”, “Шифт” ,” Ганхийц”, “Цамхаг”, “Цамхаг Кран”, “Байгууламж”, “Хүрд”, “Байгууламж Орд”, “Өгөөж хишиг”, “Чулуун Өргөө” гээд нийт16 байгууллагаар 3 сарын туршид шилжин аялах юм.

    Туг гардуулах ёслолын дараа 2011 онд үечилсэн байдлаар ГХБГЗЗГ, МБҮЭХ- оос хамтран гаргаж баталсан, барилгын байгууллагуудаар үзлэг шалгалт хийх удирдамжийг танилцууллаа. Үзлэг шалгалт хийж, дүгнэлт гаргах асуудлууд :

1.      Хөдөлмөр хамгааллын ажлыг хэрхэн зохион байгуулж байгаад үнэлэлт, дүгнэлт өгөх

2.      Нийгмийн даатгалын шимтгэлийн төлөлт, бичилтийн байдал

3.      Илүү цагийн хөлс төлөлтийн байдал

4.      Хөдөлмөр хамгааллын заавар зөвлөгөөг ажилтануудад өдөр бүр өгч байгаа эсэх

5.      Хөдөлмөрийн гэрээ түүний биелэлт

6.      Тухайн байгууллага тендерт оролцох эсэх, саналыг судлах

7.      Тухайн байгууллагад хөдөлмөр хамгааллын инженер, техникийн ажилтантай эсэх

8.      Хөдөлмөр хамгааллын зардал, хэдий хэмжээний зардал төлөвлөсөн

9.      Хамтын гэрээний хэрэгжилт, түүний биелэлт

     Гэсэн асуудлыг үндэслэн ГХБГЗЗГ, МБХ, МБҮЭХ, МХХААХ, МБМҮХ, “Монголын барилга үйлдвэрлэлийн хөдөлмөр хамгаалал” төрийн бус байгууллагатай хамтарсан үзлэг шалгалтыг хийх юм. Мөн барилгын салбарын аж ахуйн нэгжүүдийг хөдөлмөр хамгаалал, аюулгүй ажиллагааны чиглэлээр олон улсын SO 2001стандартын шаардлагыг хангасан байгууллага болгохын төлөө МХХААХ-ийн захирал Батбаатар “Хөтөл Цемент шохой”, “Одкон Холдинг”, “Хүрд”, “Нийслэл Өргөө”,  “Өгөөж хишиг” гэсэн таван компанитай гэрээ байгуулж, гэрээнд гарын үсэг зурлаа. Эдгээр байгууллагууд 1 жилийн хугацаанд МХХААХ-тэй хамтран Хөдөлмөр хамгаалал, аюулгүй ажиллагааны чиглэлээр сургалт семинарыг зохион байгуулах бөгөөд оны эцэст энэ шаардлагыг хангасан байгууллагыг зарлах юм байна.