"Улаанбаатар хотын үерийн эрсдэлтэй бүсэд нийгмийн эрүүл мэндийг хамгаалж ус хангамж, ариун цэвэр, эрүүл ахуйн байдлыг сайжруулах нь" төслийн нээлт 04 сарын 03-ны өдөр боллоо.

Уг төслийн Японы Засгийн газрын санхүүжилтээр НҮБ-ын Хүүхдийн сан хамтран хэрэгжүүлэх аж. Төслөөр

• Үерийн эрсдэлтэй бүсэд 18 усан хангамж, ариун цэвэр, эрүүл ахуйн байгууламж барих
• ОБЕГ-т гурван өндөр бүтээлт үерийн ус зайлуулах насос нийлүүлэх
• Төрийн 100 албан хаагч, эрүүл мэнд, боловсролын салбарын 1000 мэргэжилтнүүдийн чадавхыг бэхжүүлэх юм.

Уур амьсгалын өөрчлөлтөөс үүдэн манай улсад сүүлийн 10 жилийн хугацаанд гамшигт үзэгдлийн тохиолдол 1.5 дахин нэмэгджээ. Мөн хот төлөвлөлт, зориулалтын ус зайлуулах хоолой, суваг дутмагаас үерийн нөхцөл байдал хүндэрдэг. 2023 оны үерт 31 мянган өрх, 128 мянга гаруй хүн өртсөн судалгаа гарчээ. Үерийн улмаас нүхэн жорлон хальж, ундны ус бохирдсоноор халдвар өвчин гарах эрсдэл нэмэгддэг байна.

Манай улсын нийт өрхийн 82.5 хувь нь ундандаа цэвэр ус хэрэглэж байгаа ч үүнээс 30 хувь нь л аюулгүй цэвэр ус хэрэглэж байна. Аюулгүй цэвэр ус гэдэг нь химийн бодисгүй, шууд хэрэглэхэд аюулгүй, сайжруулсан усны эх үүсвэрийг хэлнэ.

Нээлтийн төслийн үеэр Монгол Улсын Шадар сайд С.Амарсайхан "Сүүлийн жилүүдэд аюулт үзэгдлүүдийн давтамж ихсэж байна. Үүнийг дагаад гарах эрсдэл нэмэгдэж байна. Төслөөр нийслэлийн 9 дүүргийн 18 байршилд стандарт хангасан усны байр барина. Хамгийн гол нь мэргэжилтэн боловсон хүчнийг бэлтгэнэ. Бид цаашид эрсдэлийн хохирол багатай давахыг хүсвэл чадварлаг хүний нөөцөө бэлдэх ёстой.

Энэ хүрээнд 1.8 сая долларын өртөгтэй энэхүү төслийн хэрэгжүүлэх гэж байна. 2040 он гэхэд учирч болзошгүй гамшгийн эрсдэл 40 хувиар нэмэгдэнэ гэх судалгаа гарсан. Байгалийн давагдашгүй хүчин зүйлүүд, эрсдэлийг зогсоож чадахгүйгээс хойш бэлэн байх хэрэгтэй. Гамшиг тохиолдсон үед хамгийн хохирол багатайгаар даван туулах шаардлага тулгарч байна" гэв.

Япон Улсаас Монгол Улсад суугаа Онц бөгөөд Бүрэн эрхт Элчин сайд Игавахара Масарү “Энэхүү төсөл нь Монгол Улсын иргэд амьдарч буй орчноо сайжруулахаар хэрэгжүүлж буй ажлуудыг нь дэмжих зорилготой. Япон Улс энэ чиглэлээр арвин туршлага, мэдлэгтэй бөгөөд НҮБ-ын Хүүхдийн Сантай хамтран энэ зорилгод хувь нэмрээ оруулж байгаадаа баяртай байна. Энэ төсөл хэрэгжсэнээр Улаанбаатар хотын хүн ам эрүүл, аюулгүй орчинд амьдрах боломжтой болно гэж найдаж байна” гэлээ.

ОБЕГ-ын дарга Г.Ариунбуян "Өнгөрсөн зуны үер бидэнд маш том сургамж болсон. Үерийн улмаас гэр хорооллын нүхэн жорлон хальж халдварт өвчин дэгдэх эрсдэлтэй байдаг. Төслөөр үерийн эрсдэлтэй бүсэд 18 усан хангамж, ариун цэвэр, эрүүл ахуйн байгууламж барьснаар  үер болсон болсон тохиолдолд иргэд  эрүүл ахуйн шаардлага хангасан байруудаар үйлчлүүлэх боломжтой.

Энэ  хүрээнд ОБЕГ-аас 192 түр цугларах байрны судалгааг гаргаж өгсөн. Мөн ОБЕГ-т гурван өндөр бүтээлт үерийн ус зайлуулах насос нийлүүлнэ. Ингэснээр үерийн үед их хэмжээний усыг нэг дор соруулах юм" гэв.

НҮБ-ын Хүүхдийн Сангийн Монгол дахь Суурин төлөөлөгч Эваристе Коуасси-Комлан "Энэ төсөл нь Монгол Улсын хаана амьдарч байгаагаас үл хамааран бүх хүүхдийг аюулгүй, цэвэр усаар хангахад чухал алхам болж байна. Урьдчилан сэргийлэх арга хэмжээ авч, бэлтгэл ажлыг сайн хангах нь үерийн аюулыг даван туулахад маш чухал. Энэ үйлсэд Япон Улсын Засгийн газар болон бусад хамтран ажиллаж байгаа түншүүддээ бид талархаж байна” гэв.

Уг төслийг нийслэлийн 9 дүүргийн үерийн эрсдэлтэй 18 байршилд хэрэгжүүлэх юм.

эх сурвалж: gogo.mn