Барилга МН-ий ТУЗ-ийн дарга Г.Батсүх 

Эрхэм хүндэт сэтгүүлийн уншигчдадаа зориулан Арабын Нэгдсэн Эмират Улс /АНЭУ/ - д зорчсон тэмдэглэлээсээ товчхон хүргэе!

АНЭУ-ын нийслэл Абу Даби хотод дэлхийн хамгийн том сүмүүдийн нэг болох 120.000 м2 талбайтай Sheikh Zayed Grand Mosque-ийг 1994 оноос эхэлж 2007 онд барьж дуусгажээ. Эмират, Итали, Британийн архитекторууд Турк, Марокко, Пакистан, Египет болон бусад орны дизайны элементүүдийг нэгтгэн, цагаан гантиган дээр өнгө өнгийн чулуугаар шигтгэн хийсэн нь гайхалтай байлаа. Сүмийн бүхий л хана шал, бөмбөгөр дээвэр гээд бүгдийгцагаан гантиган чулуугаар урлажээ. 

АНЭУ-ын 10 сая хүн амын 80 гаруй хувийг гадаадын иргэд эзэлдэг ба хамгийн том хот нь Дубай юм. Дубай хот байршлынхаа давуу талыг ашиглан олон улсад нээлттэй, гадаадын хөрөнгө оруулагчдад таатай орчныг бий болгож, олон улсад Дубай гэдэг брэндийг олон улсад гаргаж АНЭУ-ын нийслэл Абу Даби биш Дубай гэж бодтол маркетинг хийжээ. Дубай хотын эмир буюу захирагч Мохаммед бин Рашид Аль Мактумын хэрэгжүүлсэн бодлогоор өнөөдрийн Дубайг бүтээн байгуулсан гэж үздэг ба түүний зургийг хаа сайгүй өлгөсөн байхтай таарна. 

Дубай хотын ДНБ хэмжээ 110 тэрбум $ -т хүрсэн нь АНЭУ-ын ¼ болж байгаа ба 70 гаруй хувь нь аялал жуулчлалын, 3 орчим хувь нь нефтийн орлого юм. Дубайн хүн ам 3,6 сая ч жилдээ 17 сая жуулчин хүлээн  авч байна. Англи хэлтэй бол Дубайд ямар ч асуудалгүй бүх хаяг самбар нь англиар, үйлчилгээний ажилтнууд бүгд англиар ярина. Аялж зугаалахад зориулан зугаацаж цэнгэх олон тоглоомын парк, музей болон томоохон эвент арга хэмжээ зохион байгуулах үзэсгэлэнгийн танхим зэргийг байгуулжээ.

Орон сууц ҮХХ-ийн үнийн хувьд нилээд өндөр буюу орон сууцны дундаж үнэ 1 м2 нь 14 сая төгрөг байна. Түрээсийн төлбөр үнэтэй болохоор ҮХХ-д оруулсан хөрөнгө оруулалтаа 5-7 жилд нөхөхөөр байна.

Эрэлт ихтэй тул сайн байршлуудад баригдаж байгаа орон сууцнууд нь дуусаж, барьж эхлээгүй 2025-2029 онуудад ашиглалтад орох орон сууцнуудад ч захиалга авч байна.

Дубайд гадаадын иргэд үл хөдлөх хөрөнгө, орон сууц авахад чөлөөтэй бөгөөд 2 сая дирхам буюу 545 мянган долларын ҮХХ орон сууц худалдан авахад алтан Арабын Нэгдсэн Эмират улсад амьдрах эрхтэй 10 жилийн алтан виз авах эрхтэй болдог юм байна. 2024 оноос өөрчлөгдөж 1 сая дирхам буюу 932 сая төгрөгийн орон сууц ҮХХ худалдан авахад алтан виз олгодог болж байгаа юм байна. Алтан визтэй болсоноор гэр бүл, үр хүүхэд, аав ээж нь алтан визтэй болж АНЭУлсад амьдрах ажиллах, Эрүүл мэндийн даатгалд хамрагдах нөхцөлөөр хангагдаж, Япон Солонгос зэрэг хөгжингүй орнуудын визийг цахимаар мэдүүлэх зэрэг олон боломжоор хангагддаг юм байна. 

АНЭУ-д гадаадын иргэн компани байгуулахад зардал бага ямар нэгэн асуудалгүй ба  ажиллах 10 хүнд ажиллах зөвшөөрөлтэй виз олгож байна. Татваргүй бүс Дубайд бизнес эрхлэхэд ямар ч татваргүй  ба мөнгөө л төлж байвал хуулиар хориглоогүй ямар ч бизнес эрхлэх боломжтой. Дубайд согтууруулах ундааг хориглоогүй ба казино байгуулахыг зөвшөөрсөн нь аялал жуулчлалыг улам татах боломжтой болгожээ. Татвар маш бага тул томоохон компаниуд, инфлүнсэрүүд, одууд Дубайд компаниа байгуулж татвар бага төлөх болжээ.

Дубай нь амьдрахад таатай, хулгай гэмт хэрэг бага, аюулгүй хот учраас дэлхийн өнцөг булан бүрээс ирж ҮХХ орон сууц худалдан авч байна. Сүүлийн жилүүдэд гадаадын иргэд ялангуяа ОХУ, БНХАУ -ын иргэд орон сууц ихээр авах болжээ. Дубайд орон сууц, хаусны 1000 гаруй төсөл хэрэгжиж, захиалга авч байна. 2023 онд 82.000 орон сууц ашиглалтад орсон нь барилга угсралт, засал чимэглэл, материал хангамжийн маш том зах зээл байгааг харуулж байна. Барилгын ажилд Энэтхэг, Пакистан, Афганистан зэрэг ойр орчмын орнуудаас хямд ажиллах хүч элбэгтэй, барилгын инженер техникийн  ажилчдын сарын цалин дунджаар 2 сая орчим төгрөг, туслах ажилчны цалин  600.000 орчим төгрөг байна. Харин англи хэлтэй чадварлаг удирдах ажилтан, менежер, үйлчилгээний ажилтнуудын сарын цалин 5 саяаас 30 сая төгрөг  байна.

Барьж байгаа барилгууд нь хийц архитектурын хувьд бусад барилгуудаасаа ялгаралтай  Burj Khalifa, Burj Al Arab, Dubai Frame, Cayan Tower, Jumeirah Emirates Towers, Museum of The Future, Atlantis, The Palm зэрэг олон зуун барилгыг барьжээ.

Burj khalifa

Дэлхийн хамгийн өндөр барилгыг барьсан ч, дэлхийн архитекторуудын дунд уралдаан зарлан дахин дэлхийн хамгийн өндөр Dubai Creek Tower  барилгыг барих гэж байна. 

Далайгаас хуурай газар луу асар том суваг татаж сувгаас гарсан шороо чулуугаар хиймэл арал байгуулж, эх газарт далайн устай таатай уур амьсгалтай орчныг бүрдүүлж газрын, үл хөдлөх хөрөнгийн үнэ цэнийг улам нэмэгдүүлж байна.

Дубайн үнэ цэнийг улам нэмэх, тээвэр ложистикийн хувьд хурдан хялбар байлгах, амьдрах таатай орчныг бүрдүүлэх зорилгоор Энэтхэгийн Мумбай хотоос Дубай хүртэл 1900 км далай доогуур хурдан галт тэрэгний хос тунелийн төсөл, зуны улиралд агаарын хэмийг бууруулах мөсөн уул байгуулах төсөл зэрэг санаанд оромгүй мега төслүүдийг хэрэгжүүлэхээр төлөвлөжээ.